Bɛkwyel Bible
1 Koolɛt 2
Pɔl naagoola bhaadal ɛsyee ɛ Klisto kɔ mɛlaaba
Bɔn-nyɛɛg, é ghɛŋ mɛ nazyɛ pɛ daa len, zɛlɛɛ bin esa e Zɛɛb nadi tɔ sɔ ɛ, mɛ ààpalii nɛ nen tɔ mɛkpa di ekɔɔla ɛ, ààbɛ-bɛak nɛ mɛkpa mɛ di elyaal ɛgu ɛ lam ɛ. Etɛɛ náá, ye nabɛ ɛ́ mɛ eezeke náá, tɔ bim mɛlu mɛ mena aadika sama ɛ, mɛ aanàsaa ɛgu ɛ dhiiti sonok bhii Yezu Klisto, bhis ɛsyee ɛ Yezu Klisto é mɛlaaba. Dum nɛ tɛp tak ɛ́ mɛ zyɛ pɛ daa len, nɛ mɛsila djas epwak nɛ bwoo. Deenek, mɛkpa mam nɛ mɛlyo mam nabɛ ɛ́ ààbɛ etsoŋ e bot ɛ bɔs, ye nabɛ ɛ́ mɛbwala mɛ Sisim na Dɛɛ nadi elyaal popoopwon tɔ esa ee mɛ nadi elii ɛ. É di'enek, ɛdum ɛ koŋ ɛ len nɛ Zɛɛb tok kɔ etsoŋ e bot ɛ bɔs, yɛ ɛ́ tɔ mɛbwala ɛ Zɛɛb.
Etsoŋ e Zɛɛb
Mɛ nɛ lyo mɛsa mɛ etsoŋ nɛ ekeletyɛ di náá, bɛ eezewoozal tɔ ɛdum ɛ koŋ nɛ Zɛɛb ɔ. Ààkabɛ etsoŋ e bɔs'ak, ààkobɛ-bɛak yii bɛghɛŋ ɛ di ekɔk kɔ bɔs'ak ɔ, ye di náá, yɛ aadiib ɛ. Ààbɛ, mɛ goola wak ɛ́ etsoŋ e Zɛɛb nadi syela ɛ, yii bot nadi ààgu ɛ. Zɛɛb naazekoobal etsoŋ e tak ɛsok nɛ bhwak nɛ kusel, étɛp mena needika tɔ duma yɛ. Ye tok nɛ dhiiti bɛghɛŋ di ekɔk kɔ bɔs'ak di egu etsoŋ binek ɔ. Tin, bɛ ɛpedi egu yɛ ɔɔ, pe bɛ nabɛ ɛ́ ààbem Ghɛŋ, mot di nɛ duma ɔ, é mɛlaaba. Tin, dáa Ekwyala di elɛɛ ɛ́:
«Sa di náá, mot dinaa ààpabee,
ààkogwak-gwakak ɛ,
sa di náá, mot dinaa ààpasimza ɛ,
Zɛɛb nakoobal yɛ ɛ́ étɛp bot ɛ di ekwyɛl nyɛ ɔ1.»
Ghuna, yɛ ɛ́ nɛ bisɔ ɛ, sa Zɛɛb nazelyaal é ze Sisim ɛ. Tin, Sisim na Dɛɛ ɛ́ nɛ ghwyil ɛsaŋ ɛgu ɛ mɛpek mɛ Zɛɛb djas, dɔɔ nɛ yii di tɔ sɔ ɛ. Yɛ kabɛ mot ɔɔ, ɛzɛ di egu egeka e lyem mot, yɛ di ààbɛ sisim mot nyɛy nyɛ ɛmet ɔɔ. Yɛ ɛ́ tyee wat nɛ Zɛɛb, ɛzɛ di egu egeka e Zɛɛb, yɛ di ààbɛ Sisim Zɛɛb nyɛy nyɛ ɛmet ɔɔ. É di'enek, mena nabɛ ɛ́ ààbelaka sisim bot ɛ bɔs. Tin, mena nabelaka ɛ́ Sisim di edus pɛ daa Zɛɛb ɛ, etɛɛ náá, mena neegu mɛkɛɛ mɛ Zɛɛb nazedjɛ mena yii toto ɛ. Tin, mena ààlyoka bot nɛ etsoŋ e bot ɛ bɔs, mena lyoka bot ɛ́ nɛ etsoŋ ee Sisim Zɛɛb di elyaal mena ɛ. Yɛ ɛ́ deenek ɛ́ mena di ekaada etsɛɛtsɛ e Sisim nɛ bot ɛ di nɛ Sisim tak ɔ. Tin, mot di ebun mɛtselal mɛ ɔ, nyɛ tok nɛ ghwyil ɛmyaal etsɛɛtsɛ ee Sisim Zɛɛb di elyaal ɛ. É di'enek, etsɛɛtsɛ e Sisim Zɛɛb ɛ́ pɛ daa yenɔk mot ɛ́, dhatyee mɛlyet. Nyɛ aanàbela etsoŋ ɛtiibal ɛ yɛ, etɛɛ náá, yɛ ɛ́ nɛ Sisim Zɛɛb ɛ mot di nɛ ghwyil ɛtiibal etɛp e Zɛɛb. Tin, mot di nɛ Sisim Zɛɛb ɔ, nyɛ ɛ́ nɛ ghwyil ɛtiibal etɛp djas, saabɛgɔs kadi ɛ́, mot tok nɛ ghwyil ɛtiibal nyɛ. Tin, Ekwyala lɛɛ ɛ́ náá:
«Ɛzɛ di egu esiiza e Ghɛŋ?
Ɛzɛ di nɛ ghwyil ɛdjɛ nyɛ mɛlyo2?»
Tin, menabɛlka, menaka ɛ́ nɛ esimza e Klisto.
Source notes (2)
- Cross-reference * Eza 52.15; 64.3
- Cross-reference * Eza 40.13
Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.