Paliya Bible
2 पतरस 1
वारला से के केम
सीमोन पतरस भणी गेथी जे मसी ईसु नो नेवताळो अने चाकर्यो से तीहया माणहु ना नामे जे अमारा भगवान अने छुटकारो आपण्या ईसु मसी ना धरम सी अमारीन तेवो घण मोगो भरहो हात करला से।
भगवान नी अने अमारा ईसु मसी नी ओळखाण ना लारे संयबरकत अने सांती तमारी मे घणीत बड़ती जाय।
भगवान नो बोलावो अने टाळे
काहाके ईसुत भगवान नी सक्ती आखु कंय जे जीवाय अने भक्ती मे जे कंय जोवे आमने तीनीत ओळखाण नी लारे आपलो से, जे आमने तीनीत बड़ाय अने वारला गुण सी बोलावलो से। जीमनी लारे तीहयो आमने घण मोगु अने घण मोटो वायदो आपलो से: काहाके तीमनी लारे तमु तीहया गलत वात अने कामु सी छुटीन, जे कळी मे गलत लालच सी हये, अने तमु भगवान नी तेम वेहवार ना साजल्या बण जावो। एतरे तमु आखी भात्ये काळ्जी करीन, तमारा भरहा मे वारला गुण ने जोड़ो अने वारला गुण मे ग्यान ने। अने ग्यान मे गम राखो अने गम मे धीरज राखो अने धीरज मे भक्ती। अने भक्ती पोर भाय-बेन्या नो मोंग, अने भाय-बेन्या मे मोंग मे वदाड़ता जावो। काहाके आहया वारला गुण नी जरवत से, अने कदीम आहयी वात तमारी मे घण-जबर से ता आहयु तमने आपणा ईसु मसी नी अक्कल मजबुत बणावहे। काहाके जीनी मे आहयी वात नी हय, तीहयो आंदळो से अने धुंदळु देखे, अने तारा पेल्ना पाप धोय्न चोखो करलो तीहयु भुल ज्यो।
एतरे ए भाय-बेन्या, आपणु ने बोलायो अने टाळ लेदो तीने उजन्तु करवा आखी भाते कोसीत करता जावो काहाके कदीम आसम करहु ता कदी ठोकर नी खावो। पण आहयीत रीते आपणा मालीक अने छुटकारो आपण्या ईसु मसी ना अमरकाय राज मे घण-जबर ईज्जत भेळ भरायहु
पतरस नी आखरी टेम
भले तमु आहयी आखी वात जाणो, अने जे सच्चाय नो बोल तमने जड़लो से, तीहयी सच्चाय पोर टेकला बी से, ते बी मे तमने आहयी वात फोम कराव्वा करीन जलम तीयार रेही। मे आहयु आपणी जुगु वारु ह़मजाड़ु के जत्यार तक तम्बुन तेवा डील मे से तत्यार तक तमने फोम करावी-करावीन चेताय्न राखु। काहाके आहयु जाणु के मारा तम्बु ने ओदार नाखवा नी टेम छोटीत आव्वा वाळी से, जेम के आपणो ईसु मसी मारी पोर उजन्ती करलो से। आनीन करते मे आसम कोसीस करही के मने कय करवान बाद तमु आहयी आखी वातु ने सदा फोम राख सको।
मसी नी बड़ाय ना डोळा देखे गवाय
काहाके जत्यार आमु तमने आपणा मालीक ईसु मसी नी ताखत नी अने आव्वा ना बारा मे खबर आपला से, ता तीहयी मन घड़्याण काहणी नो दाखलो नी हतो पण आमुत तीना ह़ेक ने देखला। 1काहाके जत्यार तीहयो भगवान बाह सी ईज्जत अने बड़ाय हात कर्यो अने तीहया ह़ेक वाळा बड़ाय मे गेथी आहयी अवाज आयी, “आहयो मारो मोंगाळ्ळो सोरो से जीनी सी मे खुस से।” तत्यार आमु तीनी ह़ाते चोखला बड़ा पोर हता, ता ह़रगे गेथी आहयी अवाज आवते ह़मळ्या।
अमारी पांह जे भगवान भणी गेथा केण्या माणहु ना बोलु से, तीहयो आहयी घटना सी तीहयो वातड़ो हय ज्यो। तमु आहयु वारु करो के जे आहयु ह़मजीन तीनी पोर धीयान करो, के तीहयो एक दीवो से, जे अंदारला जागा मे तीहयी टेम तक वीजाळु आपे जत्यार तक के परगण नी फाटे अने भळ-भाके नो तारो तमारा मन मे वीजाळु नी करे देय। पण पेले तमु आहयु जाण लेवो, के चोखली सास्तर नी भगवान वगे गेथी केदली वात कोयना आह़फात ना वीच्यार ना आधार पोर पुरी नी हये कानी बी भगवान वगे गेथी केदली वात माणेह नी मरजी सी कदी नी हयी पण भगत माणहु चोखली आत्मा ना सत मे भगवान भणी गेथा बोलत्ला।
Source notes (1)
- Cross-reference मत्ती 17:1-5; मरकुस 9:2-7; लुका 9:28-35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.