GODE EA SIA: IDA:IWANE GALA
Gesami Hea:su 135
Nodone Gesami Hea:su
Hina Godema nodoma! Dilia Hina Gode Ea hawa: hamosu dunu!
Hina Gode Ea Dio nodone gaguia gadoma!
Dilia amo da ninia Hina Gode Ea Debolo diasu ganodini lela.
Ema nodoma!
Hina Godema nodoma! Bai E da noga:idafa.
Ea Dio nodone gaguia gadoma!
Bai E da asigidafa.
E da Ya:igobe Emagama:ne ilegei.
E da Isala:ili fi dunu Emagama:ne ilegei.
Na dawa:, Hina Gode da bagadedafa.
E da eno ‘gode’ huluane baligi dagoi.
E da mu amola osobo bagade amola hano wayabo bagade,
amola hano wayabo lugudu, amo ganodini Ea hanaiga fawane hamosa.
E da osobo bagade bega:, mulu misusa: ginafoi amo oule maha.
E da mulu misa:ne, ha:ha:na gala:sa.
E da Ea liligi ligisisu diasuga, fo oule maha.
E da Idibidi sogega, magobo dunu mano, amola ohe fi magobo gawali,
amo huluane defele, fane lelegei.
Amogawi, E da hina bagade, amola ea eagene ouligisu dunu
ilima se dabe ima:ne, musa: hame ba:su gasa bagade hou hamoi.
E da fifi asi gala bagohame gugunufinisili,
amola gasa bagade hina bagade dunu fane lelegei.
E da Saihone (A:moulaide fi dunu ilia hina bagade)
amola Oge (Ba:isia:ne fi hina bagade)
amola Ga:ina:ne soge hina bagade dunu huluane fane lelegei.
E da ilia soge huluane samogene, Ea Isala:ili fi dunu ilima sagoi dagoi.
Hina Gode! Eso huluane, dunu ilia da Di fawane da Godedafa sisia: lamu.
Fifi manebe huluanedafa, ilia da Di hame gogolemu.
Hina Gode da Ea hawa: hamosu dunu ili gaga:mu.
Bai ilia da hahani amola E da ilima asigisa. 1
Dunu fifi asi gala ilia ‘gode’ da dunu ilia loboga
silifa amola gouliga hamoi dagoi
Ilia da lafi gala, be sia: baoumu hamedei.
Ilia da si gala, be ba:mu gogolesa.
Ilia da ge gala be nabimu hamedei.
Ilia da mi gala, be amoga gaha amola gabusiga: nabimu hamedei.
Dunu da amo loboga hamoi ogogosu ‘gode’ hahamoi
amola ilima dafawaneyale dawa:sa, ilia da afadenene,
amo ogogosu liligi ilia hamoi, amo defele hamomu da defea.
Isala:ili fi dunu! Hina Godema nodoma!
Gode Ea gobele salasu dunu! Ema nodoma!
Dilia Lifai dunu! Hina Godema nodoma!
Dunu huluane amo da Ema nodone sia:ne gadosa! Ema nodoma!
Saione Moilai Bai Bagade amo ganodini, Hina Godema nodoma!
Yelusaleme da Ea esalebe moilai.
Amo ganodini, Ema nodoma!
Hina Godema nodoma!
Source notes (1)
- Footnote Gesami Hea:su 115:4-8; Wamolegei Sia: Olelesu 9:20
GODE EA SIA: IDA:IWANE GALA. Copyright © 2000 Tom Hoey. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.