Paliya Bible
यहेजकेल 25
अम्मोनीम ना वीरोद मे भगवान वगे गेथी वात
यहोवा नो आहयो बोल मारीन्तां पुग्यो: “ए माणेह नी अवल्यात, अम्मोनीयोम नी भणी मोडु करीन तीमना बारा मे भगवान वगे गेथी वात के। तीमने के, ए अम्मोनी, भगवान नो बोल ह़मळो, भगवान यहोवा आसम केय के तमु जे मारा चोखला जागा ने वीटाळ्या, अने ईस्रायल नु देस जत्यार तीहयु उजड़ ज्यु, अने यहुदा ना घोराणा ना बारा मे जत्यार तीहया गुलामी मे ज्या, ता अहा! अहा! केदा। करीन देखो, में तमने उगवणु देस ना माणहु ना हक मे करवा वाळो से; अने तीहया तारी वच मे तीमना पड़ावा नाखहे अने तीमना घोर बणावहे; तीहया तारा फोळ खाहे अने तारु दुद पीहे। में रब्बा ह़ेर ने उटड़ा नो रेवा नो, अने अम्मोनीम नु देस ने गाडरा-बोकड़ान बहवा नो जागो बणाय देही; ता तमु जाण लेहु के में यहोवा से। काहाके भगवान यहोवा आसम केय: तमु जे ईस्रायल ना देस ना कारण सी थापड़्या ठोक्या अने नाच्या, अने तमारा पुरा मन ना घमंड सी खुसी मनाया, आहया कारण सी देख, में मारो हात तारी पोर बड़ावलो से; अने तने राज्य-राज्य नी लुट बणाय देही, अने देस-देस ना माणहु मे गेथो तने मीटाड़ही; अने देस-देस मे गेथा खत्तम करही। में तने पुरी रीती सी खत्तम कर देही; ता तु जाण लेही के में यहोवा से।
मोवाब ना बारा मे भगवान वगे गेथी वात
“भगवान यहोवा आसम केय: मोवाब अने सेईर देस ना माणहु जे आसम केय, देखो, यहुदा नु घोराणु अळी बीजा आखा राज्य ह़रकु हय जेलु से। आहया कारण सी देख, मोवाब ना देस नी धेड़े ना ह़ेरु ने बेत्यसीमोत, बालमोन, अने कीर्यातेम, जे तीहया देस नी बड़ाय से, में तीमनी वाट उगाड़ीन तीमने उगवणा देस ना माणहु ना हक मे आसम कर देही के तीहया अम्मोनीम नी ह़ाते झगड़ो करे; अने में अम्मोनीम ने आसम तीमना हक मे कर देही के राज्य-राज्य नी वच मे तीमनी फोम तक नी करे। में मोवाब ने बी डंड आपही। ता तीहया जाण लेहे के में यहोवा से।
एदोम ना वीरोद मे भगवान वगे गेथी वात
“भगवान यहोवा आसम बी केय: एदोम जे यहुदा ना घोराणा सी बदलो लेदु, अने तीनी सी बदलो लीन जादा गुनाळ्ळु हय ज्यु। करीन भगवान यहोवा आसम केय, में एदोम ना देस ना वीरोद मे मारो हात बड़ावीन तीनी मे गेथा माणहु अने जानवरु बेम ने मीटाड़ही; अने तेमान ह़ेर गेथो लगाड़ीन ददान ह़ेर तक तीने उजाड़ देही; अने तीमने तलवार वेर मारहे। में मारा माणहु ईस्रायल नी लारे एदोम सी मारो बदलो लेही; अने तीहया ते देस मे मारी रीह अने खीज नी अनसारे काम करहे। ता तीहया मारा बदला ने जाण लेहे, भगवान यहोवा आसमेत केय।
पलीस्तीम ना वीरोद मे भगवान वगे गेथी वात
“भगवान यहोवा आसम केय: काहाके पलीस्ती माणहु बदलो लेदा, अने जलमकी दुस्मनी का कारण सी आह़फाम ना मन ना घमंड सी बदलो लेदा के खत्तम करे,1 आहया कारण सी भगवान यहोवा आसम केय, देख, में पलीस्तीम ना वीरोद मे मारो हात बड़ाव्वा वाळो से, अने करेती माणहु ने मीटाड़ देही; अने दर्या ना काठे बचला रेवा वाळा ने खत्तम करही। मे तीमने मोटो डंड आपही। रीह भेळ में तीमनी पांह बदलो लेही, ता तीहया जाण लेहे के मेंत यहोवा से।”
Source notes (1)
- Cross-reference यसाया 14:29-31; यीरम्या 1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.