Yoube 5

1Ilaifa:se da eno amane sia:i,

“Yoube! Di wele sia:ma! Eno da dima adole ima:bela:?

A:igele dunu da di fidima:bela:?

2Di da bogosa:besa:le, da:i dione Godema ougi hou yolesima!

Amo hou da gagaoui agoane.

3Na da gagaoui dunu ba:i. Ilia da hahawane amola gaga:i dagoi agoane ba:i.

Be na da hedolowane ilia sosogo ilima gagabusu aligima:ne sia:i.

4Ilia mano da gaga:su hamedafa ba:mu.

Ilia fofada:musa: ahoasea, dunu afae da ili fidimu hame ba:sa.

5Ha:aligi dunu ilia da gagaoui dunu ilia dadami naha.

Ilia gagoma aya: gaga:nomei ganodini sagai amo naha.

Lafi hafoga:i dunu da gagaoui dunu ea bagade gagui amoma mudasa.

6Wadela:i hou da osobo ganodini hame heda:sa.

Bidi hamosu da osobogadili hame heda:sa.

7Hame mabu! Lalu geso da dafawane laluga heda:sa!

Amo defele, ninia hamobeba:le bidi hamosu ninima doaga:sa.

8Be dia bidi hamosu da nama doaga:i ganiaba,

na da Godema sinidigili, E da na gaga:ma:ne, Ema fofada:la:loba!

9Ninia da Ea gasa bagade hamobe hamedafa dawa:sa.

Amola E da musa: hame ba:su dawa:digima:ne olelesu hou mae dagole hamonana.

10E da osobo bagadega gibu ia, amola moifufu nasegagima:ne gibu hano iaha.

11Dafawane! Gode da fonoboi dunu ili gaguia gadosa.

E da dinanebe dunuma hahawane hou iaha.

12-13E da hohonosu dunu ilia ilegei hedofasa.

E da bagade dawa:su dunu ilia ilegei amo ganodini ili sanisa.

Amaiba:le, ilia hamobe huluanedafa da hame didisa.

14Ilia da esomogoa amolawane dadoula ahoa.

15Be Gode da hame gagui dunu mae bogoma:ne gaga:sa.

Amola eno dunu ili mae banenesima:ne gaga:sa.

16E da hame gagui dunu ilima dafawane hamoma:beyale

dawa:su iaha amola wadela:le hamosu dunu ouiya:ma:ne, ilia lafi ga:sisa.

17Nowa dunu amoma Gode da gagabole sia:sea, e da hahawane bagade.

Gode da dima gagabole sia:sea, mae hihima!

18Gode da dunu ea da:i hodo fai oda hida:sea, E da amo ga:le la:gisa.

Di da Gode Ea loboga fabeba:le, se naba.

Be E da Ea loboga di uhinisisa.

19E da di se mae nabima:ne, eso huluane gaga:lala.

20Ha: bagade doaga:sea, E da di mae bogoma:ne ouligimu.

Gegesu doaga:sea, E da di mae bogoma:ne gaga:mu.

21Dunu eno da dia hou wadela:ma:ne baligidu sia:sea,

Gode da di gaga:mu. Gugunufinisisu hou da doaga:sea, E da di fidimu.

22Luduli mimisa:i da dima doaga:sea, di da dodona:gini oumu.

Di da gasonasu sigua oheba:le hame beda:mu.

23Osobo amo di da gidinasea, gele da dialebe hame ba:mu.

Nimi bagade sigua ohe da dima hamedafa doagala:mu.

24Amasea, di da olofole dia abula diasu ganodini esalumu.

Di da dia sibi wa:i abodele ba:sea, ili huluane hahawane esalebe ba:mu.

25Dia mano lalelegemu idi, da gisi lubi ilia idi defele ba:mu.

26Widi da heda:le, yole, gamisu esoga doaga:sa.

Amo defele, di da asigilale, gagoaloidafa ba:mu.

27Yoube! Ninia da ode bagohame idili dadawa:beba:le,

amo hou huluane dawa:. Ninia sia: da dafawane.

Amaiba:le, di lalegaguma!”