Magito

Magito gya

Vanjagila

Ulongochi

Kiganulo kya Magito gya Vanjagila kihumulila njowo cha vanu vevamdike Kilisito, pevavangile na kulutala kuhuma ku Yelusalemu mbaka ku Yudeya na Samaliya na inyi chingi cholofu, ngita fila Yesu peavalongie vachulila vake peyave kwelela kuluhano kwa Nguluvi Magito 1.8. Kiganulo iki kisimbilwe na Luka yeasimbile Njowo Nofu ngita isimbilwe na Luka. Luka akali mlami na akali isimbila unofu hilo ngita njowo chechihumila. Figanilo fyake fyonda chivili akamsimbilie Mugiliki yumwi yeikemelwa Tewofili, ila fila fila akavasimbilie Vakilisito vonda va Kigiliki na Vayawudi Magito 1.1.

Kiganulo kya Magito gya Vanjagila kihochilwa kisimbilwe pagati umwaka va sitini mbaka sitini na chitai kuhuma peababilwe Yesu Kilisito, kwakuva mwiso va kiganulo kusimbilwa ukali Paulo peyave kudinduliwa kuhuma mu kihopo. Luka akagendele pamwi na mnjagila Paulo, ihochwa akasimbile kiganulo iki akiva ku mwani va Atiokiya. Kiganulo kya Magito gya Vanjagila ndi mwendeleso va Njowo Nofu yeisimbilwe na Luka na kinavanga kulongela chipindi Yesu ihelela kuluhano kwa Nguluvi. Lengo lya Luka lyeligehe mu kiganulo liwana na lila lyeasimbile mu Njowo Nofu. Akang'ang'ile Tewofili pamwi na Vakilisito yevahongelike kumdikila Yesu, ngita pealongile mwene, akasimbile kwa unofu kila kinu kyeagitile Yesu mu uwumi vake na kulutala kwa Ukilisito.

Kiganulo kya Magito gya Vanjagila kitulongela tuveche ngita Vakilisito va pamwandi pevakali na kwikala kwa kumdikila Yesu. Mifanu gya vanjagila gituwonisa wuliwuli twing'ang'wa kumlumba Muhe va Nguluvi, petulanducha unanzi va Njowo Nofu kwa vanu vangi.

Gegagehe

Muhe va Nguluvi ekuvaachila vachulila na vanu vevamdikie Kilisito vahongelika 1.1—8.1

Vanu vevamdikie Kilisito vigudwa na kulutala kwivala lya ku Yelusalemu 8.2—12.23

Paulo ivanga lugendo lwake lya kudalika Njowo Nofu 12.24—14.28

Ludamo litang'ana ukoya ku Yelusalemu kulamula kya kuvagita vanu vevamdikie Yesu vagenji 15.1-35

Lugendo lwa upili lya Paulo kudalika Njowo Nofu 15.36—18.22

Lugendo lwa udatu lwa Paulo kudalika Njowo Nofu 18.23—20.38

Kubatwa kwa Paulo ukoya ku Yelusalemu 21-26

Paulo isindikwa ukoya Loma 27-28.