Paliya Bible
परकासीतवाक्य 8
ह़ातवो सीलटप्पो
जत्यार गाडरु ह़ातवो सीलटप्पो उगाड़्यो, ता ह़रग मे अरदा घंटा लग ह़ानाह़ुन र्यु। ता मे तीहया ह़ातोव ह़रगदुत ने देख्यो जे भगवान अगळ उबा रेय, अने तीमने ह़ात फेपार्या आप्या।
अने अळतेण एक अळी ह़रगदुत ह़ोना नु धुप देवा नु ठाहरु लीन आयो, अने वेदी नी ह़ाते जाय्न उबो हयो; अने तीमने घणो धुप आप्यो के आखा भगवान ना चोखला माणहु नी वीन्ती नी ह़ाते ह़ोना नी तीहयी वेदी पोर, जे राजगादी नी अगळ से चड़ावे।1 तीहया धुप नो धुकरो भगवान ना चोखला माणहु नी वीन्ती भेळ ह़रगदुत ना हात सी भगवान नी अगळ पुग ज्यो। 2अळतेण ह़रगदुत तीहया धुप देवा नु ठाहरु लेदो अने तीनी मे वेदी नु आक्ठु भर्यो अने धरती पोर नाख देदो। अने अळतेण वादळा नी गाज अने बोलु अने वीजळी नी चमक अने भुकम्प हयवा बाज ज्या।3
फेपार्या
तत्यार तीहया ह़ात ह़रगदुत जीमनी पांह ह़ात फेपार्या हता तीमने वगाड़वा तीयार हया।
पेन्लो ह़रगदुत फेपार्यु वगाड़्यो, अने ता गारा अने आक्ठु लोय मे भेसकायला पयदा हया, अने तीमने धरती पोर उन्दा वाळ देदो।4 अने धरती नो एक तीसरो खुणो धप ज्यो, अने झाड़का नो एक तीसरो खुणो धप ज्यो, अने आखो लील्लो चारो बी रोखड़ो हय ज्यो।
अने अळतेण बीजो ह़रगदुत तीनु फेपार्यु वगाड़्यो, ता मोट्ला बड़ान तेवी चीज दर्या मे नाख्यो, अने दर्या नो एक तीसरो खुणो लोय मे बदल ज्यो। अने दर्या ना तीन खुणा मे गेथा एक खुणा ना पाणी मे रेवा वाळा जीव मर ज्या, अने तीन खुणा मे गेथा एक खुणा ना ढुंड्या बी खत्तम हय ज्या।
अने अळतेण तीसरो ह़रगदुत तीनु फेपार्यु वगाड़्यो, एक मोट्लो तारो जे कंदील ने तेम धपत्लो, ह़रगे गेथो टुट्यो,5 अने नंद्या ना तीन खुणा मे गेथो एक खुणा पोर अने पाणी ना झोरु पोर जाय पड़्यो। आहया तारा नु नाम “कड़वलो तारो” हतु; अने तीन खुणा मे गेथु एक खुणा नु पाणी कड़वाट मे बदली ज्यु,6 अने घण ढेरका माणहु पाणी पीवा सी मर ज्या, काहाके पाणी कड़वु हय जेलु हतु।
जत्यार चोवथो ह़रगदुत तीनु फेपार्यु वगाड़्यो, ता तीन खुणा मे गेथा दाहड़ु ना एक खुणा पोर अने तीनी भेळ चांद ना एक खुणा पोर, अने तारा ना एक खुणा पोर गरा आयी, करीन तीमनो एक खुणो अंदारो हय ज्यो अने दाहड़ु ना एक खुणा मे वीजाळु नी र्यु, तीना कारण सी एक खुणो दाड़ो अने एक खुणो रात अंदारलु मे डुब ज्या।7
जत्यार मे अळी देख्यो, ता वादळु नी वच मे घुवड़ ने उडते अने उचा बोलु सी आहयु केते ह़मळ्यो, “तीहया तीन ह़रगदुत ना फेपार्या ना कारण सी जीमनु वगाड़वा नु हजु री र्यु, धरती पोर रेवा वाळा पोर गरा आय पड़े, गरा आय पड़े, गरा आय पड़े!”
Source notes (7)
- Cross-reference आमोस 9:1; नीरगमन 30:2,3
- Cross-reference परकासीतवाक्य 11:19; 16:18
- Cross-reference लेव्यवेवस्था 16:12; यहेजकेल 10:2; नीरगमन 19:16; परकासीतवाक्य 11:19; 16:18
- Cross-reference नीरगमन 9:23-25; यहेजकेल 38:22
- Cross-reference यसाया 14:12
- Cross-reference यीरम्या 9:15
- Cross-reference यसाया 13:10; यहेजकेल 32:7; योएल 2:10,31; 3:15
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.