गीनती 17

हारुन नी लाकड़ी

1ता यहोवा मुसा ने केदो, 2“ईस्‌रायली माणहु ह़ाते वात करीन तीमना आड़ा-बुड़ा ना घोरु नी अनसारे, तीमना आखा डायलाम नी पांह गेथी एक-एक लाकड़ी ले; अने तीहया बारे लाकड़्‌या मे गेथी एक-एक लाकड़ी पोर एक-एक डायला माणेह नु नाम लीख, 3अने लेवीम नी लाकड़ी पोर हारुन नु नाम लीख। काहाके ईस्‌रायलीम ना आड़ा-बुड़ा ना एक-एक डायला माणेह नी एक-एक लाकड़ी रेहे। 4अने तीहया लाकड़्‌या ने मेल-मीलाप वाळा तम्‌बु मे गवा नी चीट्‌ठी अगळ, जां में तमने मळ्‌या करु तां मेक दे। 5अने जे अदमी ने में टाळही तीनी लाकड़ी मे डीरा नीकळ आवहे; अने ईस्‌रायली जे तमारी भणीन कुड़कुड़ कर्‌या करे, तीहयु कुड़कुड़ करनु में मारी पोर गेथु सेटु करही।” 6अने मुसो ईस्‌रायली माणहु ने आहयी वात केदो; अने तीहया आखा मुख्‌या आह़फा-आह़फाम नी जुगु, आह़फा-आह़फाम ना आड़ा-बुड़ाम नी अनसारे, एक-एक लाकड़ी मुसा ने आप्‌या, आहयी रीते बारे लाकड़ी हयी; अने तीमना लाकड़्‌या मे हारुन नी बी लाकड़ी हती। 7तीहया लाकड़्‌या ने मुसो वायदा ना तम्‌बु मे यहोवा अगळ मेक देदो। 8बीजा दाड़े मुसो वायदा ना तम्‌बु मे ज्‌यो; ता तीहयो देख्‌यो के हारुन नी लाकड़ी जे लेवी ना घोराणा जुगु हती तीनी मे डीरा नीकळ आया, मतलब तीनी मे डीरा फुट आया, अने फुल बी आय ज्‌या, अने पाकला बदाम बी फाली र्‌या। 9ता मुसो तीहया आखा लाकड़्‌या ने यहोवा अगळ गेथा नीकाळीन आखा ईस्‌रायलीम ने तां ली ज्‌यो; अने तीहया आह़फा-आह़फाम नी लाकड़ी ओळखीन ली लेदा। 10अळतेण यहोवा मुसा ने केदो, “हारुन नी लाकड़ी ने गवा नी चीट्‌ठी अगळ अळी मेक दे, के आहयी तीहया दंगो करवा वाळा जुगु एक सेलाणी बणीन मेकली रेय के तु तीमनु कुड़कुड़ करनु जे मारा वीरोद मे हया करे आव्‌वा वाळी टेम मे रोक राखे आसम नी हय जाय के तीहया मर जाय।”1 11अने मुसो यहोवा ना आहया हुकम नी अनसारेत कर्‌यो।

12ता ईस्‌रायली माणहु मुसा ने केवा बाज ज्‌या, “देख, अमारो जीव नीकळवा वाळो से, आमु मरवा बाज र्‌या, आमु आखान आखा खत्‌तम हयवा बाज र्‌या। 13जे कोय यहोवा ना रेवा ना जागान ह़ाते जाय तीहयु मर जाय। ता ह़ु आमु आखान आखा मरीत जहु।”