Soloumane ea Gesami 2

1Na da soge ale ifa mosoi Sia:lane sogega bugi agoai.

Amola na da ‘lili’ mosoi goumi fago ganodini aligi agoai.” Dunu da amane sia:sa,

2“Na dogolegei! Di da uda gilisisu amo ganodini, ‘lili’ mosoi noga:iwane,

aya: gaga:nomei gigisi ganodini agoai ba:sa.” Uda da amane sia:sa,

3“Na dogolegei da dunu eno gilisi amoga ‘a:bele’ ifa noga:i

amo iwilaga aligi ifa ganodini bugi agoai ba:sa.

Na da ea baba ganodini fimusa: hanai gala.

Amola ea fage legei da nama hedaidafa gala.

4E da na ea lolo nabe diasuga oule misi.

Amola e da ea gosagisu abula amo na

dedeboma:ne, hiougili gadoi.

Ea gosagisu da sasagesu hou.

5Na da bu gasa lama:ne, hafoga:i waini fage

nama ima. Na bu obeagima:ne,

‘a:bele’ fage nama ima.

Na da sasagesu hou ha:giwane

hamobeba:le, gasa hamedei gala.

6Ea fofadi lobo da na dialumaha diala,

amola ea lobodafa da na sogoba:le

nonogosa.

7Yelusaleme uda, dilia! Hehenasu ‘dia’

gebo amola ‘gasele dia’ gebo

ilia houba:le, sia: dafawaneyale ilegema.

Ania sasagesu gilisili fibi hou mae

hedofama:ne sia:ma!”

Gesami Ageyadu

Uda da amane sia:i,

8“Na da na sasagesu dunu ea sia:be naba.

E da goumi da:iya giadofale hehenaiya manebe.

E da agolo da:iya giadofale nama manebe.

9Na sasagesu dunu da ‘gasele’ dia agoai ba:sa.

E da waha debe ‘dia’ gawali agoai gala.

E da dobea fei bega: aligisa.

E da fo logo agei gelabodiliaga ba:sa.

E da ifa gigiadomai gelabodiliaga ba:sa.

10Na sasagesu dunu da nama sia:sa.” Dunu da amane sia:i,

“Na dogolei! Misa! Ani ahoa:di!

11Anegagi oubi da yolei. Gibu amola da yolei.

12Sogega mosoi da falegai dagoi. Wali da gesami hea:su esoha.

Moifufui amoga ‘dafe’ sio da gesami hea:lala.

13Figi fage da muni yosa. Efe mosoi da falegabeba:le, hisi da gabusiga: agoai naba.

Na dogolegei! Misa! Ani ahoa:di!

14Di da ‘dafe’ sio amo da igi bagade gouda:i gala:i adobo

amo ganodini wamoaligisa agoane ba:sa.

Dia odagi noga:idafa, na da ba:ma:ma. Dia sia: noga:idafa na da nabima:ma.

15Fogisi wa:me da waini sagai sogea heda:i amo wadela:lesisa:besa:le, ili seba:ma.” Uda da amane sia:i,

16“Na sasagesu dunu da na:. Amola na da ea:.

E da ea sibi wa:i amo ‘lili’ bugiga ha:i manu ianeawane,

17hahabe fo da fulabosea amola gasi da alalolesi ba:sea fawane yolesisa.

Na dogolegei! Buhagima! ‘Gasele dia’ ohe agoane amola ‘dia’ gawali

amo da Bidia goumi alelaloi amoga esala agoane, buhagima.