Paliya Bible
परकासीतवाक्य 13
जंगली जानवर
ता मे एक जंगली जानवर ने दर्या मे गेथो नीकळते देख्यो, जीना दह ह़ींगड़ा अने ह़ात मुंडा से। तीना ह़ींगड़ा पोर दह पागड़ी अने तीना मुंडा पोर भगवान ना वाक ना नाम लीखला हता।2 जे जंगली जानवर मे देख्यो तीहयु चीतान तेवु हतु;3 अने तीना पोगु भालुन तेवा हता, अने मोडु नाहर ने तेवु हतु। तीहयो अजगर आह़फा नी ताखत अने आह़फा नी राजगादी अने मोट्लो हक तीने आप देदो। मे तीना एक मुंडा पोर एवो घाव लागलो देख्यो मान लेवो के तीहयो मरवा वाळो से, अळतेण तीनो मार लेय एवो घाव वारु हय ज्यो, अने आखी धरती पोर वाळा माणहु वहरायता-वहरायता ते जानवर पसळ ज्या। अने माणहु अजगर नी पुंजा कर्या, काहाके तीहयो जंगली जानवर ने हक आप देदलो हतो, अने आहयु कीन जंगली जानवर नी पुंजा कर्या, “आहया जंगली जानवर ने तेवु कोय से? अने कोय आनी ह़ाते झुमाय सकहे?”
मोट्ला बोलु बोलवा अने वाक काडवा तीने एक मोडु आप्यो, अने तीने चाळीह ने बे मयना तक काम करवा नो हक आप्यो। ता तीहयो भगवान नो वाक काडवा चालु कर देदो, तीहयो भगवान ना नाम अने जां तीहयो रेय, तीहया जागा नो अने ह़रग मे रेवा वाळा से, तीमनो वाक काडवा बाज ज्यो।4 तीने आहयो बी हक आप्यो के भगवान ना चोखला माणहु ना वीरोद मे झुमाये अने तीमने हराय देय,5 अने तीने एक-एक घोराणा अने माणहु अने बोली अने देस पोर हक आप्यो। धरती नी सुरुवात नी पेले गेथात जीमना नाम बादा चड़ावलु गाडरु नी जीवाय नी कीताप मे लीखला से,6 तीमने सोड़ीन आखा धरती पोर रेवा वाळा तीहया जंगली जानवर नी पुंजा करहे।
जीमना कान्टा हय तीहया ह़मळी लेय: जे धरायवा वाळो से तीहयो धरायहे; जे तलवार सी मारहे, तीने बी तलवार सी मारहे। करीन भगवान ना चोखला माणहु ने धीरज अने भरहो राखवा जरुड़ी से। 7
अळतेण मे एक अळी जानवर ने धरती मे गेथो नीकळते देख्यो, तीना गाडरुन तेवा बे ह़ींगड़ा हता, अने तीहयु अजगर ने तेम बोलत्लु। तीहयु तीहया पेल्ना जानवर नो पुरो हक तीनी अगळ काम मे लावतो हतो; धरती अने धरती पोर रेवा वाळा सी तीहया पेल्ना जंगली जानवर नी, जीनो मार लेय एवो घाव वारलो हय जेलो हतो, पुंजा करावतो हतो। तीहयो बीजो जीव मोटा-मोटा सेलाण्या देखाड़तो हतो, आञे तक के माणहु अगळ ह़रगे गेथो धरती पोर आक्ठु पाड़ देतो हतो। तीहया सेलाण्या नी कारण, जीमने तीहया जंगली जानवर नी अगळ देखाड़वा नो हक तीने आपलो हतो, तीहयो धरती पोर रेवा वाळा ने आहयी रीते भटकाड़तो हतो के अने धरती पोर रेवा वाळा ने केतो हतो जे जानवर ने तलवार लागली हती तीहयो जीव जेलो से, तीनी मुर्ती बणावो। तीने तीहया जानवर नी मुर्ती मे जीव नाखवा नो हक आप्यो के तीहया जंगली जानवर नी मुर्ती बोलवा बाज जाय, अने जेतरा माणहु तीहया जंगली जानवर नी मुर्ती नी पुंजा नी करे, तीमने मराय नाखे। तीहयु बीजु जानवर नान्ला-मोट्ला, मालदार-गरीब, छुट्ला-पावर्या, अने आखा माणहु ने मजबुर कर्यो के तीहया आह़फा-आह़फाम ना जमणा हात पोर नीता तीमना नींडाळे तीनो सीलटप्पो लगाड़े, के तीने सोड़ीन जीनी पोर छाप मतलब तीहया जानवर नु नाम नीता तीना नाम ना आकड़ा रेय, बीजु कोय बी लेणु-देणु नी कर सके।
जीनी पांह अक्कल हय, तीहयो आहया जानवर ना आकड़ा नु मतलब नीकाळ लेय, काहाके आकड़ा काना माणहे ना नाम सी जोड़ायला से, तीना आकड़ा 666 से।
Source notes (7)
- Cross-reference परकासीतवाक्य 17:3,7-12
- Cross-reference दानीयल 7:3; उबजणाय कीताप 17:3,7-12
- Cross-reference दानीयल 7:4-6
- Cross-reference दानीयल 7:8,25; 11:36
- Cross-reference दानीयल 7:21
- Cross-reference भजन सहीता 69:28
- Cross-reference यीरम्या 15:2; 43:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.