Paliya Bible
यहेजकेल 14
भगवान मुर्ती पुजा करवा वाळा ने चेतावे
अळतेण ईस्रायल ना थोड़ाक डायला मारीन्तां आवीन मारी अगळ बह ज्या। ता यहोवा नो आहयो बोल मारीन्तां पुग्यो, “ए माणेह नी अवल्यात” आहया माणहु ते आह़फाम ना मुरत्या आह़फाम ना मन मे वह़ाड़्या, अने आह़फाम नी अधरम नी ठोकर आह़फाम नी अगळ मेक र्या; अळतेण तीहया ह़ु मने कंय बी पुछ सकहे ह़ु?
“करीन तु तीमने के, मालीक यहोवा आसम केय: ईस्रायल ना घोराणा मे गेथा जे कोय आह़फाम ना मुरत्या आह़फाम ना मन मे वह़ाड़ीन, अने आह़फाम नी अधरम नी ठोकर आह़फाम नी अगळ मेकीन भगवान वगे गेथी वात केवा वाळान्तां आया, तीने में यहोवा, तीना घणा ढेरका मुरत्या नी अनसारेत जपाप आपही, जीनी सी ईस्रायल नु घोराणु, जे आह़फाम ना मुरत्या नी लारे मने छोड़ीन सेटु हय जेलु से, तीमने में तीमनात मन नी लारे फसाड़ही।
“करीन ईस्रायल ना घोराणा ने के, मालीक यहोवा आसम केय: मन फीरावो अने मुरत्या भणी गेथा मोडा फीरवो; अने तमारा आखा गलत कामु ने छोड़ देवो।
“काहाके ईस्रायल ना घोराणा मे गेथा अने तीनी वच मे रेवा वाळा बीजा देस वाळा मे गेथा कोय बी काहा नी हय, जे मारी पसळ हयवा छोड़ीन आह़फाम ना मुरत्या ने आह़फाम ना मन मे वह़ाड़े, अने आह़फाम नी अधरम नी ठोकर ने आह़फाम नी अगळ मेके, अने ता मने आह़फाम नी कानी वात पुछवा करीन भगवान वगे गेथी वात केवा वाळान्तां आवे, ता तीने में यहोवा खुद जपाप आपही। में तीहया माणेह ना वीरोद मे हय्न तीने घबराड़ही, अने तीने सेलाणी ठेरावही; अने तीनी कहावत अगी फेलावही अने तीने मारा माणहु मे गेथो खत्तम करही; ता तमु जाण लेहु के मे यहोवा से।
“कदीम कानो भगवान वगे गेथी वात केवा वाळो धोको खाय्न कोय बोल केदो हय, ता जाणजो के में यहोवा तीहया बोल ने धोको देदलो से; अने में मारो हात तीना वीरोद मे नाम्बो करीन तीने मारा माणहु ईस्रायल मे गेथो खत्तम करही। तीहया आखा माणहु आह़फा-आह़फाम ना अधरम नो बोज उठावहे, मतलब जेम भगवान वगे गेथी वात केवा वाळा पांह पुसवा वाळो नो अधरम ठेरहे, तेमेत भगवान वगे गेथी वात केवा वाळा नो बी अधरम ठेरहे। आनीन करते के ईस्रायल नु घोराणु अगु चालीन मारी पसळ चालवा नी छोड़े अने नी आह़फाम ना भाती-भाती ना गुना नी लारे अगा चालीन वीटळ्ळा बणे; पण तीहया मारा माणहु बणे अने में तीमनो भगवान ठेरु, मालीक यहोवा आसमेत केय।”
नुहो, दानीयल, अने अय्युब
ता यहोवा नो आहयो बोल मारीन्तां पुग्यो, “ए माणेह नी अवल्यात, जत्यार काना देस ना माणहु मने धोको दीन पापी हय जाय, ता में मारो हात तीना वीरोद मे नाम्बो करीन तीनु खाणु-पीणु ने बंद करु, अने तीनी मे काळ पाड़ीन तीनी मे गेथा माणहु अने जानवरु बेम ने खत्तम करु, ता भले तीनी मे नुह, दानीयल, अने अय्युब आहया तीनोव अदमी हय, ते बी तीहया आह़फाम ना धरम नी लारे तीमना जीव ने एतरात बचाड़ सकहे; मालीक यहोवा आसमेत केय।
“कदीम में काना देस मे जंगली जानवरु ने मोकलु जे तीने ह़ुनह़ान करीन उजाड़ नाखे, अने जानवरु ना कारण सी तीनी मे हय्न कोय नी जाय, ता भले तीनी मे तीहया तीन अदमी हय, ते बी मालीक यहोवा आसमेत केय, मारा जीवाय नी ह़ाम, नी तीहया सोरा अने नी सोर्या ने बचाड़ सके, तीहया एतरात एखला बचहे; पण देस उजाड़ हय जहे।
“कदीम में तीहया देस पोर तीना वेरीम नी लारे तलवार वेर हमलो करावीन केम, ‘आहया देस मे तलवार वेर मारो’ अने आहयी रीते मे तीनी मे गेथा माणहु अने जानवरु खत्तम करु, ता भले तीनी मे तीहया तीन अदमी बी हय, ते बी मालीक यहोवा आसमेत केय, मारी जीवाय नी ह़ाम, नी ते तीहया सोरा ने बचाड़ सके अने नी सोर्या ने बचाड़ सके, तीहया एखलात बचहे।
“कदीम में तीहया देस मे गरा फेलावु अने तीनी पोर मारी रीह नीकाळीन तीनु लोय आसम वयाड़ु के तां ना माणहु अने जानवरु बेम खत्तम हये, ता भले नुहो, दानीयल अने अय्युब बी तीनी मे हय, ते बी, यहोवा आसमेत केय, मारी जीवाय नी ह़ाम, तीहया नी ते सोरा ने अने नी सोर्या ने बचाड़ सके, आह़फाम ना धरम नी लारे तीहया तीमना एतरात जीव ने बचाड़ सकहे।
“काहाके मालीक यहोवा आसम केय: में यरुसलेम पोर मारा च्यारोव डंड पुगाड़ही, मतलब तलवार, काळ, जंगली जानवर अने गरा, जीमनी सी माणहु अने जानवर आखा तीनी मे गेथा खत्तम हये।1 ते बी तीनी मे थोड़ाक सोरा-सोरी बचहे जे तां गेथा नीकाळीन तमारीन्तां पुगाड़हे, अने तमु तीमनी चाल-चलण अने कामु ने देखीन तीहयी गरा ना बारा मे जे में यरुसलेम पोर नाखही, मतलब जेतरी गरा मे तीनी पोर नाखही, तीहयी आखी ना बारा मे सांती हात करहु। जत्यार तमु तीमनी चाल-चलण अने काम देखो, ता तीहया तमारी सांती नो कारण बणहे, अने तमु जाण लेहु के में यरुसलेम मे जे कंय कर्यो, उदड़ेत नी कर्यो तीनो कारण हतो, मालीक यहोवा आसमेत केय।”
Source notes (1)
- Cross-reference परकासीतवाक्य 6:8
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.