Paliya Bible
1 तीमुथीयुस 5
भरहो करवा वाळा जुगु काम
काना बी डायला माणेह ने ना वडे, पण तीने बाह जाणीन ह़मजाड़ दे, अने जुवान्या ह़ाते भाय जाणीन वेहवार कर। अने डायली बयर ने आय्ह़ जाणीन ह़मजाड़ दे; अने जुवान्याण बयर ने पुरो चोखलापणा मे रीन बेनेह ह़मजीन ह़मजाड़ दे।
जे रंडायला से तीमनी ईज्जत कर। कदीम काना रंडायला बयरा ना सोरा-सोरी हय, नीता सोरा ना सोरा हय, ता तीहया आह़फा ना घोराणा ह़ाते ईज्जत भेळ वेहवार करजो, अने आह़फा ना आय्ह-बाहा अने बीजाम ने तीमनो हक आपवा ह़ीको, काहाके भगवान ने आहयुत गमे जे ह़ाचली रंडायली से, अने तीनु कोय नी हय; तीहयी भगवान पोर आह राखे, अने रात-दाड़ो रावण्या करीन वीन्ती करवा मे झींगे पड़ रेय। पण जे वारु सुके जीवीन घण-जबर मजा करे, तीहयी जीवत्ली हय्न बी मरला मुजुक से। अने आहयी आखी वात नो बी हुकम आप्या कर, काहाके तीहया आखा वण-गुनाळ्ळा रेय। पण कदीम कोय आह़फा ना ह़गाय, अने खास करीन आह़फात ना घोरल्या नी फीकर करीन मदत नी करे, ता तीहयो ईसु ना भरहा गेथो सेटो हय ज्यो, अने जे ईसु पोर भरहो नी करे, तीमनी गेथो बी जादा खोड़लो बण जेलो से।
तीहयीत रंडायली बयर नु नाम लीखवा जोवे, जे साट साल गेथी जादा उमर वाळी हय, अने एकीत अदमी नी लाडी री हय। अने भला काम मे नामह़ाद्याण हय, जे सोरा-सोरी नु पाळण-पोसण करी हय; अने पोरणा नी सेवा करी हय, चोखला माणहु ना पोगु धोयी हय, अने दुखी माणहु नी मदत करी हय, अने भात-भाती ना भला कामु मे मन लगाड़ी हय।
पण जुवान रंडायला बयरा नु नाम नी लीखजो, काहाके मोज-मजा मे पड़ीन मसी सी सेटी हय जाय अने वेवा करवा हींडे। अने गुनाळ्ळी बण जाय, काहाके तीहयीत तीना पेल्ना वायदा ने तोड़ देय। अने अळी बीजा ना घोर-घोर जाय्न ओगज्याण ह़ीके, अने एतरुत नी, पण तीहयी बक-बक करती रेय अने बीजा ना काम मे अड़चन नाखे अने गलत-गलत वात करे। एतरे मारु आहयु केणु से, के जे जुवान्या बयरा रंडाय जेला से, तीहया बयरा वेवा अने सोरा नी आय्ह बणे अने घोरबार ह़माळे, अने वीरोदी ने नामबद्दी करवा नो मोखो ना आपो। काहाके एवा कंय भटकीन भुतड़ा पसळ चालन्या बण जेला से। कदीम कानी बी भरहो करन्याण बयर ना घोर रंडायली बयर हय, ता तीनी मदत तीहयीत करे, काहाके मंडळी पोर बोजो नी पड़े, अने मंडळी जे बीजा रंडायला बयरा नी मदत कर सके।
जे डायला वारु जुगाड़ करे, खास करीन, जे भगवान ना बोलु ह़मळाव्वा मे अने ह़मजाड़वा मे काठु काम करे, तीमने बे गुणा दाड़की जड़वा जोवे। 1चोखली सास्तर मे बी लीखलु से, खळा मे जोपला बोळद्या ना मोडे कंडल्यो ना बांदो, काहाके दाड़क्यो तीनी दाड़की नो हकदार्यो से। कोय बी गुनो काना डायला पोर लगाड़े ता बे नीता तीन गवाय ह़मळ्या वगर तीनी पोर भरहो ना करो। पाप करवा वाळा ने वडीन आखा अगळ ह़मजाड़ दे, काहाके बीजा माणहु बी पाप करवा सी बीहे।
भगवान, अने ईसु मसी, अने ह़रगदुत अगळ तीमने हजुर जाणीन मे तने हुकम आपु, के तु मन लगाड़ीन आहयी वात ने मान्या कर, अने आहयु काम भेद-भाव सी ना करे। कोय पोर बी छोटोत हात नी मेकजे, अने बीजा ना पाप मे तु नी भेसकायजे: तु आह़फा ने चोखलो राखजे।
तारु पेट वळ-वळीन दुख्या करे, अने तु मांदो हया करे, करीन आव्वा वाळा दाड़ा मे पाणी एतरोत नी, पण अंगुर नो रोह बी पीया कर।
केतरा माणहु ना पाप उजन्ता हय जाय, अने नीयाव नी करते पेलेत दवड़ीन आय लागे, पण थोड़ाक माणहु ना पाप पसळ गेथा उजन्ता हये। आहयीत रीते केतरा भला काम बी उजन्ता हये, जे आसवा नी रेय, तीहया बी ह़ताय नी सके।
Source notes (1)
- Cross-reference मत्ती 10:10; लुका 10:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.