Paliya Bible
यहुदा 1
यहुदा भणी गेथो, जे ईसु मसी नो चाकर्यो अने याकुब नो भाय से, तीहया बोलाव्ला ना नाम जे भगवान बाह मे मोंगाळ्ळा अने ईसु मसी नी लेदे बचाड़ला से।
मोंग, दया अने सांती तमने ढेरेत जड़ती रेय।
झुटा मास्तर्या
ए मोंगाळ्ळा, भायु-बेन्या जत्यार मे तमने तीहया छुटकारा ना बारा मे लीखवा मे घणी मेहनत करतो हतो जीनी मे आपणु आखा साजल्या से, ता मे तमने आहयु ह़मजाड़वा जरुड़ी जाण्यो के तीहया भरहा नी लेदे पुरी मेहनत करो जे चोखला माणहु ने एकीत कावा आखा जुगु आपलु हतु। काहाके केतरा एवा माणहु होगात अमारी मे आवीन भेसकायला से, जीनी सी आहया माणहु ना डंड ना बारा मे पेल्ना वारा मे पेले गेथुत लीखाय जेलु हतु: आहया वण-भक्ती ना से, अने अमारा भगवान नी दया ने लुच्चाय मे बदल देत्ला से, अने अमारा एकीत मालीक अने मालीक ईसु मसी ने नी मानवा वाळा से।
पण आनीन लेदे तमु आखी वात एक कावा जाण लेदला से, ते बी मे तमने आहयी वात नी फोम कराव्वा हेर करु के मालीक एक ईस्रायल ने मीस्र देस सी छोड़ाव्वान बाद भरहो नी करन्या ने खत्तम कर देदो। अळतेण जे ह़रगदुत आपणा जागा ने टेकलो नी राख्यो पण आपणु खास रेवा ना जागा ने सोड़ देदा, तीहयो तीमने बी तीहया काठला दाड़ा ना नीयाव नी लेदे अंदारला मे, जे हमेसा नी लेदे से बांदीन राख्यो। जीने रीते सदोम अने अमोरा अने तीनी आड़े-धेड़े वाळा ह़ेर जे आमनीन तेम छीनाळ्या हय जेला हता, अने बीजा ना डील नी पसळ लाग जेला हता, तीहया आक्ठा ना जलम ना डंड मे पड़ीन दाखलो ठेर्या।
तीहयी रीते आहया ह़पनु देखण्या बी आपणा-आपणा डील ने बगाड़ देय, अने भगवान ना हक ने तीहया कंय नी जाणे, अने ह़रगदुत ने बुरु-भलु केय। 2पण डायलो ह़रगदुत मीकाईल, जत्यार भुतड़ा सी मुसा ना धोड़ ना बारा मे वात कर्यो, ता तीने भलु-बुरु कीन गुनो लगाड़वा नी हीम्मत नी कर्यो पण आहयु केदो, “मालीक तने वडे।” पण आहया माणहु तीहयी वातु ने नी जाणता अने तीमने भलु-बुरु केय। अने तीहयी वातु ने जंगली जानवर्यान तेवा वेहवार सी, ह़मजत्ला, तीनी मे आह़फा ने खुटाड़त्ला से। तीमनी पोर गरा! काहाके तीहया केन नी तेम चाल्या, अने दाड़की नी लेदे बीलाम नी तेम गंडवाय ज्या, अने कोरह नी तेम झगड़ो करीन मर ज्या। आहया तमारी मोंग नी बठक मे तमारी ह़ाते खाय-पीय, दर्या मे ह़तायला दगड़ान तेम से, अने आह़फा नु पेट भरवा मे ध्यान राखत्ला से; तीहया पाणी वगर नु वादळु से, जीने वाहळु उडाड़ ली जाय; आहया आसवा झाड़का से, जे फालवा नी टेम पोर बी नी फाले, जे बे कावा मर जाय, अने मुळ्या भेळ उखड़ी ज्या, आहयी दर्या नी जंगली झलक से, जे आपणी वणलाज नी फेण उछाळे; आहया भटकत्ला चांदणा से, जीमनी वाटु हमेसा नी लेदे घणु अंदारलु मेकलु से।
हनोक बी जे आदम सी ह़ातवी पीड़ी मे हतो, ईमना बारा मे भगवान भणी गेथा वात करन्या ईसम केदा, “ह़मळो, मालीक आपणा लाखु चोखला ह़रगदुत ह़ाते आवहे के आखाम नो नीयाव करे, अने आखा वण-भक्ती ना माणहु ने तीमना आखा बुरा कामु ना बारा मे जे तीहया वण-भकत्या हय्न करला से, अने तीहयी आखी वातड़ी वातु ना बारा मे जे वण-भक्ती ना पापी माणहु तीना वीरोद मे केदला से, गुनाळ्ळा ठेरावहे।”
आहया ते नराज, कुड़कुड़ करवा वाळा, अने आह़फा ना डील नी मरजी ना लारे चालवा वाळा से, अने आपणा मोडा सी घमंड नी वात बोलत्ला से, अने फायदा नी लेदे मोडु देखीन ईज्जत कर्या करत्ला से।
चेतावणी अने परच्यार
पण ए मोंगाळ्ळा, तमु तीहयी वात ने फोम राखो जे अमारा मालीक ईसु मसी ना नेवताळा पेलेत की देदला से। 3तीहया तमारी सी कीया करता हता, “सेला दाड़ा मे एसवा हाही करवा वाळा हयहे जे आह़फा नी वण-भक्ती नी हेर नी लारे चालहे।” आहया तीहया से जे बेरजाव पाड़वावाळा से; आहया डील नी मरजी ना अनसारे चालवा वाळा से जीनी मे भगवान नी आत्मा नी हय। पण ए मोंगाळ्ळा, तमु आपणा जबर चोखला भरहा मे वदता जीन अने चोखला आत्मा नी सक्ती मे वीन्ती करता जीन, आह़फात ने भगवान ना मोंग मे बणाय्न राखो; अने जलम नी जीवाय नी लेदे अमारा मालीक ईसु मसी नी दया नी वाट जोवता रेवो।
तीमनी पोर जे सण्का मे से दया करो। अने घणात ने आक्ठा मे गेथा नीकाळो; अने तीमनी रखवाळी करो। घणाम नी पोर बीहता जीन दया करो, पण तीमना लुगड़ा सी ह़ीगी करो जे डील नी लारे बगड़ी ज्या।
संयबरकत ना बोलु
हाव जे तमने ठोकर खावा सी बचाड़ सकत्लो, अने आह़फा ना बड़ाय नी भरपुरी नी अगळ घणु खुस अने वण-गुनाळ्ळो करीन उबो कर सकत्लो से, तीहयो एकीत भगवान अमारो छुटकारो आपण्या नी बड़ाय अने ईज्जत अने आखा सी जोरभर्यो अने हकदार, अमारा मालीक ईसु मसी नी लारे जीसम सुरुवात नी टेम सी से, हमणे बी रेय अने जलमकी रेय। आमीन।
Source notes (3)
- Cross-reference मत्ती 13:55; मरकुस 6:3
- Cross-reference परकासीतवाक्य 12:7
- Cross-reference 2 पतरस 3:3
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.