GODE EA SIA: IDA:IWANE GALA
Gesami Hea:su 147
Gode Bagadedafa Ema Nodosa
Hina Godema nodoma! Ninia Godema nodone gesami hea:mu da defea!
Ema nodomu da noga:idafa amola moloidafa.
Hina Gode da Yelusaleme ea hou bu hahamonana.
E da mugululi asi dunu bu lale sala.
E da baligili da:i dioi dunu amo ilia dogo denesisa.
E da ilia fofa:gi lala:gisa.
E da gasumuni ilia idi ilegei dagoi.
Amola gasumuni afae afae ilia dio adosa.
Ninia Hina Gode da bagadedafa amola gasa bagadedafa.
Ea asigi dawa:su amo afaega defemu da hamedei.
E da fonoboi dunu wa:lesisa.
Be wadela:i hamosu dunu, osoba banenesisa.
Hina Godema nodone gesami hea:ma!
Ninia Godema nodone sani baidama duma!
E da mu dedeboma:ne, mu mobi baila:lesisa.
E da osobo bagadema gibu iaha.
E da agologa, gisi heda:ma:ne hahamosa.
E da ohe fi ilima ha:i manu iaha.
Guimi mano da ga:sea, E da ilima ha:i manu iaha.
E da gasa bagade hosi amola nimi bagade dadi gagui dunu
amo hahawane hame ba:sa.
Be E da fonoboi dunu amo da Ema nodobe
amola Ea mae fisili asigidafa hou dafawaneyale dawa:be,
amo dunu E da hahawane ba:sa.
Yelusaleme fi! Hina Godema nodoma!
Saione fi! Dilia Godema nodoma!
E da dilia logo ga:su gasa bagadewane dialoma:ne hamosa.
E da dilia fi dunuma hahawane hamosa.
E da dilia soge alaloa gaga:sa.
E da dili sadima:ne, widi ha:i manu noga:idafa dilima iaha.
E da osobo bagadema hamoma:ne sia:sea,
Ea sia:be liligi da hedolowane hamoi dagoi ba:sa.
E da mugene su, abula agoai baila:lesisa.
Amola anegagi ofo gulu agoane dudulisisa.
E da mugene amo igi fofonobo agoane iasisa.
E da anegagidafa eso iasisia,
dunu afae da amo ganodini esalumu hamedei ba:sa.
Amasea, E da amo hamoma:ne sia:sea, mugene ganumu da daeasa.
E da fo iasisia, hano da ahoana.
E da sia:ne iasu amo Ea fi dunuma iaha.
E da Ea sema amola hamoma:ne sia:i amo Isala:ili fi ilima iaha.
E da eno fifi asi gala ilima agoane hame hamosu.
Eno fifi asi gala, ilia da Ea sema hame dawa:.
Hina Godema nodoma!
GODE EA SIA: IDA:IWANE GALA. Copyright © 2000 Tom Hoey. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.