Paliya Bible
यहेजकेल 34
ईस्रायल ना गुवाळ्या
यहोवा नो आहयो बोल मारीन्तां पुग्यो: ए माणेह नी अवल्यात, ईस्रायल ना गुवाळ्या ना वीरोद मे भगवान वगे गेथी वात कीन तीहया गुवाळ्या ने के, भगवान यहोवा आसम केय: गरा आय पड़े ईस्रायल ना गुवाळ्या पोर जे आह़फा-आह़फाम ना पेट भरे! ह़ु गुवाळ्या ने गाडरा-बोकड़ा नु पेट नी भरवा जोवे? तमु चर्बी खावो, हीर पेरो अने मोटा-मोटा जानवरु ने मारो; पण गाडरा-बोकड़ा ने तमु नी चारो। तमु मांदला ने ताखत वाळा नी बणाया, अने नी मांदला ने आरगा कर्या, अने नी घाव लागला ना घावु ने पट्टी बांद्या, तमु भटकला ने पासा नी लाया। अने नी खोवायला ने ह़ोद्या, पण तमु ताखत अने जबरजस्ती अदीकार चलाड़ला से। तीहया गुवाळ्यो नी रेवा ना कारण सी रीवण्या-तीवण्या हय ज्या; अने आखा जंगल ना जानवरु नु खाणु बण ज्या।1 मारा गाडरा-बोकड़ा रीवण्या-तीवण्या हयला से; तीहया आखा बड़ा अने उचा-उचा बड़्या पोर भटक र्या; मारा गाडरा-बोकड़ा आखी धरती नी उपर रीवण्या-तीवण्या हया; अने नी कोय तीमनी फोम करवा वाळु हतु, अने नी कोय तीमने ह़ोद्यु।
“आहया कारण सी, ए गुवाळ्या, यहोवा नो आहयो बोल ह़मळो। भगवान यहोवा आसम केय, मारा जीवाय नी ह़ाम, मारा गाडरा-बोकड़ा जे लुटाय जेला से, अने गाडरा-बोकड़ा जे गुवाळ्यो नी हयवा ना कारण सी जे आखा जंगल ना जानवरु नु खाणु बण जेला; अने आनीन करते के मारा गुवाळ्या मारा गाडरा-बोकड़ा नी खबर नी लेदा, अने मारा गाडरा-बोकड़ा नु पेट नी, पण आह़फाम नु पेट भर्या। आहया कारण सी ए गुवाळ्या, यहोवा नो आहयो बोल ह़मळो, भगवान यहोवा आसम केय देखो, में गुवाळ्या ना वीरोद मे से अने में तीमनी पांह मारा गाडरा-बोकड़ा नो लेखो लेही, अने अळी तीमने पासा चारवा नी देम; तीहया अळतेण आह़फा-आह़फाम नु पेट भरी नी सके। में मारा गाडरा-बोकड़ा ने तीमना मोडा मे गेथा छोड़ावही के अगा चालीन तीहया तीमनु खाणु नी बणे।
वारलो गुवाळ्यो
“काहाके भगवान यहोवा आसम केय देखो, में खुदेत मारा गाडरा-बोकड़ा नी खबर लेही, अने तीमने ह़ोदही। जेम गुवाळ्यो आह़फा ना गाडरा-बोकड़ा मे गेथा भटकला ने पासो आह़फा ना टोळा मे एक्ठो करे, तेमेत में बी मारा गाडरा-बोकड़ा ने एक्ठा करही; में तीमने तीहया आखा जागे गेथा नीकाळ लावही, जां-जां तीहया वादळा अने घणु अंदारलु ना दाड़े रीवण्या-तीवण्या हय जेला हता। में तीमने देस-देस ना माणहु मे गेथा नीकाळही, अने देस-देस मे गेथा एक्ठा करही, अने तीमनात खुद ना जागा मे ली आवही; अने ईस्रायल ना बड़ाम नी पोर अने कोतड़ा मे अने तीहया देस ना आखा वह़ला जागा मे चारही। में तीमने वारला चरवा ना जागा मे चारही, अने ईस्रायल ना उचा-उचा बड़ा पोर तीमने वारलो चरवा नो जागो जड़हे; ता तीहया वारलु लील्लु-लील्लु मे बह्या करहे, अने ईस्रायल ना बड़ा पोर वारु सी वारु चरवा ना जागा मे चरहे। में खुदेत मारा गाडरा-बोकड़ा नो गुवाळ्यो रेही, अने में खुदेत तीमने बहाड़ही, भगवान यहोवा आसमेत केय।
“में खोवायला ने ह़ोदही, अने भटकला ने पासो ली आवही, अने घाव लागला ना घाव पोर पट्टी बांदही, अने मांदला ने ताखत वाळा बणावही अने जे माता अने ताखत वाळा से तीमने मे खत्तम करही; में तीमनु चरावणु नीयाव सी करही।
“ए मारा टोळा, तमु ने भगवान यहोवा आसम केय देखो, में गाडरा-गाडरा नी वच मे अने गाडरा अने बोकड़ा नी वच मे नीयाव करु। ह़ु तमने आहयी नान्ली वात मालम पड़े के तमु वारला चरवा ना जागा मे चर लेवो अने बचला वारला चरवा ना जागा ने आह़फाम ना पोगु वेर रोंदळो; ह़ु तमने आहयु नान्ली वात मालम पड़े के तमु आसलु पाणी पी लेवो अने बचलु पाणी ने आह़फाम ना पोगु वेर डोहळु करो? ह़ु मारा गाडरा-बोकड़ा ने तमारा पोगु सी रोंदळला ने चरवा, अने तमारा पोगु वेर डोहळु करलु पाणी ने पीवा पड़हे?
“आहया कारण सी भगवान यहोवा तीमने आहयु केय: देखो, में खुद माता अने कमजोर गाडरा-बोकड़ा नी वच मे नीयाव करही। तमु जे आखा मांदला ने पाहळी अने खबा सी आञे तक धेकलो अने ह़ींगड़ा वेर आसम मारो के तीहया रीवण्या-तीवण्या हय जाय, आहया कारण सी में मारा गाडरा-बोकड़ा ने छोड़ावही, अने तीहया तमारु खाणु नी बणे, अने में गाडरा-गाडरा अने बोकड़ा-बोकड़ा नी वच मे नीयाव करही। में तीमनी जुगु एक एवो गुवाळ्यो ठेरावही जे तीमनी गुवाळी करहे, तीहयो मारो चाकर्यो दावुद रेहे, तीहयोत तीमने चारहे, अने तीहयोत तीमनो गुवाळ्यो रेहे। में यहोवा तीमनो भगवान ठेरही, अने मारो चाकर्यो दावुद तीनी वच मे मुख्यो रेहे; में यहोवात आहयु केदलो से।
“में तीमनी ह़ाते सांती नो वायदो करही, अने जंगली जानवरु ने देस मे नी रेवा देम; अने तीहया जंगल मे बीह्या वगर रेहे, अने जंगल मे ह़ुवहे।
“में तीमने अने मारा बड़्या नी आड़े-धेड़े नी आखी जागा ने बरकत नो कारण बणाय देही; अने पाणी ने में टेम पोर पाड़्या करही; अने तीहयो बरकत नो पाणी रेहे। मेदान ना झाड़का फालहे अने जागो आह़फी नी मेर उगाड़हे, अने तीहया आह़फाम ना देस मे बीह्या वगर रेहे; जत्यार में तीहया वळा ने तोड़ीन तीहया माणहु ना हात मे गेथो छोड़ावही, जे तीमने चाकरी करावे, ता तीहया जाण लेहे के में यहोवा से। अळतेण तीमने राज्य-राज्य नी लुटे, अने नी तीमने जंगल मे वाळा जानवर खाय; तीहया बीह्या वगर रेहे, अने तीमने कोय नी बीहाड़े। तीमनी जुगु पकाड़वा वाळी वाड़ी उबजाड़ही, अने तीहया देस मे अळी भुकला नी मरे, अने नी राज्य-राज्य ना माणहु अळी तीनो वाक काडे। तीहया जाणहे के में भगवान यहोवा तीमनी ह़ाते से, अने तीहया जे ईस्रायल ना घोराणा से, तीहया मारा माणहु से, में यहोवा आसमेत केम।
“तमु ते मारा गाडरा-बोकड़ा, मारा चारवा ना जागा ना गाडरा-बोकड़ा से, तमु ते माणहु से, अने में तमारो भगवान से,” भगवान यहोवा आसमेत केय।
Source notes (1)
- Cross-reference गीनती 27:17; 1 राजा 22:17; मत्ती 9:36; मरकुस 6:34
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.