Skip to content
BibleKenya

Bella

1 Koorinteeb 8

Isanamaayee dehaay mꞌariiti mhalti

Oontꞌa timꞌari isanamaayee dehaay titfarꞌi: Kassaan kanaant nibariyeet toona nikteen, takweet tiniiwt kanaant aree tikati. Laakiin uureer asti itidꞌiir. Uutak naat ikteen hiisiiniib, baruuh masi toona iikan iideet kiikan. Laakiin uutak Ukwaasana areeyiiniib, Ukwaasana barooh ikteen.

Aflaay malya, isanamaayee dehaay farꞌat timꞌariiti itamti: tuduniyaatiib usanam naat biikaayeet toona nikteen, Ukwaasana Oongaal nuun weer kiihaay. Masi aree kwaasanaab ittiyoodiin tubuutiib tari tibreeteeb eefeeneek han, gwida kwaasanaawwa ankwanaawwa eefeeneek han, masi Ukwaasana Uungaal eefi, Ubaaba, naatka bariisooh yꞌaatu, hinin han bariiyooh nikweer. Gaal Ankwana aree eefi baruuh Yasuuꞌaab Umasiihu, naatka bariisooh yꞌaatu, bariisooh aree hinin nikweer.

Laakiin kassaah uudehay toon toona kiikanna. Uudehay gwadi masi isanama limdaaba, beet timꞌari tameenihoob aree batuuh sanamii dehaay farꞌat hiiseen. Baraah iginꞌaayaahna nꞌakw ikatiini sabbii yiwaashiiba. Laakiin timꞌari Ukwaasanaay dar kitkwaas hoon, timꞌari bintamayeek amagkaab kinꞌaki, tamnayeek han hayiskaab kinꞌaki.

Laakiin tifadagooytuukna imiskiinaayee dehaay goofiit bitꞌakaay digwagwna. Uutak uginꞌuuh nꞌakw ikatiyeeb rhiiniyuuk, baruuh aree isanamaayeet mꞌariiti tamtiit kanaant ibariib, baruuh isanamaayee dehaay farꞌat timꞌariiti itamti kiihariw han? Aflaay uun uusan umiskiin Umasiih bariiyooh jillaay ayaab ikatiyeeb, bareetookna tikanaantii kwidhiini. Oontꞌaaneet isanaayeekna kehii amaagna tidꞌanihoob, bareeyeehna iginꞌa eenꞌakw tigalꞌaneek, Umasiihi kehii amaagna sakteena. Shaawti ani tamaniyeet tuuna usanu maagtiib dhibistiib tikwasiyeek, toosha door han tami kaadi, aflaay barooh dhibsiini sabab iikti kaadi.

Bella. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.