Gesami Hea:su 79

Isala:ili Fi Gaga:ma:ne Sia:ne Gadosu

11

Gode! Dia sia: hame dawa:su dunu ilia Dia soge doagala:musa: golili sa:i.

Ilia Dia Hadigi Debolo diasu amo wadela:lesili nigima: fili dagoi.

Amola ilia da Yelusaleme gugunufinisili, yolesi.

2Ilia Dia fi dunu ilia bogoi da:i hodo amo sia sioga moma:ne, yolesi.

Amola Dia hawa: hamosu dunu ilia bogoi da:i hodo

amo sigua ohe fi ilia moma:ne, yolesi.

3Ilia Dia dunu ilia maga:me amo hano agoane soga:digima:ne hamosu,

amola maga:me da hano agoane Yelusaleme ganodini aiasi.

Amalalu dunu afae da amo bogogia:i dunu uli dogonesisimu hamedafa ba:i.

4Nini beba:le fifi lai ilia da ninima gadele sia:daha,

amola ilia da niniba:le oufesega:sa,

amola ninima higale ba:sa.

5Hina Gode, Di da ninima mae yolele gebewane ougi dialoma:bela:?

Dia ougi hou amo da lalu agoane mae yolele nenanoma:bela:?

6Di da delegili gale, Dia ougi hou amo fifi asi gala Dima hame nodone sia:be

amola Dima hame sia:ne gadobe dunu, amo ilima ima.

7Bai ilia da Dia fi dunu fane lelegei

amola ilia da Dia soge amo wadela:le gugunufinisi dagoi.

8Ninia aowalali ilia wadela:i hou hamoi amoga ninima se dabe mae ima.

Ninima waha asigima.

Ninia dafawane hamoma:beyale dawa:su da fisi dagoi.

9Gode! Nini fidima, amola nini gaga:ma.

Dunu da Dima nodone dawa:ma:ne,

ninia wadela:i hou hamoi amo Dia gogolema:ne olofoma.

10Abuliba:le fifi asi gala da ninima agoane adole ba:ma:bela:?

“Dilia Gode da habila:?” Fifi asi gala dunu ilia da Dia hawa: hamosu dunu

fane legeiba:le, ninia ba:ma:ne, Dia ilima se dabe ima.

11Se iasu diasu sali dunu ilia gayasu amo nabima!

Ilia da se imunusa: fofada:i dagoi.

Be Dia gasa bagade hou amoga ilia se iasu diasu logo doasima.

12Hina Gode! Fifi asi gala eno da Dima bagadewane gadele sia:su.

Di ilima fesuale agoane se dabe ima.

13Amasea, Dia fi dunu, (ninia da dia sibi wa:i fi) da Dima mae yolele

fa:no misunu eso huluane amoga nodonanumu.