Paliya Bible
एस्तर 6
राजा नी लारे मोर्दके नी ईज्जत करनु
तीहयी राते राजा ने नींदर नी आयी, करीन तीना हुकम सी खांदानी नी कीताप ने लाया, अने भणीन राजा ने ह़मळाया। तीनी मे आहयु लीखलु जड़्यु, के जत्यार राजा सयर्स ना अदीकार्या जे झापले पेहरो देण्या बी हता, तीमनी मे गेथा बीगतान अने तेरेस नाम ना बे जणा तीने मारवा नी वात करला हता तीने मोर्दके उजन्तो करलो हतो।1 ता राजो पुछ्यो, “आनी बदले मोर्दके ने ह़ु बड़ाय अने ईलाम आप्या?” राजा ना जे पावर्या तीनी सेवा-चाकरी करता हता, तीहया तीने जपाप आप्या, “तीनी जुगु कंय बी नी कर्या।”
राजो पुछ्यो, “आंगणा मे कोय से?” तीहयीत टेमे हामान राजवाड़ा ना आंगणा मे आहयी हेर करीन आवलो हतो के जे खम्बो तीहयो मोर्दके जुगु तीयार करावलो हतो, तीनी पोर तीने टांग देवा नी वात राजा ह़ाते करे। ता राजा नो पावर्यो तीने केदो, “आंगणा मे ते हामान उबो हय र्यो।” राजो केदो, “तीने मोय बोलाय लावो।”
जत्यार हामान मोय आयो, ता राजो तीने पुछ्यो, “जे माणेह नी राजो बड़ाय करवा हींडे ता तीनी जुगु ह़ु करवा वारु रेहे?” हामान आहयु सोचीन के मारी गेथी जादा राजो कोय नी बड़ाय करवा हींडे। तीहयो राजा ने जपाप आप्यो, “जे माणेह नी बड़ाय राजो करवा हींडे, तीनी जुगु राजा ना लुगड़ा लावे, जे राजो पेरे, अने एक घोड़ो बी, जीनी पोर राजो बहे, अने तीना मुंडा पोर राज-मुकुट मेके तीहयु बी लावे। अळतेण तीहया लुगड़ा, अने तीहयो घोड़ो राजा ना काना मोट्ला अदीकार्या ने ह़ोपे, अने जीनी बड़ाय राजो करवा हींडे, तीने तीहया लुगड़ा पेरावे, अने तीहया घोड़ा पोर बहाड़ीन ह़ेर ना चोवराया पोर तीने फीरावे; अने तीनी अगळ-अगळ आहयु परच्यार करे, ‘जीनी बड़ाय राजो करवा हींडे, तीनी ह़ाते आसमेत करहे।’”
राजो हामान ने केदो, “उतवाळ करीन तु केदो तीनी अनसारे तीहया लुगड़ा अने घोड़ा ने लीन, तीहया यहुदी मोर्दके ह़ाते जे राजवाड़ा ना झापला पोर बह्या करे, तेमेत कर। जेम तु केदलो से तीनी मे कंय बी कमी नी रेवा जोवे।”
ता हामान तीहया लुगड़ा, अने तीहया घोड़ा ने लीन, मोर्दके ने पेरायो, अने तीने घोड़ा पोर बहाड़ीन, ह़ेर ना चोवराया पोर आहयी रीते आड़तो जाय्न फीरायो, “जीनी बड़ाय राजो करवा हींडे आसमेत करहे।”
ता मोर्दके ते राजवाड़ा ना झापले पासो जत र्यो पण हामान दुखी हय्न मुंडु ढाकीन साटोत आह़फा ना घोर ज्यो, हामान तीनी लाडी अने तीना आखा दोस्तीदार्या ने तीहयु आखु जे तीनी ह़ाते हयु देखाड़्यो। ता तीना अक्कल वाळा दोस्तीदार्या अने तीनी लाडी जेरेस तीने केदा, “मोर्दके जीने तु नीचो देखाड़वा हींडे, कदीम तीहयो यहुदीम नी कुळी मे नो से, ता तु तीने हराय नी सके तीनी सी पुरी रीते हारीत जही।”
हामान नी मोत
तीहया तीनी ह़ाते वात करवात बाज र्या हता के राजा ना गतराड़ा आवीन हामान ने एस्तर नु खाणु जुगु उतवाळ करीन ली जती र्या।
Source notes (1)
- Cross-reference एस्तर 2:12,22
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.