Paliya Bible
सभोपदेसक 6
एक बुराय जीने में धरती पोर देखलो से, तीहयी माणहु ने घणी भारी लागे: काना माणेह ने भगवान माल-धन अने ईज्जत आञे लग आपे, के माणेह ने तीनी ईच्छा ना लारे आखु कंय जड़ जाय, तीने कानी चीज नी कमी नी रेय। पण भगवान तीने तीनी मे गेथु खावा नी देय, तीने कोय बीजो खाय; आहयो फालतु अने खतरनाक दुख से। कदी काना माणेह ना ह़ोव सोरा हय, अने घणा साल जीवे अने तीनी उमर बड़ जाय, पण तीनो जीव खुस नी रेय अने मरवा ना बाद तीनी रीती-भाती बी नी करे, ता में केम, के एवा माणहु गेथा आदरीतु पयदा हयवा वाळु सोरु वारु से। काहाके तीहयु फालतुत आयु, अने अंदारला मे जत र्यु, अने तीनु नाम बी अंदारला मे ह़ताय ज्यु; अने नी ते दाहड़ु ने देख्यु, अने कानी चीज ने बी नी जाण सक्यु; ते बी आने तीहया माणेह गेथो जादा सुक जड़्यो भले माणेह बे हजार साल जीवे, अने जीवाय नो सुक नी लेय, ता तीने जादा जीव्वा नो ह़ु फायदो? आखा माणहु जीवाय नी आखरी मे एकीत जागा मे जाय। माणेह आखी मेहनत खावा नी लेदे करे, ते बी तीनु पेट नी भराय। जे अक्कल वाळो से तीहयो वण-अकल्या सी कानी वात मे बड़ीन से? अने गरीब जे आहयु जाणे के आहयी जीवाय मे कीसम चालवा जोवे, तीहयो बी तीनी सी कानी वात मे बड़ीन से? डोळा सी देख लेवा मन नी ईच्छा सी वारु से; आहयु बी फालतु अने वाहळु ने धरवान तेम से। जे कोय बी माणेह हय, तीनु नाम सुरु मेत पाड़ देदलु हतु: अने माणेह ना बारा मे आहयु उजन्तु कर देदलु हतु के तीहयो कादुत से। अने तीहयो आह़फा सी जादा ताखत वाळा माणेह सी झुमाय नी सकतो। जीवाय ना बारा मे जेतरो वीच्यार करो, तेतरी जीवाय फालतु लागे ता आवी जीवाय सी माणेह ने ह़ु फायदो? काहाके माणेह नी थोड़ीक जीवाय मे जे तीहयो साहळान तेम जीवे, कोय जाणे के तीनी लेदे ह़ु वारु से? काहाके माणेह ने कोय देखाड़ सके के तीनी बाद दुनीया मे ह़ु हयवा वाळु से?
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.