Gesami Hea:su 53

Osobo Bagade Dunu ilia Wadela:i Hou

11

Gagaoui dunu da ilisu amane sia:sa, “Gode da hamedafa esala.”

Ilia huluane da wadela:i hou hamoi dagoi.

Dunu afae hou moloidafa hamosu, amo da hame ba:su.

2Hina Gode da Ea Hebene esalebe amoga osobo bagade dunu ba:lala.

E da bagade dawa:su dunu Ema nodosu hamosu dunu hogosa.

3Be hame ba:sa.

Ilia huluane giadofai dagoi.

Ilia da huluane defele wadela:idafa.

Dafawane! Dunu afae da hou moloi hamedafa hamosa.

4Hina Gode da amane adole ba:sa, “Ilia da hame dawa:bela:?

Amo wadela:i hamosu dunu huluane da hame dawa:su dunula:?

Ilia da hawa: hamosu hame hamosa.

Be Na fi dunu ilima wamolasu fawane hamosa.

Amola, ilia da Nama hame sia:ne gadosa.”

5Be amomane ilia da baligili beda:i bagade ba:mu.

Bai Gode da Ea fima ha lai dunu ilia gasa amo afagogolesimu.

Hina Gode da wadela:i dunu higale, ili huluane fisiagai dagoi.

Amaiba:le, Isala:ili fi da ili dafawane hasalasimu.

6Na sia:ne gadosu da agoane.

Hina Gode da Saione Goumi amoga

Isala:ili fi ilima hasalasu hou imunu da defea.

Amasea, Hina Gode da Isala:ili fi dunu ilima gagui hou bagade bu iasea,

ilia da hahawane bagade ba:mu.