Skip to content
BibleKenya

Bɛkwyel Bible

Tit 2

Bɛtɔa-bot, mengbaaz nɛ ekwom

Yɛ kabɛ wɔy ɔɔ, djɛa mɛlyo mɛ etsɛɛtsɛ di egoka nɛ ɛlyoaa ɛ. Bɛtɔa-bot goka ɛ́ nɛ ɛdi ɛ́, bot ɛ di ààbɛ bot ɛ elangi ɔ, bɛ goka ɛ́ nɛ ɛdi ɛ́, bot ɛ duu, bot ɛ etsoŋ, bot ɛ di bot ɛ epiki tɔ tɛtɛ ɛdum ɛ koŋ nɛ Zɛɛb ɔ, bot ɛ di nɛ kwyɛl ɔ, bot ɛ di nɛ ɛtela lyem ɔ.

Tyee wat, lɛɛa nɛ bɛtɔa-boa, bɛ goka nɛ ɛdi ɛ́ nɛ embɛɛ mɛfulu dáa bot ɛ edɛɛ. Sa bɛ ààdi bot ɛ ɛbyak ɛ bot, sa bɛ ààdi ekwom e mɛnyok, bɛ goka ɛ́ nɛ ɛdjɛ bot ɛ embɛɛ mɛlyo. Bɛ lyaal mɛsyes mɛ boa náá, bɛ kwyɛl botom bɔɔ nɛ bɔn bɔɔ. Bɛ di nɛ etsoŋ, sa bɛ ààdi tɔ embee mɛkwosak mɛ mɛnyel, bɛ sa mɛsa mɛ mendjaa mɛ mɛba mɔɔ ɛnyɔɛpe, bɛ di nɛ kwyɛl nɛ looba nɛ botom bɔɔ. Deenek, etɛɛ náá bot needi ààlóo embee mɛkpa dum nɛ Mɛkpa ɛ Zɛɛb.

Tyee wat, djɛa mɛghaaz nɛ mengbaaz, bɛ di nɛ etsoŋ. Tin, wɔy ɛmet goka ɛ́ nɛ ɛdi dhatyee geka tɔ enɛm esa é mis mɛ bot. Yɛ bɛ náá, wɔ ɛpelyo bot ɔɔ, lyoa bɛ nɛ lyem wat, mɛkpa mɛ di egoka ɛ. Saŋa náá, mɛkpa mɔ di dɛɛ, yii bot di ààsa mɛso nɛ yɛ ɛ, etɛɛ náá, bot ɛ mɛbhuka mɔ neegwyɛ nɛ sen, bɛ needi ààbɛ nɛ embee mɛkpa mɛ ɛlóo mena.

Yɛ kabɛ ekwom ɔɔ, bɛ goka ɛ́ nɛ ɛlooba nɛ ekukuma bɔɔ nɛ etɛp djas, bɛ saa náá, bɛ di bɛmbɛɛ bot é mis mɔɔ. Sa bɛ ààwa mɛso nɛ etɛp ekukuma bɔɔ di elii ɛ. Tin, sa bɛ ààsa djii, bɛ goka ɛ́ nɛ ɛlyaal náá, bɛ ɛ́ bɛmbɛɛ bot ɛ bot di egoka nɛ ɛwa ɛbwaalel ɔ, étɛp ɛdjɛ duu nɛ mɛlyo mɛ Zɛɛb mot di Mɛtsik-bot mena ɔ.

Bhwood ɛbula ɛ Yezu Klisto

Etɛɛ náá, Zɛɛb naatel enɛm nɛ embɛɛ bɛ, dáa ɛsuk ɛ tsik étɛp bot djas. Ye lyo mena ɛ́ náá, mena katka ɛsa embee mɛfulu, sa mena ààdu egwyes e esa e bɔs, étɛp mena needi tɔ mbɛɛ tsik kɔ ɛko ɛ bɔs'ak, tɔ etsoŋ, tɔ epiki nɛ esosoob nɛ Zɛɛb. Yɛ ɛ́ deenek ɛ́ mena aadi ebwood mbɛɛ dwoo tak nɛ ɛbwaalel. Dwoo lɛɛg, boo Zɛɛb'enaka, Yezu Klisto Mɛtsik-bot mena, nyɛ waatuula tɔ duma. Tin, nyɛ naazeka nyel'ɛ buwa kɔ ɛsu ɛ lena, étɛp ɛdis ɛ mena si bhel esyem, étɛp bot needi bot ɛ mbyak'ɛ ɛmet na dɛɛ, étɛp ɛwa lyem tɔ ɛsa embɛɛ esesɛɛ. Étɛp tak ɛ di náá, wɔ goka ɛ́ nɛ ɛlyo, étɛp ɛdjɛ mɛghaaz nɛ ɛdul ɛ bɛ mɛlɔ nɛ ghwyil djas. Tin, sa mot ààbyasal wɔ!

Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.