Gesami Hea:su 61

Gaga:ma:ne Sia:ne Gadosu

1Gode! Na Dima diniyabe amo nabima!

Amola na Dima sia:ne gadobe nabima!

2Na da heawi amola fofagiba:le,

na fifi lasu badiliadafa amogainini Dima wele sia:sa!

Di da na wamoaligisu sogebi amoga oule masa.

3Bai Di da nama ha lai dunu, ilia na hasalasisa:besa:le

gasa bagade gaga:sudafa gala.

4Na esalabea gowane Dia Hadigi Sogebi ganodini esaloma:ma.

Amola na da Dia ougiaha amo ganodini gaga:su ba:ma:ma.

5Gode! Di da na sia: ilegebe amo nabi dagoi.

Amola Dia da Dima nodone sia:be ili iabe, amo nama i dagoi.

6Osobo bagade hina da mae bogole gebewane esaloma:ma!

Amola e da esaloma:ne ea ode ga gasigagama!

7Gode! E da Dia midadi aligili, ea fi mae fisili eso huluane ouligilaloma:ma.

Dia mae fisili asigidafa hou, amoga Dia e gaga:ma.

8Amaiba:le na da Dima hahabe asili daeya huluane imunusa: ilegei amo iaha,

na da eso huluane Dima nodone gesami hea:lumu.