Skip to content
BibleKenya

Paliya Bible

सभोपदेसक 1

जीवाय फालतु से

यरुसलेम नो राजा, दावुद नो सोरो अने सबा मास्‌तर ना बोल। सबा मास्‌तर नो आहयो बोल से, “फालतुत फालतु, फालतुत फालतु, आखु कंय फालतुत से।” तीहयी आखी मेहनत जीने माणेह धरती पोर1 करे, तीनी सी तीने ह़ु फायदो हये? एक पीड़ी जाय, अने बीजी पीड़ी आवे, पण धरती जेम से तेम सदा बणली रेय। दाहड़ु उगीन, तीहयु बुडी बी जाय, अने तीहया जागे उतवाळ्‌यु पासु जत रेय जां गेथु तीहयु उगे। वाहळु दखणाव भणी जाय, अने धुराव भणी फीर जाय; तीहयु फीरी-फीरीन पासु तीनी जागा पोर आवती रेय। आखा नंद्‌या एकीत जागा भणीन वळ-वळीन वया करे, तीहया आखा जाय्‌न दर्‌या मे भेसकाय जाय; पण ते बी दर्‌या कदी नी भराय; आखी वात थकाड़ देवा वाळी से; माणेह आना बारा मे देखाड़ी नी सके; नी ते डोळा देखीन आफरे अने नी ते कांटा ह़मळीन भराय सके। जे कंय हयलु हतु तीहयुत अळी हयहे, अने जे कंय बण जेलु से तीनेत अळी बणावहे; अने आखी धरती पोर कंय बी नवलु नी हय। एवी कानी वात से ह़ु, जीना बारा मे माणहु, की सके के देख आहयी नवली वात से? पण आहयु ते आपणी गेथी घणी पेल्‌नी टेम सीत हयतु आय र्‌यु। जे कंय वात पेल्‌ना वारा मे हय चुकी, तीहयी कोय फोम नी रेय, अने अगी हयवा वाळी वात बी तीमनी बाद हयवा वाळा माणहु ने फोम नी रेय।

अक्‌कल फालतु से

में मास्‌तर ईस्‌रायल देस नो राजो हतो, अने यरुसलेम मे राज करतो हतो। में मारु मन लगाड़्‌यो के जे कंय धरती पोर हये, तीनी जानकारी अक्‌कल सी सोची-समजीन मालम करु; आहयु घणु दुख नु काम से के जीने भगवान माणहु जुगु ठेरावलो से के तीहया तीनी मे लागला रेय। में तीहया आखा कामु ने देख्‌यो जे धरती पोर करे; अने में तमने केम, आहयु आखु कंय फालतु से, आहयु आखु वाहळु ने धरवान तेम से। जे डहवाळ्‌ळो से तीहयो ह़ुदर नी सके, अने जे हय नी तीहयु गीणाय नी सके। में मारा मन मे केदो, “देख, जेतरा यरुसलेम मे मारी गेथा पेले हता, तीहया आखा गेथो में घण जादा अक्‌कल हात कर्‌यो; अने मने घणी अक्‌कल अने ग्‌यान जड़ जेलो से।”2 में मारु मन लगाड़्‌यो के अक्‌कल ने जाणु, अने गंडाय अने वण-अक्‌कल ने बी जाणु। मने मालम पड़्‌यु के आहयु बी वाहळु ने धरवान तेवु से। काहाके जादा अक्‌कल भेळ जादा चीन्‌ता बी हये, अने जे आह़फा ना ग्‌यान ने बड़ावे, तीहयो आह़फा ना दुख ने बी बड़ावे।

Source notes (2)
  1. Footnote धरती पोर दाहड़ुन तळे
  2. Cross-reference 1 राजा 4:29-31

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.