GODE EA SIA: IDA:IWANE GALA
Gesami Hea:su 43
Mugululi Asi Dunu ea Sia:ne Gadosu
(Gesami Hea:su 42 amoga alolofela asi)
Gode! Na da moloidafa dunu, amo Di sia:ma!
Ogogole amola wadela:i hamosu dunu da nama diwaneya udidisa.
Be Dia na gaga:ma.
Di da na gaga:su! Be Dia da abuliba:le na yolesila:?
Na da abuliba:le nama ha lai dunu ilia nimi bagade wadela:i hamobeba:le
se nabawane esaloma:bela:?
Dia dafawanedafa hou amola hadigi hou amoga
Dia na oule ahoanoma:ne iasima!
Dia na Dia sema agolo Saione amola Dia Debolo Diasu
(amo ganodini Di da esala), amoga na bu oule misa!
Amasea, Gode, na da Dia oloda amoga masunu.
Bai Di fawane da na hahawane hou, amo ea bai gala.
Gode, na Gode!
Na da na sani baidama dumu amola Dima nodone gesami hea:mu.
Na da abuliba:le baligili da:i diobela:?
Na da abuliba:le dogo se nabawane esalala:?
Na da Godema dafawane hamoma:beyale dawa:mu.
Na da bu enowane Ema nodone sia:mu.
Bai E da na Gaga:sudafa amola na Godedafa.
GODE EA SIA: IDA:IWANE GALA. Copyright © 2000 Tom Hoey. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.