Skip to content
BibleKenya

Bella

Mattaay 3

Yuuhanna umoosana usalal isoomiir

Baliit tiyinaateeb Yuuhanna umoosana eeyaayt, Yahuudaay umingaayiib allamiya. Baruuh “Tuubaana, tibreeteet hadꞌaayi dawiltu.” iid. Yuuhanna unabi Isyaas haay hadiidaab iiktiyeebu, baruuh:

“Umingaayiib waliikiini hiss gaal eefi,

‘Wꞌankwanaay dehaay salal soomirna, tilagi fadhadht kwaasna.’ diyaabu.” idi.

Yuuhanna kaami hamooyee shagaamama halaka ikwi, habaab ilbab, aree yaaweetwa awitwa tamiya. Uudehay Alguduseewwa, kastooh Yahuudaaywa, kassooh Wꞌurduni haashiiwwa barooh beeti iibiin. Uudehay idanuubeehna ifidhadhna, aree Urduni bhariib barooh itoomaasna.

Laakiin baruuh gwida Fariisiiwwa Sadduukiiwwa baruuh iimseeb oomhiin yꞌee rhiyanihoob, bareeyooh dehaay, “Yaa ikwakwaraayi ar, bareek beeti sakeen igadabee eedhab aaw sooya hookna? Tuubaana firaay lawsaana! Aree igarooyeekna dehaay, ‘Ibraahiim baaboon akay nibari.’ tiyadneeb baahiisaana. Oosdik andi hookna, Ukwaasana een yꞌaweeyee Ibraahiimi dehaay ar yakisitiib adgiriini. Uufaas whindi gadami kehii suur akay daasamiya. Whindi daayiit samara baafariibka, katꞌamiit nꞌeetiib ituugid indi.

Ani tuubteeni jillaay yamee anmiis hookna. Laakiin anii harꞌii aniika akrakaab yꞌi indi. Ani barooh tigidhꞌaateeh atfayiikee dehaay han kaꞌadgiran. Baruuh Eeshuuk Imugaddasaayeewwa nꞌeetiiwwa iimis hookna indi. Uun baruuh girbaalooh yaksaabu, wharru daayiib isinhis indi. Igamhooh ugeesaay daasi indi, wꞌagga aree baayaayt nꞌeetii iiliw indi.” idi.

Yasuuꞌa itoomiis

Aflaay Yasuuꞌa Yuuhannaab itoomiisi jillaay Jaliilee Urdun beeti eeya. Laakiin Yuuhanna barooh bhaliisamiya, “Ani barook atoomiiseet toona aharriiw, baruuk aree anii dehaay eetniya?” idi.

Yasuuꞌa “Aflaay oontꞌa bak batiikti. Bak aree kastooh Ukwaasana yharriiweet toona niiwari.” idi. Yuuhanna han agbiliya.

Yasuuꞌa itoomaasihoob, willa iyamee asti yakiya. Been oodoor taabri ifdagna, aree Ukwaasanaay Eeshuuk kwibheeriitiit hayꞌaatii tikweewwa bariiyooh kehii talaweewwa rhiya. Malya hiss tibireetee, “Uun baruuh wꞌooru ani areeyaniyeebu, barooh ani winneet geeb afirhaabu.” idi.

Bella. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.