Paliya Bible
यहेजकेल 20
भगवान नी ईच्छा अने माणहु नी चुनोती
ह़ातवा साल ना पांचवा मयना ना दहवा दाड़े ईस्रायल ना थोड़ाक डायला यहोवा पांह जपाप करवा करीन आया, अने मारी अगळ बह ज्या। ता यहोवा नो आहयो बोल मारीन्तां पुग्यो: “ए माणेह नी अवल्यात,” ईस्रायल ना डायला ने आहयु के, मालीक यहोवा आसम केय, ह़ु तमु मारी पांह जपाप करवा आवला से? मालीक यहोवा आसम केय के मारा जीवाय नी ह़ाम, तमु मारी ईच्छा कदी नी जाण सको।
ए माणेह नी अवल्यात, ह़ु तु तीनो नीयाव नी करे? ह़ु तु तीमनो नीयाव नी करे? तीमना आड़ा-बुड़ाम ना ह़ीगी आवे एवा काम ईमने देखाड़ दे, अने तीमने के, मालीक यहोवा आसम केय: जे दाड़े में ईस्रायल ने टाळ लेदो, अने याकुब ना घोराणु सी ह़ाम खादो, अने में, मीस्र देस मे तीमनी पोर मने उजन्तो कर्यो, अने तीमने ह़ाम खाय्न केदो, में तमारो भगवान यहोवा से। तीहयात दाड़े में तीमनी ह़ाते आहयी बी ह़ाम खादो, के में तमने मीस्र देस मे गेथा नीकाळीन एक देस मे पुगाड़ही, जीने में तमारी जुगु टाळ लेदलो से; तीहयु आखा देसु मे आखा सी वारु से, अने तीनी मे दुद अने मोद ना झोरु वये। अळतेण में तीमने केदो, जे ह़ीगी आवे एवी चीज पोर तमारी मे गेथा आखा नी नींगा लाग री, तीमने नाख देवो; अने मीस्र ना मुरत्या वेर आह़फाम ने ना वीटाळो; अने मेंत तमारो भगवान यहोवा से। पण तीहया मारी ह़ाते धोको कर्या, अने मारी एक बी वात ह़मळवा नी चाह्या; जे ह़ीगी आवे एवी चीज पोर तीमनी नजर लागली हती, तीहयी चीज ने कोय नाख्यु नी, अने नी मीस्र ना मुरत्या ने छोड़्या। ता में केदो, में आहयात मीस्र देस नी वच मे तमारी पोर मारी रीह नीकाळही अने आखी खीज देखाड़ही। ते बी में मारा नाम ना कारण सी आसम कर्यो के जीमनी वच मे तीहया हता, अने जीमनी देखणते में तीमने मीस्र देस गेथा नीकळवा करीन खुद ने तीमनी पोर उजन्तो कर्यो तीहया राज्य नी अगळ तीहया वीटळ्ळा नी ठेरे।
में तीमने मीस्र देस मे गेथा नीकाळीन जंगल मे ली आयो। तां तीमने में रीती भाती देखाड़्यो अने मारा नेम बी देखाड़्यो के जे माणेह तीमने माने, तीहयो तीमना कारण सी जीवत्लो रेहे।1 अळतेण में तीमनी जुगु अराम ना दाड़ा बी ठेरायो जे मारी अने तीमनी वच मे सेलाणी ठेरे; के तीहया जाणे के में यहोवा तीमनो चोखो करवा वाळो से। ते बी ईस्रायल नु घोराणु जंगल मे मारी ह़ाते धोको कर्यु; तीहया मारी रीती पोर नी चाल्या, अने मारा नेम ने नीकार देदा, जीमने कदीम माणेह माने ता तीहयो तीमना कारण जीवत्लो रेहे; अने तीहया मारा अराम ना दाड़ा ने घणो जादा वीटाळ नाखला से. ता मे केदो, में जंगल मे मारी रीह तीमनी पोर नीकाळीन तीमने खत्तम कर देही। पण में मारा नाम ना कारण सी आसम कर्यो के तीहया ते राज्य नी अगळ, जीमनी देखणते में ईमने नीकाळ लावलो हतो, वीटळ्ळा नी ठेरे। अळतेण में जंगल मे तीमनी ह़ाते ह़ाम खादो के जे देस में तीमने आप देदो, अने जे आखु देस मे गेथु वारलु देस से, जीनी मे दुद अने मोद ना झोर वये, तीनी मे तीमने नी पुगाड़ु, काहाके तीहया मारा नेम ने हेटा ह़मज्या अने मारी रीती-भाती पोर नी चाल्या, अने मारा अराम ना दाड़ा ने वीटाळला हता; आनीन करते के तीमना मन तीमना मुरत्या भणीन लागलु र्यु।
“ते बी में तीमनी पोर दया नी नींगा नाख्यो, अने तीमने खत्तम नी कर्यो, अने नी जंगल मे तीमने पुरी रीते खत्तम कर्यो। अळतेण में जंगल मे तीमनी अवल्यात ने केदो, आह़फाम ना आड़ा-बुड़ाम नी रीती-भाती पोर ना चालो, अने नी तीमनी रीती ने मानो अने नी तीमना मुरत्या पुंजीन आह़फाम ने वीटाळो। में तमारो भगवान यहोवा से, मारी रीती-भाती पोर चालो, अने मारा नेम ने मानवा मे चेतीन रेवो, अने मारा अराम ना दाड़ा ने चोखला मानो के तीहया मारी अने तमारी वच मे सेलाणी ठेरे, जीनी सी तमु जाणो के में तमारो भगवान यहोवा से।
“पण तीमनी अवल्यात बी मारी ह़ाते धोको कर्या; तीहया मारी रीती-भाती पोर नी चाल्या, अने नी मारा नेम ने मानवा मे चेतीन र्या; जीमने कदीम माणेह माने ता तीहयो तीमना कारण जीवत्लो रेहे; मारा अराम ना दाड़ा ने तीहया वीटाळ देदा। ता में केदो, में जंगल मे मारी रीह तीमनी पोर नीकाळही मारी रीह देखाड़ही। ते बी में मारो हात पासो कर लेदो, अने मारा नाम कारण सी आसम कर्यो, के तीहया माणहुम नी अगळ, जीमनी देखणते में तीमने नीकाळ लावलो हतो, तीहया वीटळ्ळा नी ठेर्या। अळतेण में तीमनी ह़ाते जंगल मे ह़ाम खादो, के में तमने राज्य-राज्य मे रीवण्या-तीवण्या करही, अने देस-देस मे खोळवी देही,2 काहाके तीहया मारा नेम ने नी मान्या, अने मारी रीती-भाती ने रीकामा ह़मज्या, मारा अराम ना दाड़ा ने वीटाळ्या, अने आह़फाम ना आड़ा-बुड़ाम ना मुरत्या भणीन तीमना डोळा लागला र्या।
“अळतेण में तीमनी जुगु एवी-एवी रीती-भाती ठेरायो जे वारली नी हती अने एवी-एवी रीती जीमना कारण सी तीहया जीवत्ला नी री सक्या। मतलब तीहया तीमना आखा गेथा मोट्ला सोरा ने आक्ठु मे होम बादा चड़ाव्वा बाज ज्या; आहयी रीते में तीमने तीमनीत भेट नी लारे वीटाळ्यो जीमनी सी तीमने अवल्यात वगर ना कर देम; अने ता तीहया जाण लेहे के में यहोवा से।
“ए माणेह नी अवल्यात, तु ईस्रायल ना घोराणा ने के: मालीक परभु आसम तमारा आड़ा-बुड़ा आनी मे बी मारो वाक काड्या के तीहया मारी ह़ाते धोको कर्या। काहाके जत्यार में तीमने तीहया देस मे पुगाड़्यो, जीने तीमने आपवा नी ह़ाम में तीमनी ह़ाते खादलो हतो, ता तीहया एक-एक उची टेकड़ी अने एक-एक झाजला झाड़ पोर नींगा नाखीन तांत तीमनी मेलबादा चड़ाव्वा बाज ज्या; अने तां रीह लगाड़वा वाळी भेट चड़ाव्वा बाज ज्या अने तां तीमनो वारलु गंदायण्यु तेल धपाड़ता हता, अने तीमनी पीवा नी बादा रेचवता हता। ता में तीमने पुछ्यो, ‘जे उचा जागा’ मे तमु जावो, हीय्यु ह़ु से? आनी सीत तीनु नाम आज तक बामा केवाड़े। करीन ईस्रायल ना घोराणा ने के, मालीक यहोवा तमने आहयु पुछे: ह़ु तमु बी तमारा आड़ा-बुड़ा नी रीती पोर चालीन वीटळीन, अने तीमना ह़ीगी आवे एवा कामु नी अनसारे छीनाळ्याण ने तेवा काम करो? आज तक जत्यार-जत्यार तमु तमारी भेट चड़ावो अने तमारा सोरा ने होम बादा चड़ावो, तत्यार-तत्यार तमु तमारा मुरत्या ना कारण सी वीटळ्ळा ठेरो। ए ईस्रायल ना घोराणा, ह़ु तमु मने पुछ सकहु? मालीक यहोवा नो आहयो बोल से, मारी जीवाय नी ह़ाम तमु मारी ईच्छा ने जाणी नी सको। जे वात तमारा मन मे आवे, आमु लाकड़ा ना अने दगड़ा ना मुरत्या ना उपाह पाळन्या बणीन राज्य-राज्य अने देस-देस ना कुळ ने तेवा हय जहु, तीहयी कानी बी भात्ये पुरी नी हये। भगवान डंड आपे अने माप बी करे।
भगवान डंड आपे अने माप बी करे
“मालीक यहोवा आसम केय, मारी जीवाय नी ह़ाम में पक्को ताखत वाळा हात अने बड़ावला हात सी, अने पुरी लगाड़ली रीह भेळ तमारी पोर राज करही। में ताखत वाळा हात अने अगो करला हात वेर अने लागली खीज भेळ तमने देस-देस ना माणहु मे गेथा अलग करही, अने तीहया देस मे जीनी मे तमु रीवण्या-तीवण्या हय जेला हता, एक्ठा करही; अने में तमने ‘देस-देस ना माणहु ना जंगल मे ली जाय्न,’ तां आमने-सामने तमारो नीयाव करही। जेम में तमारा आड़ा-बुड़ा नो मीस्र देस ना जंगल मे नीयाव करतो हतो, तीहयीत रीते में तमारो बी नीयाव करही,” मालीक यहोवा आसमेत केय।
“में तमने गुवाळ्यान तेम छाटवा अने गणवा करीन लाकड़ी तळे चलाड़ही, अने में तमने वायदा ना बंदन मे बांदही; में तमारी मे गेथा तीहया माणहु ने सेटा करही, जे बक-बक करन्या अने पापी से। अने तमने चोखा करही तीमने तीहया देस मे गेथा जीनी मे तीहया हमणे री र्या, में नीकाळ लेही, पण ईस्रायल ना देस मे अळी पासा जवा नी देम। ता तमु जाण लेहु के में यहोवा से।”
ए ईस्रायल ना घोराणा तमने ते मालीक आसम केय: “जाय्न आह़फा-आह़फाम ना मुरत्यान उपाह पाळो; अने कदीम तमु मारी वात नी ह़मळो, ता अगा बी आहयुत कर्या करो; पण मारा चोखला नाम ने तमारी भेटु अने मुरत्या नी लारे अळी वीटाळजो नी। काहाके मालीक यहोवा आसम केय के ईस्रायल नु आखु घोराणु आह़फाम ना देस मे मारा चोखला बड़ा पोर, ईस्रायल ना उचा बड़ा पोर, पुरुन पुरु घोराणु मारी भक्ती करहे; तां में तीमनी सी खुस हयही, अने तांत में तमारी उचल्ली भेट अने चड़ावली वारली-वारली चीज, अने तमारी आखी चोखी करली चीज तमारी पांह लीया करही। जत्यार में तमने देस-देस ना माणहु मे गेथा अलग करही अने तीहया देस मे जीमनी मे तमु रीवण्या-तीवण्या हय र्या, एक्ठा करही, ता तमु ने वारु गंद वाळु गंद जाणीन आवरी लेही, अने बीजा माणहु नी अगळ तमारी लारे चोखलो ठेरही। जत्यार में तमने ईस्रायल ना देस मे पुगाड़ही, जीने आपवा नी ह़ाम में तमारा आड़ा-बुड़ा ह़ाते खादलो हतो, ता तमु जाण लेहु के में यहोवा से। ता तमु तमारी चाल-चलण ने अने आह़फाम ना आखा काम ने जीमने करवा सी तमु वीटळ जेला से फोम करहु, अने आह़फाम ना आखा गलत कामु ना कारण सी आह़फाम नी नींगा मे ह़ीगी आवे एवा ठेरहु। ए ईस्रायल ना घोराणा, में तमारी गलत चाल-चलण अने बगड़ला कामु नी अनसारे डंड नी आपु, पण मारा नाम ना कारण सी तमारी ह़ाते दयाळ्ळो वेहवार करही ता तमु जाण लेहु के में यहोवा से।” मालीक यहोवा आसमेत केय।
दखणाव मे आक्ठु
यहोवा नो आहयो बोल मारीन्तां पुग्यो: “ए माणेह नी अवल्यात,” तारो मुख दखणाव भणीन फीरव, “दखणाव देस ना वीरोद मे बोल ह़मळाव, अने दखणाव देस ना जंगल ना बारा मे भगवान वगे गेथी वात कर; अने दखणाव देस ना जंगल ने के; यहोवा नो बोल ह़मळ: मालीक यहोवा आसम केय, में तारी मे आक्ठु लावही, अने तारी मे ह़ु लील्ला, ह़ु ह़ुकला, जेतरा झाड़का से, आखा ने तीहयु आक्ठु खत्तम कर देहे; तीनी होळो-होळो आच नी ओलाये, अने तीना कारण सी दखणाव गेथा धुराव तक ना आखा ना मोडा अचवाय जहे। ता आखा जीव ने मालम पड़ जहे के आहयु आक्ठु यहोवा धपाड़लो से; अने तीहयु कारु नी ओलाये।”
ता में केदो, “ए भगवान यहोवा! माणहु ते मारा बारा मे कीया करे के ह़ु तीहयो दाखलानेत केवा वाळो नी हय?”
Source notes (2)
- Cross-reference लेव्यवेवस्था 18:5
- Cross-reference लेव्यवेवस्था 26:33
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.