Skip to content
BibleKenya

Bɛkwyel Bible

2 Zaŋ 1

Mɛswosel

Yɛ ɛ́ mam «Paa», mɛ kwyal mɛkana mak ɛ́ étɛp «Moma» Zɛɛb nazesɛ́ɛ ɔ, bɛ nɛ bɔn bɛ mɛ di ekwyɛl nɛ tsɛɛtsɛ ɔ. Ye tok mam nɛ mam di ekwyɛl bin, yɛ ɛ́ dɔɔ nɛ bot djas di egu etsɛɛtsɛ ɔ. Bis kwyɛl bin ɛ́, etɛɛ náá, etsɛɛtsɛ ɛ́ tɔ lena, yɛ aadi tɔ lena ɛ́ kɔm-kɔm.

Beta náá, Zɛɛb Sɛɛg'enaka bɛ nɛ Yezu Klisto Mɔn, djɛ mena enɛm nɛ embɛɛ, nɛ boo lyem ghoŋ, nɛ egwyem etɛɛ náá, mena neekɛka tɔ tsik e etsɛɛtsɛ nɛ kwyɛl.

Etsɛɛtsɛ nɛ kwyɛl

Mɛ naadyeebamyaala nɛ ɛgwak náá, bɛdhiiti bɔn bɔ ɛpekɛ tɔ etsɛɛtsɛ dáa Zɛɛb Sɛɛg nalwom mena náá, mena sa ɛ. Nenak yak, gwaka sa mɛ di elɛɛ nɛ nɔ ɛ, wɔy moma: djhookwyɛlaka pak'enaka. Sa mɛ di ekwyal wɔ wak'aak tok ɛtiŋ ɛ na bes, yɛ ɛ́ yii mena nadjɛaa é mɛkɛn ɛ. Deenek, kwyɛl ɛ́, é sok bi di ekɛ tɔ ɛlooba nɛ mɛtiŋ mɛ Zɛɛb ɛ. Beeka ɛtiŋ ɛ nadjɛaa bin é mɛkɛn ɛ, yɛ ɛ́ náá, bi di tɔ kwyɛl.

Tin, mɛ lɛɛ bin etɛp bak ɛ́, etɛɛ náá, bot ɛ mɛkɔŋ moo ɛ́ ɛbuɛpe kɔ bɔs. Bɛ ààkwyɛl ɛmyaal náá, Yezu Klisto nabatazyɛ kɔ bɔs'ak ɛ́ nɛ nyel epuud. Yɛ ɛ́ deenek ɛ́, mena aaguka bot ɛ mɛkɔŋ nɛ bot ɛ swaka ɛ Klisto. Bi ɛ́ kobaka, ekaab náá, bi ɛzɛkɛpul mɛsa mɛ bis nasa, étɛp bi neebela bɛtɛ nɛ efute ɛ.

Mot ɛ di ààkɛ tyee mɛlyo ɛ Klisto di elɛɛ, da nyɛ ɛ́ kɛ tyee sis nɛ yii Klisto nalyo ɔɔ, mot'enɔk tok tɔ ɛgwakel bɛ nɛ Zɛɛb. Tin, mot ɛ di ekɛ tyee mɛlyo ɛ Klisto di elɛɛ ɔɔ, mot'enɔk ɛ́ tɔ egwakel bɛ nɛ Zɛɛb Sɛɛg nɛ Mɔn'ɛ. Tin, mot ɛ zyɛ zɛbee bin, ààbɛ náá, nyɛ zyɛ bin ɛ́ nɛ mɛlyo mak ɔɔ, sa bi ààmyaal nyɛ pɛ yebɔ, sa bi ààkoswos nyɛ swosak. É di'enek, mot aaswos nyɛ ɔɔ, bɛ nɛ nɛ moo ɛ́ bot ɛ boob wat tɔ embee mɛsa.

Mɛlyo mɛ mɛsik

Mɛ aabaadi ɛ́ nɛ bɛtɛ nɛ etɛp ɛlɛɛ bin, tin, mɛ ààpakwyɛl náá mɛ kwyal yɛ kɔ ka mɛkana nɛ mɛdii mɛ kwos. Tin, ɛkwosak ɛ lam ɛ́ náá, mɛ zyɛ pɛ daa len, étɛp mɛ neezɛlii nɛ nen mam ɛmet. Etɛɛ náá, mɛmyaala mena needi ɛnyɔɛpe.

Bɔn ɛ mɔn-nyoog yii Zɛɛb nazesɛ́ɛ ɔ, bɛ eeswos wɔ.

Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.