Paliya Bible
यहोसु 9
गीबोनी यहोसु ने धोको देय
आहयु ह़मळीन हीत्ती, एमोरी, कनानी, परीज्जी, हीब्बी, अने यबुसी, जेतरा राजा यरदन नंदीन आहयी धेड़े बड़ा वाळा देस मे, अने लबानोन नी अगळ नी मोट्ली दर्या ना काठे रेता हता, तीहया एक-मन्या हय्न यहोसु अने ईस्रायल ना माणहु नी ह़ाते झुमायवा करीन एक्ठा हया। जत्यार गीबोन ना रेवा वाळा ह़मळ्या के यहोसु यरीहो अने ए ह़ेर वाळा ह़ाते ह़ु-ह़ु कर्यो, ता तीहया चाल चाल्या, अने राजदुत नो रुप बणावीन आह़फाम ना गदड़ा पोर जुन्ला ठेला, अने जुन्ला फाट्ला अने जोड़ला ह़रु ना कवड़्या लादीन आह़फाम ना पोगु मे जुन्ला ह़ीवला खाहड़ा, अने डील पोर जुन्ला लुगड़ा पेर्या, अने आह़फा खावा जुगु ह़ुकला बुरथायला रोट्ला ली लेदा। ता तीहया गीलगाल ना पड़ावा मे यहोसुन्तां जाय्न तीने अने ईस्रायल ना अदमी ने केवा बाज ज्या, “आमु नाम्बे देस मे गेथा आवला से; एतरे तमु हाव अमारी ह़ाते वायदो करो।” ईस्रायल ना अदमी तीहया हीब्बी ने केदा, “आमने ह़ु मालम तमु अमारी धेड़ेत रेता हय; आमु तमारी ह़ाते वायदो कीकम करया?”1 तीहया यहोसु ने केदा, “आमु तारा चाकर्या से।” ता यहोसु तीमने केदो, “तमु कोय से? अने कां गेथा आवला से?” तीहया तीने केदा, “तारा चाकर्या घणा नाम्बे ना देस गेथा तारा भगवान यहोवा नु नाम ह़मळीन आवला से; काहाके आमु आहयु आखु ह़मळला से, मतलब तीनु काम अने जे कंय तीहयो मीस्र मे कर्यो, अने जे कंय तीहयो एमोरी ना बेम राजा ह़ाते कर्यो जे यरदन नंदी नी ह़ेली धेड़े उगवणी ह़ोड़ रेता हता, मतलब हेसबोन ना राजा सीहोन ह़ाते, अने बासान ना राजा ओग ह़ाते जे अस्तारोत मे हतो।2 करीन अमारीन्तां ना मुख्या माणहु अने अमारा देस मे ना आखा रेवा वाळा आमने केदा, के वाट्ये जुगु तमारी ह़ाते खावा नु चीज लीन तीमने भेटवा जावो, अने तीमने केजो, के आमु तमारा चाकर्या से; एतरे हाव तमु अमारी ह़ाते वायदो करो। जे दाड़े आमु तमारीन्तां आव्वा करीन नीकळ्या तीहया दाड़े ते आमु अमारा-अमारा घोर गेथा आहया रोट्ला उन्ला अने ताबला लेदला; पण हाव देखो, आहया ह़ुक जेला से अने आहया बुरथाय जेला से। अळतेण जे आहया ह़रु ना कवड़्या आमु भरला लेदला, ता ते नवला हता, पण देखो आहया हाव फाट जेला से; अने अमारा आहया लुगड़ा अने खाहड़ा घणी नाम्बे नी चाल ना कारण सी जुना हय जेला से।” ता तीहया अदमी यहोवा भगवान पांह ह़ला लीया वगर तीमनु खाणु मे गेथु ली लेदा। ता यहोसु तीमने भेटीन तीमनी ह़ाते आहयो वायदो कर्यो के तमु ने जीवत्ला रेवा देहु; अने मंडळी ना मुख्या बी ह़ाम खादा।
तीमनी ह़ाते वायदो करवान तीन दाड़ान अळतेण तीमने आहयी खबर जड़ी, के तीहया अमारी धेड़े ना देस मे रेवा वाळा से, अने अमारीत धेड़े वहला से। ता ईस्रायली माणहु नीकळीन तीसरा दाड़े तीमना ह़ेर मे पुग्या जीमना नाम गीबोन, कपीरा, बेरोत, अने कीर्यात्यारीम से। अने ईस्रायली माणहु तीमने नी मार्या, काहाके मंडळी ना मुख्या तीमनी ह़ाते ईस्रायल ना भगवान नी ह़ाम खादला हता। ता आखी मंडळी ना माणहु मुख्या ना वीरोद मे कंय-कंय केवा बाज ज्या। ता आखा मुख्या आखी मंडळी ने केदा, “आमु तीमने ईस्रायल ना भगवान यहोवा नी ह़ाम खादला से, एतरे हाव ईमने छीमी बी नी सकता। आमु तीमनी ह़ाते आहयुत करहु के तीहयी ह़ाम नी अनसारे आमु तीमने जीवत्ला छोड़ देहु, नीता अमारी खादली ह़ाम ना कारण सी आपणी पोर मालीक ने रीह लागहे।” अळतेण मुख्या तीमने केदा, “तीमने जीवत्ला छोड़ देवो।” अने मुख्या ना आहया बोल नी अनसारे तीहया आखी मंडळी जुगु लाकड़ा वाडण्या अने पाणी भरन्या बण्या।
अळतेण यहोसु तीमने बोलावीन केदो, “तमु ते अमारी धेड़ेत रेवो, ता तमु आमने आहयु कीन काहा धोको देदा, के आमु तमारी गेथा घणा नाम्बे रीया? एतरे तमु हाव सरापीत से, अने तमारी मे गेथा एवा कोय बी नी रेय के चाकर्या, मतलब मारा भगवान ना घोर जुगु लाकड़ा वाडण्या अने पाणी भरवा वाळा नी हय।” तीहया यहोसु ने जपाप आप्या, “तारा चाकर्या ने आहयु पक्कु देखाड़लु हतु, के तारो भगवान यहोवा तीना चाकर्या मुसा ने हुकम आपलो हतो के तमने तीहयो आखु देस आपे, अने तीनी मे आखा रेवा वाळा ने तमारी अगळ गेथा खत्तम करे; करीन आमु ने तमारा कारण सी अमारा जीव नी लेदे घणा बीह ज्या, करीन आमु आसवु काम कर्या। अने हाव आमु तारा हक मे से, जेवो वेहवार तने भलो लागे अने वारु मालम पड़े, तेवोत वेहवार अमारी ह़ाते कर।” ता तीहयो तीमनी ह़ाते तेमेत कर्यो, अने तीमने ईस्रायल ना माणहु ना हात मे गेथा आसम बचाड़्यो, के तीहया तीमने मार नी सक्या। पण यहोसु तीहयात दाड़े तीमने मंडळी जुगु, अने जे जागो यहोवा टाळ लेय तीनी मे तीनी वेदी जुगु, लाकड़ा लावण्या अने पाणी भरन्या टाळ देदो, जेम आज तक से।
Source notes (2)
- Cross-reference नीरगमन 23:32; 34:12; वेवस्थावीवरन 7:2
- Cross-reference गीनती 21:21-35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.