Youna 2

Youna ea Hina Godema Sia:ne Gadosu

1Youna e menabo hagomo ganodini esala. E da ea Hina Godema sia:ne gadoi.

2E amane sia:i, “Hina Gode! Na da se bagadedafa nababeba:le,

Dima wele sia:ne gadoi. Amola Dia na sia:ne gadobe amo nabalu, dabe i.

Na da soge wadela:i ganodini esalu, amo da dunu bogogia:su soge diala,

amola na Dia fidima:ne di.

Amola na dibi amo di nabi dagoi.

3Dia na hano lugududafaga ha:digi

amola da hano gafului amoea na huluane dedebosa.

4Na agoane dawa:i, Dia da na fisi dagoi,

amola na da Dia hadigi Debolo diasu noga:idafa

bu hamedafa ba:mu dawa:i galu.

5Hano misini na dedeboi,

amola hano wayabo misini na da:i huluanedafa dedeboi

amola hano gadula:me da na da:i busa:gi

amola huluane lala:gili dedeboi dagoi.

6Na amo hano haguduga goumi, dabua gadonini dala gududafa doaga:i,

amo soge amoea, na masunu gogolele, logo ga:si dialu.

Be amomane Hina Gode Bagade, Di da na Godedafa, Dia na bu laiba:le.

Amola, luguduga lale, na esaleawane bu walesi.

7Hina Gode! Na dawa:loba, na da bogomu gadenei agoai ba:i.

Be amomane, na Dima dafawane dawa:i.

Amola na Hina Gode, Dima sia:ne gadoiba:le,

Di da Dia hadigi Debolo Diasu ganodini nabi.

8Dunu fifi asi gala amo da loboga hahamoi ogogosu ‘gode’ma sia:ne gadosa,

amo ilia da Dima fa:no bobogesu hou yolesi dagoi.

9Be na da Dima hahawane gesami hea:su hamomu.

Na Dima gobele salasu hou hamomu,

amola ni ilegele sia:i defele hamomu.

Be gaga:su houdafa da Dima fawane maha, na Hina Gode!”

10Amanoba Hina Gode da menaboma isoma:ne sia:beba:le,

menabo da Youna e boso da:iya, isole ligisi.