Paliya Bible
1 तीमुथीयुस 1
वारला से के केम
भगवान आपणो छुटकारो अने आपणी आह मसी ईसु नो हुकम नी अनसारे ईसु मसी ना नेवताळा पोलुस भणी गेथी। 1
भरहा मे मारा खरला सोरा तीमुथीयुस ने: बाह भगवान अने आपणा मालीक ईसु मसी भणी गेथी संयबरकत, दया अने सांती जड़ती रेय।
झुटा मास्तर्या ना वीरोद मे चेतावणी
मे मकीदुनीया देस जवा नी टेमे तमारी पांह वीन्ती करलो के तमु ईफीसुस ह़ेर मेत री जावो अने थोड़ाक देखाड़ला माणहु ने चेतावणी आपो के तीहया झुटी ह़ीकापण नी आपे, तीमने आसम केजो के जुन्ली काहणी अने खत्तम नी हयवा वाळा घोराणा पोर मन ना लगाड़ो। जीनी सी झगड़ा हये, अने भगवान ना ठेरावला कामु नी अनसारे नी, पण जे भरहा पोर टेकलु से। हुकम नो ह़ारो आहयो से के चोखला अने वारला मन सी, अने दगो नी करवा वाळा भरहा सी मोंग पयदा हये। थोड़ाक से, जे मोंग ना हुकम ने सोड़ीन भटकीन रीकामी वात मे फस जेला से। तीहया मुसा नी लारे लीखला सास्तर ना कायदा ह़ीकाड़न्या बणवा ते हींडे, पण जे वात हीम्मत सी केय, तीहयी वात ने खुद बी नी ह़मजे।
आपणु जाणया के मुसा नी लारे लीखला सास्तर ना कायदा ते वारला से; पण तीहया कायदा ने वारु रीती सी ह़ीकाड़े तात वारु से। आमु आहयु जाणीये के कायदा धरमी माणहु जुगु नी, पण जे भगवान नी भक्ती नी करे, जे माणहु नु आबरु नी राखे, जे कायदा वगर जीवे, जे कुहराय अने पाप करे, अने वीटळ्ळा से, अने जे आय्ह-बाहा ने लग मार देय। जे छीनाळु करे, अने जे अदमी-अदमी अने बयरा-बयरा सवसार करे, जे पावर्या ने वेचे, अने जे झुटी ह़ाम खाय, तीहया आखा जुगु तीमना पाप ना बारा मे अने डंड ना बारा मे ह़मजाड़वा करीन आहया कायदा भगवान आपलो से। भगवान जे आखा मे जुगाळो से, तीहयो आह़फा नी बड़ाय वाळी खुस-खबर बीजा ने ह़मळाव्वा नु काम मने ह़ोपलो से।
पोलुस पोर भगवान नी दया
मे, आपणा ईसु मसी ने घणो वारु से केम। जे मने सक्ती आपलो से, अने मने ईमानदार ह़मजीन, आह़फा ना सेवा ना काम नी लेदे ठेरायो। 2मे ते पेले तीनु वाक काडत्लो, अने वेला पाड़त्लो, अने तीमनी पोर दया बी नी करत्लो, पेले मे ईसु मसी पोर भरहो नी करत्लो, अने तीहयी टेमे मने मालम नी हतु, के मे ह़ु करवा बाज र्यो, करीन तीहयो मारी पोर गीण कर्यो। अने मालीक नी दया घण-जबर जड़ी, अने तीहयो भरहो अने मोंग बी जड़्यो जे मसी ईसु मे से। आहयी वात ह़ाची अने आखी भाते भरहो करे एवी से, के मसी ईसु पापी माणहु ने पाप मे गेथो बचाड़वा करीन, आहयी कळी मे आवलो से। अने आखा गेथो जादा पाप करवा वाळो मेत से। मारी पोर आनीन करते दया हयी के मे आखा गेथा मोटा पापी मे ईसु मसी पुरी दया देखाड़्यो, के जे माणहु तीनी पोर अमरकाय जीवाय हात करवा जुगु भरहो करहे, तीमनी जुगु मे ईज्जत बणु। हाव जलमका राजा मतलब खत्तम नी हयवा वाळा अने वण-देख्या भगवान नी ईज्जत अने बड़ाय जलमकी हयती रेय आमीन।
ए मारा बेटा तीमुथीयुस, जे तारा बारा मे बोलु भगवान भणी गेथा तने केदला हता, आहया बोलु ने हत्यार ना रुप मे वापरीन अळी वारु लड़ाय लड़तो रे। भरहा अने वारला मन पोर टेकलो रे जीने नी मानवा ना कारण सी कंय जणा ना भरहा रुपी ढुंड्या डुब ज्या। तीमनी माय्न हुमीनयुस अने सीकंदर से जीमने मे भुतड़ा ने ह़ोप देदो, के तीहया ह़ीके के बीजा नो वाक काडवा सोड़ देय।
Source notes (2)
- Cross-reference नेवताळा ना काम 16:1
- Cross-reference नेवताळा ना काम 8:3; 9:4,5
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.