Skip to content
BibleKenya

Bɛkwyel Bible

2 Tesalonik 2

Sa aasael ɛsok nɛ Ghɛŋ nɛ ɛkum

Bɔn-nyɛɛg, Ghɛŋ'enaka Yezu Klisto moo aabula, tin, bot aadi ɛ́ sama nɛ nɛ. É di'enek, sa mɛ di ewaab nɛ nen náá: Nàbetka mot zɛzɛm bin elo, nɛghu ɛbɛɛg ɛ bin náá, ɛlu ɛ ɛzyɛ ɛ Ghɛŋ eezekum. Sa mot ààmyaal nyɛ, ye nakoozodi náá, mot lɛɛ bin ɛ́ náá, yɛ ɛ́ mɛkpa mɛ dus pɛ daa Zɛɛb nɛghu pɛ daa les ɔɔ. Sa bi ààbet náá, mot kɔɔ bin nɛ dhiiti mbi mɛkɔŋ. Etɛɛ náá, ɛlu ɛ tak aanàtuula ɛsok nɛ ɛwala ɛ bot ààbyen Zɛɛb ɛ, kum, yɛ aanàkwaatuula ɛsok nɛ Mbee mot, mot nawaaa é feŋ ɔ, kum. Yɛ ɛ́ nyɛy aapabyen esonok ee bot di eduwal, nɛ ɛbee náá, yɛ ɛ́ dɛɛ ɛ. Tin, nyɛ waake náá, nyɛ eedhaa esonok djas nɛ mɛbɔk, nyɛ aabatakɛni tɔ Ndjaa-ebuwa Zɛɛb étɛp ɛkɛdisi, é di'enek, nyɛ aasa tyee náá, nyɛy ɛ́ di Zɛɛb. Bi eedjisa, é sok mɛ nadi pɛ daa len ɛ, mɛ naabɛ ɛ́ aalɛɛ bin etɛp binek? Nenak yak bi nɛ gu sa di ela mbee mot'enɔk ze náá, nyɛ nàzyɛ ɛ. Nyɛ aazotuula ɛ́, é ɛwala ɛ Zɛɛb nazekoobal ɛ. Tin, ghwyil mɛbwala mɛ Mbee mot'enɔk di esael tɔ sɔ ɛ, yɛ ɛpesa mɛsa mɛ. É ghɛŋ sa di emɛt nyɛ aakadi ààbɛ tak ɛ, nyɛ aakasa embee mɛsa mɛ ɛ́ popoopwon. Deenek, Mot di ààlooba nɛ etsi ɔ, nyɛ waanyen, da Ghɛŋ Yezu ɛ́ gó nyɛ nɛ mengwyil mɛ nuub'ɛ, nyɛ waasaab nyɛ nɛ mɛkas mɛ ɛtuula ɛ lɛ. Mot yenɔk aatuula ɛ́ nɛ mɛbwala mɛ Satan. Nyɛ waasa bɛtɛ nɛ membi mɛ endem mɛbwala nɛ esa e ɛdjoka, yii etsal. Nyɛ waasa membi mɛ esa djas di biyo ɛ, étɛp ɛkɔɔ bot ɛ di ewo ze ɔ. Tin, bɛ waagwyɛ, etɛɛ náá, bɛ nabɛ ɛ́ ààmyaal ɛkwyɛl etsɛɛtsɛ ee nawaatsik bɛ ɛ. Yɛ ɛ́ étɛp tak ɛ Zɛɛb di edhis bɛ ghwyil ɛwo, étɛp bɛ neemyaal etɛp e mɛkɔŋ. Deenek, bot djas di ààdum koŋ nɛ etsɛɛtsɛ e Zɛɛb ɔ, da bɛ ɛ́ di emyaala tɔ ɛsa ɛbiyo ɔ, bɛ waadjɛaa epɛ́ɛ e ndjɛ sɔs.

Zɛɛb naasɛ́ɛ bin étɛp bi neebela tsik

Bɔn-nyɛɛg bam, yɛ kabɛ bisɔ ɔɔ, bis goka ɛ́ nɛ ɛbulal bhɔɔ nɛ Zɛɛb mɛlu djas kɔ ɛsu ɛ len, biyɔ bot ɛ Ghɛŋ di ekwyɛl ɔ. Etɛɛ náá, Zɛɛb nasɛ́ɛ bin bot ɛ mɛkɛn, étɛp bi neebela tsik kɔ ɛsu ɛ Sisim na Dɛɛ. Sisim tak ɛ́ di esa náá, bi di nɛ tsik na dɛɛ, dum nɛ ɛdum ɛ koŋ ɛ len nɛ etsɛɛtsɛ e Zɛɛb. Yɛ ɛ́ etɛp tak ɛ Zɛɛb nadjóo bin, é ze Mbɛɛ Bhaadal bis nagoola bin ɛ. Tin, nyɛ nakwyɛl ɛ́ náá, bi bela di tɔ duma Ghɛŋ'enaka Yezu Klisto. Deenek, bɔn-nyɛɛg, pyetka, baalka mɛlyo mɛ bis nalyo bin nɛ mɛkpa mɛ enuub bis ɛ, nɛ yii bis nakwyal-kwyalak ɛ.

Betka náá, Ghɛŋ'enaka Yezu Klisto nyɛy ɛmet bɛ nɛ Zɛɛb Sɛɛg'enaka mot nakwyɛl mena ɔ, nyɛy mot nadjɛ mena mɛghaaz mɛ na kɔm-kɔm nɛ tɛtɛ ɛbwaalel tɔ enɛm nɛ embɛɛ ɔ, nyɛ lwoodal ebhum elyem bin nɛ mɛghaaz, nyɛ djɛ bin ghwyil ɛsa esa e mɛnyɔ tɔ mɛfulu men, nɛ tɔ mɛkpa mɛ bi di elóo ɛ.

Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.