Paliya Bible
रोमीयो 3
ता अळतेण आड़जात्या नी अगळ तमारो युहदी हयवा नो ह़ु फायदो अने खतनु हयवा नी ह़ु कीमत से? आखी भाते घणो फायदो से! पेले ते युहदी माणहु ने भगवान ना बोलु ह़ोप्या। कदी थोड़ाक वण-भरह्या बी नीकळ्या ता ह़ु हयु? तीमनो वण-भरहो भगवान नी सच्चाय ने अमथी कर देहे ह़ु? कदी नी! बाखीन भगवान खरलो से अने एकीक माणहु झुटा ठेरहे, जीसम सास्तर मे लीखलु से,
जीनी सी तु आपणी वात मे धरमी ठेरे,
अने नीयाव करवा नी टेमे जीक जाय।
पण कदी अमारो वण-धरम भगवान ने धरमपण ठेराय देय, ता आमु ह़ु कीया? ह़ु आहयु के भगवान जे रीह करे गलत करे? आहयु ते मे माणेह नी रीती पोर केम। कदी नी! नीता भगवान कीसम कळी नो नीयाव करहे?
कदी मारा झुट ना कारण भगवान नी सच्चाय तीनी बड़ाय ना लेदे, जादा करीन उजन्तो हयु, ता काहा मने पापीन तेम डंड ना लायक ठेरावे? आमु काहा नी बुराय करीया के भलाय उजन्ती हये? जीसम के अमारी पोर आहयो गुनो लगाड़े बी, अने काना केय के आमनु आहयु केणु से। पण आसवा ने गुनाळ्ळा ठेराव्वा ताले से।
कोय धरमी नी हय
ता अळतेण ह़ु हयु? ता आमु तीहया आड़जात्या सी वारु से? कदी नी; काहाके आमु युहदी अने आड़जात्या बेम पोर आहयो गुनो लगाड़ देदला से के तीहया आखान-आखा पाप ना हक मे से। जीसम सास्तर मे लीखलु से:
कोय धरमी नी, एक बी नी।
कोय ह़मजदार नी;
कोय भगवान ने ह़ोदवा वाळो नी हय।
आखा भगवान सी भटकी जेला से,
अने आखान-आखा रीकामा बण जेला से;
कोय भलाय करन्यो नी हय, एक बी नी हय।
तीमनु मोडु उगाड़लु मड़ाट्यु से,
तीहया आह़फाम नी जीप सी घमंड कर्या,
तीमना होट्या मे गहड़ा नी जेर से।
तीमनु मोडु गरा अने कड़वाट सी भरलु से।
तीमना पोगु लोय वयाड़वा मे उतवाळ्या से,
तीमनी वाट्ये खत्तम हयणु अने दुख से,
तीहया सांती नी वाट नी जाणता।
तीमना डोळा अगळ भगवान नी बीक नी हय।
आमु जाणये के नेम जे कंय केय तीमनेत केय, जे नेम पोर चाले; आनीन करते के आखा ना मोडा बंद कर देय अने आखी कळी भगवान ना नीयाव ना लायक ठेर्यी; 1काहाके नेम ना काम सी कोय बी माणेह तीनी अगळ धरमी नी ठेरे, आनीन करते के नेम ना लारे पाप नी ओळखाण हये।
भरहा ना लारे धरमी
पण हाव नेम सी अलग भगवान नी तीहयी धारमीक्ता उजन्ती हयली से, जीनी गवाय नेम अने भगवान वगे गेथा केवा वाळा माणहु देय। 2मतलब भगवान नु तीहयु धरमपणु, जे ईसु मसी पोर भरहो करवा सी आखा भरहो करवा वाळा जुगु से। काहाके कंय बी भेद-भाव नी हय। काहाके आखान-आखा पाप करला से, अने आखान-आखा भगवान नी बड़ाय सी बाकता हय ज्या। पण भगवान आह़फा नी दया सी तीहया छुटकारा ना लारे ईसु मसी मे आखान-आखा ने फोकट मे धरमी ठेरावलो से। ईसु मसी ने भगवान तीना लोय ना लेदेत पाप नो डंड उचलन्यो बणाय देदो, अने ईसु मसी पोर भरहो करवा सीत आपणु ने छुटकारो जड़े, अने जे पाप माणहु पेले करला अने भगवान वेठतो र्यो अने तीमना पाप पोर ध्यान नी देदो। पण हाव तीहयो ईसु ना लारे आह़फा नु धरमपण उजन्तु कर्यो। पण आहयीत टेमे तीनु धरमपणु उजन्तु हय ज्यु; तीनी सी तीहयो आह़फोत धरमी गणाय अने जे ईसु पोर भरहो करे, तीमने बी धरमी ठेरावण्यो बणे।
ता घमंड कां से? घमंड ने बाहर नीकाळ देदा काना कायदा सी, ह़ु आमु नेम सास्तर ने पाळया करीन, नी, पण आमु भरहो करया करीन। आसम आपणु देख्या के कायदा पाळवा ना लारे नी, बाखीन भगवान पोर भरहो करवा नी लारे माणेह पाप गेथो छुट जाय। भगवान युहदी माणहु नो एतरोत भगवान से ह़ु? आहयो भगवान आड़जात्या माणहु नो भगवान नी हय ह़ु? होव, हीय्यो आड़जात्या माणहु नो बी भगवान से। 3काहाके एकीत भगवान से, तीहयो खतना करला जुगु अने नी खतना करला ने बी भरहा ना लारे धरमी ठेरावे। ता आपणु मुसा ना लारे लीखला कायदा ने भरहा ना लारे अमथा ठेरावये ह़ु? नी, जलमकु आसम नी हय; पण मुसा ना कायदा ने जादा ताखत वाळा बणावीन पक्का कर्या।
Source notes (3)
- Cross-reference गलातीयो 2:16
- Cross-reference गलातीयो 2:16
- Cross-reference गलातीयो 3:20
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.