Paliya Bible
सभोपदेसक 10
मरला मोखड़ा ईत्तर ने बगाड़ देय, अने थोड़ीक गंडाय अक्कल अने ईज्जत ने कम कर देय। अक्कल वाळा नु मन वारली वात भणी रेय पण वण-अकल्या नु मन बुराय भणी लागलु रेय। वण-अकल्यो जत्यार वाटे चाले ता तीनु चालनु सीत तीनी गंडाय मालम पड़ जाय। जीनी सी आखा माणहु देख लेय के तीहयो वण-अकल्यो से। कदी राज करन्या नु मन तमारी सी नराज हय जाय, ता तमु तमारो जागो नी सोड़जो, काहाके धीरज धरवा सी मोटा-मोटा गुना बी माप कर देय। में धरती पोर एक बुराय ने देखलो से, आहयी बुराय राज करन्या नी गलती सी हये। वण-अकल्या माणहु ने उचा जागा पोर बहाड़ देय, अने पोमत्ला माणहु ने हेटा बहाड़े। में पावर्या ने घोड़ा पोर बहीन जतले देखलो से, अने राज करन्या ने पावर्यान तेम चालीन जतले देखलो से।
जे बीजा नी लेदे खाडो खोदे तीहयोत तीनी मे पड़हे, अने जे दीवाल वेखड़हे तीने गड़हो चावहे।1 कदीम तमु दगड़ा नी दीवाल ने वेखड़हु, ता तमने दगड़ा सी चोट लागहे, अने कदी तमु लाकड़ु चीरता हय ता तमने तीनी सी खतरो रेहे। कदी कुराड़ी बुठड़ली हय अने माणेह तीने नीहाणे नी, ता तीने वापरवा मे जादा मेहनत लागहे। पण जीकवा ना लेदे अक्कल सी फायदो हये। कदी वीद्या सी पेले गड़हो चाय लेय ता वीद्या बोलवा वाळा सी कंय बी फायदो नी हय? अक्कल वाळा ना बोलु ना कारण दया हये, पण वण-अकल्या ना बोलु ना कारण खत्तम हय जाय। तीहया वात सुरु गेथा गंडायली करे, अने तीमनी वात खत्तम बी गंडायपण सी हये। वण-अकल्या घणी वात बड़ाय-चड़ाय्न केय, ते बी कोय माणेह नी जाणे के अगु ह़ु हयहे, अने कोय नी देखाड़ सके के आनी बाद ह़ु हयवा वाळु से? वण-अकल्या मेहनत सी थाक जाय, आञे तक के तीहयो आहयु बी नी जाणे के ह़ेर मे कीसम जही। ए देस, गरा आय पड़े तारी पोर जत्यार तारो राजो चाकर्यो से अने तीना पावर्या ह़वारे वेगात खाता-पीता हय। ए देस तु जुगाळु से जत्यार तक तारो राजो वारली कुळी नो से अने तारा पावर्या टेम पोर खाया-पीया करे, अने तीहया बी छाकवा करीन नी, पण मजबुत हयवा नी लेदे। जत्यार तु आपणा घोर ने चालवा मे अळहाय करही, ता तीहयु गळहे अने घोर ओदरी जहे। पोरणा-चाकरी हाही-खुसी ना लेदे करे, अने ह़रु सी जीव ने सांती जड़े; पण रुप्या वगर तमु कंय बी नी खाय सकत्ला। राजा ने मन-मन मे बी सराप ना देवो, अने नी पोमत्ला माणेह ने तमारा ह़ुवण्या कोपरा मे सराप देजो; काहाके कोय ह़रग ना चड़ा तारी खबर ने ली जाय सके अने तीने देखाड़ सके के तु तीना बारा मे ह़ु केदो।
Source notes (1)
- Cross-reference भजन सहीता 7:15; नीतीवचन 26:27
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.