Aisaia 12

Hina Godema Nodone Gesami Hea:su

1Amo esoga, Isala:ili dunu da gesami hea:mu, amane,

“Hina Gode! Na Dima nodosa.

Di da nama ougi galu.

Be wali Dia da ougi yolesili,

na dogo denesilala. 21

Gode da na Gaga:su dunu.

Na da mae beda:ne, Ea hou dafawaneyale dawa:le, lalegagumu.

Hina Gode da gasa bagade hou nama iaha.

E da na Gaga:su dunu.

3Hano hanai dunu da hano noga:i nasea, hahawane bagade ba:sa.

Amo defele, Gode da Ea fi dunu gaga:sea,

ilia da hahawane bagade ba:sa.

4Amo esoga, dilia Gode Ea fi dunu da amane gesami hea:mu,

“Hina Godema nodoma!

E da nini fidima:ne wele sia:ma!

Ea hamoi amo fifi asi gala huluane ilima adoma.

E da gasa bagadedafaba:le, ilima adoma!

5E da gasa bagade hou hamobeba:le,

Ema nodone gesami hea:ma.

Osobo bagade fifi asi gala huluane

da amo sia: ida:iwane gala nabimu da defea.

6Dunu huluanedafa Saione Goumi amoga esala,

amo da wele sia:mu amola gesami hea:mu da defea.

Isala:ili dunu fi ilia Hadigi Gode da Bagadedafa.

Amola E da Ea fi amo ganodini esala.”