Skip to content
BibleKenya

Paliya Bible

2 कुरन्‌थी 7

एतरे ए मोंगाळ्‌ळा भायु अने बेन्‌या, एतरो मोटो वायदो भगवान कर्‌यो ता आवो आखा मेळीन आह़फा ना डील ना अने आत्‌मा ना आखा पाप ने सेटा करीन चोखा हय जता अने भगवान नी बीक मान्‌ता जाय्‌न चोखलापणा मे रीन पक्‌का हय जता।

पोलुस नी खुसी

आमने आह़फाम ना मन मे जागो आपो। आमु नी ते कोय ह़ाते गलत वेहवार कर्‌या, अने नी कोयने बगाड़्‌या, अने नी कोयने ठग्‌या। मे तमने गुनाळ्‌ळो ठेराव्‌वा करीन आहयु नी केतो। काहाके मे पेलेत की देदलो के तमु अमारा मन मे ईसम बह जेला से के आमु तमारी ह़ाते मरवा-जीव्‌वा तीयार से। मारो तमारी पोर घण जबर भरहो से; अने मे तमारी पोर घण-जबर मोटाय करु। ते बी हाव मने तमारी पांह गेथी हीम्‌मत जड़ जी; आखी वेला मे बी घण-जबर खुस रीया। 1

काहाके जत्‌यार आमु मकीदुनीया मे आवला, ते बी अमारा डील ने अराम नी जड़्‌यो, पण आमु ने च्‌यारो-मेर गेथो दुख जड़लो से; बारी अड़चन हती, अने मोय डील मे बीक हती। ते बी दुखी माणहु ने सांती आपण्‌यो भगवान तीतुस आयो एतरे आमने सांती आप्‌यो; अने तीतुस आयो करीन एतरोत नी पण तीनी तीहयी सांती सी बी, जे तीने तमारीन्‌तां गेथी जड़ली हती। आहयु ह़मळीन मने घणी सांती अने हीम्‌मत जड़ी, अने तीहयो तीतुस आहयु केदो के तमारा दुख अने मारी जुगु फीकर कर्‌या अने हाव मने भेटवा करीन मारी केतरी जबर हेर कर र्‌या। आहयु आखु ह़मळीन मे अळी जादा खुस हय ज्‌यो।

काहाके मे मारी चीट्‌ठी नी लारे तमने दुखी कर्‌यो, पण मे आनी सी पछतातो नी जेम मे पेले पछतातो हतो, काहाके मे देखु के तीहयी चीट्‌ठी नी लारे तमने दुख ते हयो पण तीहयो थोड़ीक वार लग नो हतो। हाव मे खुस से पण आनीन करते नी के तमने दुख हयो, पण आनीन करते के तमु तीहया दुख नी लारे मन फीराया, काहाके तमारो दुख भगवान नी मरजी नी अनसारे हतो के अमारी भणी गेथु तमने कानी बी वात मे कंय बी नुकसान नी हयवा जोवे। काहाके जे दुख भगवान नी मरजी नी अनसारे हयो तीहयो दुख एवो पस्‌तावो करे के तीने छुटकारो जड़े अने एवो पछतावो मे काहा कर्‌यो करीन अळी पछतावो नी करवा पड़े। पण आहयी कळी ना दुख ते मोत ने पयदा करे। भगवान नी वगे गेथो जे दुख तमने हयो तीहयो दुख तमारी मे ह़ु-ह़ु वारली वात पयदा कर्‌यो आहयु अकनी लेवो। आहयो दुख तमारी मे आत्‌मा नी फीकर मे पाड़ देदो, हाव तमु आह़फा ना बारा मे आहयु केवा तीयार से के अमारु मन चोखलु से, गलत काम नी करवा जोवे करीन रीह करवा जोवे भगवान नी बीक मे रेवा जोवे, भगवान नी हेर करवा जोवे, अने गलत वात मे नीयाव करवा जोवे, एम करीन तमु आखी रीते आहयु आखु देखाड़ देदा के आमु वण-गुनाळ्‌ळा से।

आहयी चीट्‌ठी जे गलत वेहवार करे तीनी जुगु नी लीख्‌यो अने तीनी जुगु बी नी लीख्‌यो जीना वीरोद मे गलत वेहवार कर्‌यो पण तमारी जुगु आनीन करते लीख्‌यो के तमु भगवान अगळ आहयु जाण लेवो के तमु मारी फीकर घण-जबर कर र्‌या। करीन आमने सांती जड़ी। अमारी आहयी सांती नी ह़ाते तीतुस नी खुसी नी कारण सी अळी बी खुसी हयी काहाके तीनो जीव तमु आखा ना कारण सी अळी जादा खुस हय ज्‌यो। कदीम मे तीतुस अगळ तमारा बारा मे मोटाय कर्‌यो, ता मने तीनी जुगु लजवायवा नी पड़्‌यु, जेम जे कंय मे तमने केदलो तीहयु ह़ाचलीन हतु, आहयीत रीते तीतुस अगळ मारी मोटाय करवु तेमेत नीकळी। तमु आखा बीहता अने कापता जाय्‌न तीतुस नो आव-भाव कर्‌या अने तीनी वात मान्‌या, आहयी वात ने तीतुस जत्‌यार फोम करे ता तीहयो घण-जबर मोंग सी भराय्‌न तमने पेले गेथो जादा मोंग कर र्‌यो मे आनीन करते खुस से काहाके आखी वात मे तमारी पोर भरहो कर सकु।

Source notes (1)
  1. Cross-reference 2 कुरन्‌थी 2:13

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.