Paliya Bible
वेवस्थावीवरन 8
वारलु देस
“जे-जे हुकम में आज तने ह़मळावु तीहया आखा पोर चालवा नी चोकसी करजे, एतरे के तमु जीवत्ला रेवो अने अळी बड़ता रेवो, अने जे देस ना बारा मे यहोवा तमारा आड़ा बुड़ा सी ह़ाम खादलो से तीनी मे जाय्न हकदार्या हय जावो। अने फोम राख के तारो भगवान यहोवा तीहया चाळीह साल मे तने आखा जंगल नी वाट मे सी आनीन करते लीन आवलो से, के तीहयो तने ह़ुवाळो बणावे, अने पारख करीन आहयु जाण लेय के तारा मन मे ह़ु से, अळी के तु तीना हुकमु नो पाळण करे के नी करे। तीहयो तने ह़ुवाळो बणायो, अने भुकलो बी हयवा देदो, बाद मे तीहयो मन्ना बी खवाड़्यो, जीने नी ते तु अने नी तारा आड़ा-बुड़ा जाणता हता, आनीन करते तीहयो तने खवाड़्यो के माणेह नीस्तो रोट्लात सी नी जीवत्लो रेय, पण जे-जे बोल यहोवा ना मोडा सी नीकळे तीमनीत सी तीहयो जीवत्लो रेय। आहया चाळीह साल मे तारा लुगड़ा जुना नी हया, अने नी तारा पोगु ह़ुज्या। अळतेण आह़फा ना मन मे आहयु ते वीच्यार कर, के जीसम कानो बाह आह़फा ना सोरा ने डाटे-फटकारे तेमेत तारो भगवान यहोवा बी तने डाटे-फटकारे। एतरे आपणा भगवान यहोवा ना हुकम नो पाळण करतो जाय्न तीनी वाट पोर चालजे, अने तीनी बीक मान्तो रेजे। काहाके तारो भगवान यहोवा तने एक वारला देस मे लीन जवा बाज र्यो, जां नंदी पाणी सी हमेसा भरायली रेय, अने वारली जागा मे अने बड़ा मे सी नीकळला उंडला-उंडला झोरु नु देस से। अने तीहयु गम, जळगम, अंगुर ना वेला, अंजीरु, अने अनारु नो देस से; अने तेल वाळा जेतुन अने मोद नो बी देस से। तीहया देस मे तु कदी भुकलो नी रेय, अने नी कानी चीज नी कमी रेय; अने तां वाळा दगड़ा मे लुहड़ु से, अने तां ना बड़ा मे सी तु ताम्बु खोदीन नीकाळ सकही। अने तु पेट भरीन खाही, अने तीहया वारला देस ना कारण जे तारो भगवान यहोवा तने आपहे तु तीने जुगाळो मानही।
मालीक ने भुलवा ना खीलाप मे चेतावणी
“एतरे चेतीन रेजे, कंखर आसम नी हये के आपणा भगवान यहोवा ने भुलीन तीना जे-जे हुकम, नेम, अने रीती में आज तने ह़मळावु तीने मानवा छोड़ देय; आसम नी हये के तु खाय्न आफरी जाय, अने वारु-वारु घोर बणावीन तीमनी मे रेवा बाज जाय, अने तारा गाय-बोळद्या अने गाडरा-बोकड़ा नी बड़ोत्री हये, अने तारु ह़ोनु-चांदी, अने तारु आखी भाती नु धन बड़ जाय, तत्यार तारा मन मे मोटाय भराय जाय, अने तु आह़फा ना भगवान यहोवा ने भुल जाय, जे तने गुलामी ना घोर मतलब मीस्र देस सी नीकाळीन लावलो से, अने तीहया मोट्ला अने खतरनाक जंगल मे सी ली आयो, जां जेहर वाळा गड़हा अने वीसा से अने बालुरेत ना ह़ुकला देस मे तारी जुगु वातड़ा ढाट मे सी पाणी नीकाळ्यो। अने जंगल ना देस मे मन्ना खवाड़्यो, जीने तमारा आड़ा-बुड़ा जाणता बी नी हता, एतरे के तीहयो तने गम खाण्यो बणावे, अने तारी पारख करीन आखरी मे तारु भलुत करे। कंखर आसम नी हये के तु सोचवा बाज जाय के आहयु धन मारीत सक्ती अने ताखत सी मने जड़ली से। पण तु आह़फा ना भगवान यहोवा ने फोम राखजे, काहाके तीहयोत से जे तने धन हात करवा करीन सक्ती आनीन करते आपे के जे वायदो तीहयो तारा आड़ा-बुड़ा सी ह़ाम खाय्न करलो हतो तीने पुरो करे, जीसम के आज उजन्तु से। कदी तु आह़फा ना भगवान यहोवा ने भुलीन बीजा देवता ने मानही, अने तीनी पुजा करे अने तीने वांदही ता में आज तने चेताय देम के तमु पक्का खत्तम हय जहु। जे माणहु ने यहोवा तमारी ह़ाते सी खत्तम करवा पोर से, तीमनीन तेम तमु बी आह़फाम ना भगवान यहोवा ना बोल ने नी मानवा ना कारण सी खत्तम हय जहु।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.