Skip to content
BibleKenya

Bella

1 Tiimooti 4

Tiimootiib imitiya

Aashuuk “Harꞌook yꞌeen idamaneeb gwadi wꞌiimaan ishti dꞌiit toolana shuuk eetriimna, aree aajin allameeneet teena eetriimna.” winneet diyaaba. Taan taana gwisri harayꞌaree ikatiin. Baraah igirma kiibariin. Baraah oodehay eedꞌar yheebna, aree timꞌari itamisiti yheebna. Laakiin Ukwaasana yꞌaamaneen oosdik ikteen baliib, teen timꞌariya hamidtiit tameeneet toona sooyaabi. Ukwaasana dꞌiyaab ikatiyeet taana kastaah daayiita. Hamidtiit tittiyeewiina aree raab kitbari. Tuun batuuh Ukwaasanaay ibhaliyeewwa siileeltiiwwa agbilamaat tikati.

Teen teena isanaayeek sootiniyeek, daayi shagaamana Umasiih Yasuuꞌiib iikti tindiya. Usidki iimaaniib tiwina, tudaayiinaayti tꞌaliim tirameet toona daayiib rhista. Laakiin baliib igwisri kifuuri mitaal hooy sigiya. Ugarooyook Ukwaasanaay usalal sꞌabika. Ugarooyt turiyaada takweet gaat tibari, laakiin Ukwaasanaay usalali abuuk kasteeh tinaateeb takweet ibari. Uun baruuh, oontꞌaani umidhhanwa, harꞌook yꞌiiniib umidhhanwa mhalleeh waadiyaab iniiw.

Uun uumiyaad winneet sidiku, aree daayi agbiltiib astehaliini. Toon tunaati sabbii aree shagaamnay aree winneet nhariw. Isꞌayaayoon Ukwaasana udhhaniinaay daasaaba, baruuh oodehay kasseeh Wꞌishidhhiinu, barooh aamaneen waaseetiit ishidhhiin.

Teen teena sooyaat allamaa. Baruuk adhamiib tikatiyi sabbii gaal han baaꞌattallaasa. Laakiin yꞌaamanana ibhaliyeebwa, umidhhaniibwa, ureeriibwa, wꞌiimaaniibwa, tinhisuuytiibwa baruuk misaal dehaay akaa. Ani yꞌaniyeeb ookiik baruuk oodehayii dehaay ooktaab agriitinyi jillaay maraa, oodehayi ibhaliisamtiiwwa wꞌallamtiiwwa dehaay maraa. Umiyaawook ishti baadꞌiya, oomiyaaw inabiyaayeet diigwattii attiyeewiyaab, isuurkinaayi majlis yꞌayeehna kehook daasiyaanihoob, attiyeewiyaab, ishti baadꞌiya.

Teen tinaateeb fagaramaa! Ugarooyook kassooh bateeh hiiyyaa! Aflaay uudehay kassaah ishagaayook idaayiib rhi iyadna. Ugarooyook gwꞌadaa, wꞌallamtiyook han gwꞌadaa. Teen teena dibiyaa, teen saktiniyeek aree ugarooyookwa oodehay barook isnaakiirwa kasseeh tishidhhiina.

Bella. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.