Gesami Hea:su 65

Nodosu amola Nodone Iasu

1Gode! Ninia da Saione Moilai Bai Bagade amo ganodini Dima nodone sia:mu

amola Dima ilegele sia:i liligi dafawane hamomu da defea.

2-3Bai Di da ninia sia:ne gadosu amoma dabe adole iaha.

Dunu fifi asi huluane da ilia wadela:i hou dawa:beba:le,

Dima sisane fofada:musa: misunu.

Ninia giadofasu da nini hasalasa.

Be Di da ninima gogolema:ne olofosu iaha.

4Nowa dunu amo Dia ilegele lale,

Dia Hadigi Sogebi amo ganodini esaloma:ne oule maha,

amo dunu da hahawane bagade gala.

Ninia da Dia sema Debolo Diasu hahawane dogolegele liligi lai dagoiba:le,

denesi ba:mu.

5Di da ninia sia:ne gadosu amoma dabe adole iasisia,

ninia da ninima ha lai dunu ilima hasalasa.

Amola Di da ninima gaga:ma:ne, hou noga:idafa hamosa.

Dunu osobo bagadega fifi asi gala dialebe

amola hano wayabo bagade la:idi fifi asi dialebe,

huluane da Dima dafawaneyale dawa:sa

6Di da Dia gasa bagade hou amo olema:ne,

Di goumi alelaloi amo ilia sogebi amogai bugisisu.

7Di da hano wayabo bagade ea gobe

amola hano gafulubi bagade amo ouiya:lesisa.

Amola fifi asi gala dunu ilia gugulubi amo ouiya:lesisa.

8Osobo bagade fifi asi gala huluanedafa da Dia hahamoi liligi ba:beba:le,

fofogadigili aligisa. Osobo bagade fifi asi gala huluane,

la:idi bega: asili la:idi bega:, da Dia hahamoi amo ba:le, nodone wele sia:sa.

9Di da osobo bagade soge amoma gagagulasu hou olelema:ne, gibu iaha.

Di da soge noga:le nasegagima:ne hamosa.

Di da hano logo amo hanoga nabalesisa.

Di da osobo amo hulu ha:i nasu bugili iasisa.

10Di da agoane hamosa.

Di da gibu bagadedafa amo osobo gidinaiga soga:sisa.

Amola ilia da nanegai dagoi ba:sa.

Di da osobo dasama:ne, sasafi gilisisa.

Amasea, ha:i manu waha heda:be, amo noga:le heda:sa.

11Dia hou noga:idafa da gamisu bagadedafa ninima iaha.

Di da habi ahoasea, amogai da ha:i manu osea:idafa ba:mu.

12Ohe fofole nasu soge huluane da ohe wa:i amoga nabai gala.

Agolo la:idi soge amoga hahawane hou da nabai.

13Ohe fofole nasu soge da sibi amoga dedeboi dagoi.

Fago da widi sagaiga nabai.

Liligi huluanedafa da hahawaneba:le, ha:gi wele sia:sa amola gesami hea:lala.