Gesami Hea:su 92

Nodone Gesami Hea:su

1Hina Gode Baligili Gadodafa, Dima nodone sia:mu

amola Dima nodone gesami hea:mu da defeadafa.

2Dia mae fisili asigidafa amo eso huluane hahabe sia:nanumu da defea,

amola Dia didili hamosu hou amo gasia huluane sia:nanumu da defea.

3Sani baidama amola baidamadafa,

amoga dusa, Dima nodonanumu da defea.

4Hina Gode, Dia baligili bagadedafa hamobe hou amoga na da nodosa,

amola Dia hahamoi liligi amo ba:beba:le, na da nodone gesami hea:sa.

5Hina Gode, Dia hahamobe liligi da bagadedafa!

Dia dawa:su da oso dogoidafa gala!

6Goe hou da gagaoui dunu,

amo ea da dawa:mu gogolei,

7Wadela:i hamosu dunu da wadela:i gisi agoane heda:mu,

amola giadofale hamosu dunu ilia da liligi bagade gagui dialebe ba:mu,

be amomane ilia da bagadedafa gugunufinisi ba:mu.

8Bai Hina Gode da Gadodafa

amola Fifi Ahoanusudafa.

9Ninia dawa:, Dima ha lai dunu ilia da bogogia:mu,

amola wadela:i hou hamosu dunu da hasalasi dagoi ba:mu.

10Di da bulamagau sigua amo ea gasa defele nama gasa i,

amola Di da hahawane dogolegele hou nama hamoiba:le,

na da hahawane bagade.

11Na da nama ha lai ilima hasalasibi amo ba:i

amola wadela:i hou hamosu dunu ilia didigia:be amo nabi.

12Molole hamosu dunu ilia da gumudi dulu waha faselale salabe agoai ba:mu.

Ilia da Lebanone soge ganodini dolo ifa heda:be agoai ba:mu.

13-14Ilia da ninia Hina Gode Ea Debolo diasu ganodini

bugi ifaga osomo falegabe agoai,

amo da yalo idalo hamone,

gebewane lubi dialuli fage legelalebe,

gasa bagade ifa agoai ba:mu.

15Amoga ninia ba:sea da Hina Gode da moloidafa olelesa.

E da na Gaga:su gala.

Amola Ea hou amo ganodini, giadofale hamobe hamedafa ba:sa.