Paliya Bible
यहेजकेल 23
बे छीनाळ्याण बेनेह
यहोवा नो आहयो बोल मारीन्तां पुग्यो: “ए माणेह नी अवल्यात,” बे बयर हती, “जे एकीत आय्ह नी सोरी हती। तीहयी नान्लीत हतीन रंडी नु काम मीस्र मे करवा बाज जी; तांत तीमनी छाती ने डाब्या अने तीहयी कुवारी नी री। तीहयी सोरी मे गेथु मोट्ली नु नाम ओहोला1 अने तीनी नान्ली बेनेह नु नाम ओहोलीबा2 हतु। में तीहयी बेम बेनेह ने आवरी लेदो, अने तीमना सोरा-सोरी पयदा हया। तीमना नामु नी अनसारे ओहोला ते सामरी, अने ओहोलीबा झुमायण्यु यरुसलेम से। ओहोला जत्यार मारी हती, तात छीनाळ्याण बणीन तीना दोस्तीदार्या भणीन मनवायवा बाज जी जे तीना ह़ाते वाळा अस्सुरी ईलाका ना हता। तीहया ते आखान-आखा नीळ्ळा लुगड़ा पेरवा वाळा मनगमता जुवान अदीकार्या अने मुख्या हता, अने घोड़ा पोर बहला हता। करीन तीहया तीमनीत ह़ाते छीनाळु कर्या जे आखान-आखा वारला सी वारला अस्सुरी हता; अने जे कोय भणीन बी तीहयी मनवायी तीमनात मुरत्या सी तीहयी वीटळी। जे छीनाळु तीहयी मीस्र मे ह़ीकली हती, तीने बी तीहयी नी छोड़ी; काहाके नान्ली हती ता माणहु तीनी ह़ाते गलत काम कर्या, अने तीनी छाती पोर हात फीरव्या, अने डील-मन सी तीमनी ह़ाते छीनाळु कर्या। करीन में तीने तीहयात अस्सुरी दोस्तीदर्या ने ह़ोप देदो जीमनी पोर तीहया मनवायला हता। तीहया तीने नांगरी कर्या; तीना सोरा-सोरी हापकीन तीने तलवार वेर मार्या; आहया कारण सी तीमना हात सी डंड हात करीन तीहयी बयरा मे नामह़ाद्याण हय जी।
“तीनी बेनेह ओहोलीबा आहयु देखी, ते बी तीहयी मनवाय्न छीनाळु करवा मे तीनी बेनेह सी जादा बड़ जी। तीहयी तीना अस्सुरी ह़ाते वाळा पोर मनवायती हती, अने आखान-आखा घणा घटाळा लुगड़ा पेरवा वाळा अने घोड़ा पोर बहण्या मनगमता, जुवान अदीकार्या अने आखा भातीन मुख्या हता। ता में देख्यो के तीहयी बी वीटळ जी; तीहयी बेम बेनेह नी ह़रकी चाल हती।
“पण ओहोलीबा जादा छीनाळु करे; अने जत्यार तीहयी दीवाल पोर ह़ींदुर वेर पाड़ला एवा कसदी अदमी ना चीत्रा देखी, जे केड़ मे फटका बांदीन, मुंडा मे छेड़ो टींगायली रंगाळी पागड़ी पेरीन, अने आखान-आखा आह़फाम नी पयदा हयली जागा मतलब बेबीलोन ना माणहु नी रीती पोर मुख्यान तेवा बणला हता, ता तीमने देखतेत तीमनी ह़ाते मनवाय ज्यु अने तीमनीन्तां कसदीम ना देस मे दुत मोकल्या। करीन बेबीलोन ना माणहु तीनीन्तां पलंग पोर आया, अने तीनी ह़ाते छीनाळु करीन तीने वीटाळ्या; अने जत्यार तीहयी तीमनी सी वीटळ जी, ता तीमनु मन भराय ज्यु अने सेटा हय ज्या। ते बी जत्यार तीहयी डील उगाड़ती अने छीनाळु करती जी, ता मारु मन जेम तीनी बेनेह भणी गेथु फीर जेलु हतु, तेमेत तीनी भणी गेथु बी फीर ज्यु। ते बी तीहयी मीस्र देस ना आह़फी ना नान्ली हती तीहया दाड़ा ने फोम करीन जत्यार तीहयी रंडी नु काम करती हती, अळी जादा छीनाळु करती जी; अने एवा दोस्तीदार्या पोर मनवाय जी, जीमनु अंग गदड़ान तेवु, अने वीर्य घोड़ान तेवु हतु।” तु आहयी रीते तारा नान्ली हतीन करली तीहया टेमे ना मोट्ला पाप ने फोम करावे जत्यार मीस्री माणहु तारी छाती ने चमदता हता।
नान्ली बेनेह ने भगवान नो डंड
“आहया कारण सी ए ओहोलीबा, भगवान यहोवा तने आसम केय: देख, में तारा दोस्तीदार्या ने भड़कावीन जीमनी सी तारु मन भराय ज्यु च्यारो-मेर तारी वीरोद मे ली आवही। मतलब बेबीलोन ना रेवा वाळा अने आखा कसदीम ने, पकोद, सो अने कोवा ना माणहु ने; अने तीमनी ह़ाते आखा अस्सुरीम ने लावही जे आखान-आखा घोड़ा पोर बहण्या, मनगमता जुवान अदीकार्या, अने कंय भाती ना डायला, मुख्या अने नामह़ाद्या अदमी से। तीहया माणहु हत्यार, घोड़ागाड्या, छेकड़ी-गाडी अने देस-देस ना माणहु ना टोळा लीन तारी पोर हमलो करहे; अने ढाळ अने भाला अने लुहड़ा नी टोपी पेरीन तारा वीरोद मे च्यारो-मेर हालर बणावहे; अने में तीमनात हात मे नीयाव नु काम ह़ोपही, अने तीहया आह़फा-आह़फाम ना नेम नी अनसारे तारो नीयाव करहे। में तारी पोर रीह करही, जीनी सी तीहया रीह भेळ तारी ह़ाते वेहवार करहे। तीहया तारा नखरा अने कांटा ने तोड़ लेहे, अने तारु जे बी बच रेहे तीने तलवार वेर मार नाखहे। तीहया तारा सोरा-सोर्या ने हापकी लीजहे, अने तारु जे बी बच रेहे, तीहयु आक्ठु मे धप जहे। तीहया तारा लुगड़ा नीकाळीन तारु घटाळु-घटाळु वजन हापकी ली जहे। आहयी रीते में तारो मोट्लो पाप अने जे रंडी नु काम तु मीस्र देस मे ह़ीकली हती, तीने बी तने छोड़ावही, आञे तक के तु तारा डोळा तीमनी भणीन नी फीरवे अने नी मीस्र देस ने अळी फोम करे।”
काहाके मालीक यहोवा तने आसम केय: “देख, में तने तीमना हात मे ह़ोपही जीमनी सी तु दुस्मनी राखे अने जीमनी सी तारु मन फीर जेलु से; अने तीहया तारी ह़ाते दुस्मनी सी वेहवार करहे, अने तारी आखी कमाय हापकी लेहे, अने तने नांगरली करीन छोड़ देहे, अने तारु डील ने उगाड़वा सी तारु छीनाळु अने मोट्लो पाप उजन्तो हय जहे। आहया काम तारी ह़ाते आनीन करते करहे काहाके तु बीजा राज्य नी पसळ छीनाळ्याण ने तेम हय जी, अने तीमना मुरत्या पुंजीन वीटळ जी। तु तारी बेनेह नी वाट पोर चाले; आहया कारण सी में तारा हात मे तीना कटवरान तेवो कटवरो आपही।”
मालीक यहोवा आसम केय:
“तारी बेनेह ना कटवरा मे गेथु तने पीवा पड़हे,
जे उंडो अने चवड़ो से; तारी हाही अने ठट्टा उड़ावहे,
काहाके तीहया कटवरा मे घणु ढेरकु ह़माय।
तु माण अने दुख मे छाक जही।
तु तारी बेनेह सामरी ना कटवरा ने,
मतलब वहराड़न्यु अने उजाड़ ने पीन छाक जही।
तीनी मे गेथी तु तेड़ो-तेड़ो पीही,
अने तीना ठीकरा ने बी चावही अने तारी छाती ने घाव लगाड़ही;
काहाके मेंत आसम केदलो से,
मालीक यहोवा आसमेत केय।”
तु जे मने भुलाड़ नाखली से, अने तारु मोडु मारी भणी गेथु फीरवी लेदली से, “करीन हाव तु खुदेत आह़फी ना मोट्ला पाप अने छीनाळु नो भार उचल, मालीक यहोवा नो आहयोत बोल से।”
बेम बेनेह ने भगवान नो डंड
यहोवा मने केदो: “ए माणेह नी अवल्यात, ह़ु तु ओहोला अने ओहोलीबा नो नीयाव करही? ता अळतेण तीना आखा गलत काम तीने देखाड़ दे। काहाके तीहया छीनाळु करला से, अने तीमना हातु मे लोय लागलु से; तीहया आह़फाम ना मुरत्या ह़ाते छीनाळु कर्या, अने आह़फाम ना सोराम ने जे मारी सी पयदा हयला, तीहया मुरत्या अगळ खत्तम हयवा करीन बादा चड़ावला से। अळतेण तीहया मारी ह़ाते एवो वेहवार बी कर्या के तीनीत ह़ाते मारा चोखला जागा ने बी वीटाळ देदा अने मारा अराम ना दाड़ा ने वीटाळला से। तीहया आह़फाम ना सोराम ने तीमना मुरत्या अगळ बादा चड़ावीन तीहयात दाड़े मारा चोखला जागा ने वीटाळवा करीन तीनी मे भरायी। देख, तीहया आहया भाती नु काम मारा घोर नी मोय करला से।
“तीहया सेटा रीन अदमीम ने नेवतु आपीन बोलाया, अने तीहया आया बी। तीमनी जुगु तु उंगळीन, डोळा मे काजळ ह़ारीन, वजन पेरीन; घटाळी पलंग पोर बह री; अने तारी अगळ एक टेबल लागली हती, जीनी पोर तु मारु धुप अने तेल मेकलु हतु। ता तीनी ह़ाते बेफीकर्या माणहु नी भीड़ नी कचाट ह़मळाय पड़ी, अने तीहया ह़ुदला माणहु नी ह़ाते जंगल मे गेथा बोलावला दारकुट्टा माणहु बी हता; तीहया तीहयी बेम बेनेह ना हातु मे कामळ्या पेराया, अने तीमना मुंडा पोर घटाळ्ळा मुकुट मेक्या। ता जे छीनाळु करते-करते डायी हय जेली हती, तीना बारा में की उठ्यो, हाव ते तीहया तीनीत ह़ाते छीनाळु करहे। काहाके तीहया तीनीन्तां आसम ज्या जेम माणहु रंडीन्तां जाय। तेमेत तीहया ओहोला अने ओहोलीबा नाम ना मोट्ला पापी बयरान्तां ज्या। अने धरमी माणहु छीनाळ्याण अने हत्याराम नी लायक ओहोला अने ओहोलीबा नो नीयाव करे; काहाके तीहया छीनाळ्याण छे, अने तीमना हातु मे लोय लागलु से।” आहया कारण सी भगवान यहोवा आसम केय: “में एक भीड़ सी तीमनी पोर हमलो कराय्न तीमने आसम करही के तीहया काठी वेला मे फीरहे अने तीमने लुटहे। तीहयी भीड़ ना माणहु तीमने दगड़ाटहे तीमने तलवार वेर तोड़ नाखहे; ता तीहया तीमना सोरा-सोरी ने मारीन तीमना घोरु ने बी आक्ठु धपाड़ीन धपाड़ देहे। आहयी रीते में मोट्ला पाप ने देस मे गेथो सेटो करही, अने आखा बयरा ह़ीकापण हात करीन तमारीन तेवो मोटो पाप करवा सी बचीन रेहे। तमारो मोट्लो पाप तमारात मुंडे पड़हे; अने तमु पक्का तमारा मुरत्या ना पापु नो भार उचलहु; अने ता तमु जाण लेहु के में भगवान यहोवा से।”
Source notes (2)
- Footnote ओहोला तीनो आसरो लेवा नो जागो
- Footnote ओहोलीबा मारो आसरो लेवा नो जागो
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.