Paliya Bible
2 कुरन्थी 3
नवला वायदा ना चाकर्या
ह़ु आमु आह़फात अमारी बड़ाय कर र्या? आहयु आमु ने देखाड़वा करीन आहयी वात नी गवा जुगु बीजा पांह गेथी तमने चीट्ठी लीखाड़ मांगवा पड़हे ह़ु? आहयु तमने देखाड़वा करीन आहयी वात नी गवा जुगु बीजा नी तेम आमने बीजा पांह गेथी चीट्ठी लीखाड़ मांगवा पड़हे ह़ु? नी, काहाके तमु ते एक गवा नी चीट्ठी तेम अमारा मन मे लीखाय ज्या जाणो, जे गवा नी चीट्ठी ने तमारी लारे आखा माणहु उजन्ता ओळखे अने भणे। आहयी वात ते उजन्ती से के तमु अमारी लारे खुस-खबर ह़मळ्या। एतरे तमु ईसु मसी नी गवा नी चीट्ठी से; अने आहयी चीट्ठी संये करीन नी लीख्या, पण जीवत्ला भगवान नी आत्मा नी लारे मन मे लीखला से आहयी एक कीया मे मन ना माह नी पट्टी पोर लीखली से।
अने आमु ईसु मसी नी लारे भगवान पोर ईसमेत भरहो करया। अमारु आहयुत केणु से के आमु जे कंय बी करया तीहयु अमारा ज्योरे नी पण भगवान नी ज्योरेत करया। जे आमु ने नवला वायदा ना काम करे एवा पावर्या बणावलो से, आहया वायदा लीखला कायदा ना नी हय, पण आत्मा ना से। काहाके कायदो मारे अने आत्मा जीवाड़े।
मुसा नो वायदो दगड़ा नी बणली पट्टी पोर टुचीन लीखलो हतो, तीहयो वायदो एतरो जबर बड़ाय भर्यो हय्न आयो के ईस्रायली जाती ना माणहु ने मुसा ना मुख ने एकडीट्या हय्न नी भळायु, पण ते बी मुसा ना मुख पोर वाळो बड़ाय कम हयतो जतो हतो। ता आत्मा नी सेवा अळी बी जादा बड़ाय भर्या काहा नी रेय? जत्यार गुनो लगाड़न्या काम घण-जबर जुगाळा हता, ता छुटकारो आपण्या काम अळी बी जादा जुगाळा काहा नी रेय। ह़ाचली वात ते आहयी से के जे काम बड़ाय भर्या हता तीहयात काम आहया नवला काम अगळ फीका पड़ ज्या। एतरे मे आहयु केम के जे कमतो हयतो जत्लो तीहयो बड़ाय घण-जबर हतो, ता आहयो जलम वदतो जाण्यो बड़ाय, तीनी गेथो बी जादा बड़ाय भर्यो काहा नी रेय।
एतरे आमु नवला जोरभर्या बड़ाय नो आह करीन हीम्मत भेळ बोलया। अने मुसान तेम नी, जे आह़फा ना मोडा पोर लुगड़ु नाख रेलो काहाके ईस्रायली माणहु तीहया कमतो हयवा वाळा बड़ाय ने आखरी मे कम हयत्लो नी देखे। पण ईस्रायल ना माणहु नु मन आंदळु हय ज्यु काहाके तीहया बी तीहया जुन्ला कायदा ने भणे तत्यार तीमनु मन बी लुगड़ु ओड रेय अने ह़मज नी आवे; जत्यार कोय बी ईसु मसी वगो वळीन तीने मान लेय ता आहयु मन नु लुगड़ु उचु हय जाय अने वारु ह़मज आय जाय। अने आज बी तीहया मुसा ना कीताप्या मे गेथा भणे ता तीमनु मन लुगड़ु ओड रेय; पण जत्यार बी तीमनु मन मालीक ईसु भणी वळहे, तत्यार तीहया मन नु लुगड़ु उचु हय जाय अने तीमने वारु ह़मज आय जाय। हाव ते मालीक ईसु नी चोखली आत्मा से; अने आञे ह़ारीक मालीक ईसु नी चोखली आत्मा से तां ह़ारीक एवी आखी वात नो छुटकारो से। एतरे हाव जेम आरहा पोर दाड़ु नु वीजाळु भबळे तेमेत मालीक भगवान नो बड़ाय आपणा आखा ना उगाड़ला मुख पोर उजन्तो हय्न भबळे। एम करीन आपणु मालीक ईसु नी आत्मा नी लारे ईसु नो बड़ाय भर्या सीका मे थोड़ा-थोड़ाक करीन बदलता जाय र्या।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.