Paliya Bible
यहेजकेल 2
भगवान वगे गेथी वात केवा वाळा ना रुप मे यहेजकेल ने भगवान नु बोलावणु
तीहयु मने केदु, “ए माणेह नी अवल्यात, तारा पोगु ना भरहे उबो हय, अने में तारी ह़ाते वात करही।” जेमेत तीहयु मने आहयु केदु, तेमेत आत्मा मारी मे ह़माय्न मने पोगु ना भरहे उबो कर देदी; अने जे मारी ह़ाते वात करतु हतु तीनी ह़मळ्यो। तीहयु मने केदु, “ए माणेह नी अवल्यात, में तने ईस्रायलीम ने तां मतलब बकबक करवा वाळा माणहुन्तां मोकलु, जे मारा वीरोद मे बकबक करला से; तीमना आड़ा-बुड़ा अने तीहया बी आज ना दाड़े तक मारा वीरोद मे गुनो करता आय र्या। आहयी पीड़ी ना माणहु जीमनीन्तां में तने मोकलु, तीहया वण-लाज्या अने हेटाळ्ळा से; अने तु तीमने केजे, ‘मालीक यहोवा आसम केय,’ आनी सी तीहया, जे बकबक करवा वाळा घोराणा ना से, भले तीहया ह़मळे के नी ह़मळे, ते बी तीहया आहयु जाण लेहे के अमारी वच मे एक भगवान वगे गेथी वात केवा वाळो उजन्तो हयलो से।
“ए माणेह नी अवल्यात, तु तीमनी सी नी बीहजे; भले तने काटा, कटाळस्या अने वीसा नी वच मे बी रेवा पड़े, ते बी तीमना बोलु सी नी बीहजे; तीहया धोको देण्या घोराणा ना से, ते बी नी ते तीमना बोलु सी बीहजे, अने नी तीमनु मोडु देखीन तारु मन काचु हये। करीन तीहया ह़मळे के नी ह़मळे; ते बी तु मारा बोलु तीमने केजे, तीहया ते घणा धोको देण्या से।
“पण ए माणेह नी अवल्यात, जे में तने केम, तीने तु ह़मळ ले, तीहया धोको देण्या घोराणान तेम तु बी धोको देण्यो नी बणजे, जे में तने आपु, तीने मोडु उगाड़ीन खाय ले।” ता में नींगा नाख्यो अने ह़ु देख्यो, के मारी भणीन एक हात नाम्बो हय र्यो अने तीनी मे एक कीताप1 से।2 तीने तीहयो मारी अगळ उगाड़ीन फेलायो, अने तीहयी बेम ह़ोड़ लीखली हती; अने जे तीनी मे लीखलु हतु, तीहयु वेला अने कलपवा अने दुख भर्या बोल हता।
Source notes (2)
- Footnote गुचवली चामड़ा नी चीट्ठी
- Cross-reference परकासीतवाक्य 5:1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.