Paliya Bible
1 पतरस 2:9
Verse 9 is marked below, with the whole chapter around it. Read from the start
आखी भातीन कुहराय करवा, अने बीजा ने ठगवा, ढोंगड़ा करवा, अने रीह, अने बीजा नी नामबद्दी करवा सोड़ देवो। नवलु पयदा हयलु सोरुन तेम आतमीक दुद नी हेर करो, काहाके तीनी लारे छुटकारो हात करवा मे बड़ता जावो। काहाके तमु मालीक नी भलाय नो ह़वाद चाख लेदला से।
ईसु मसी ने बीजा माणहु अमथो जाण्या, पण तमु तीनी पोर भरहो करीन तीनीन्तां आवला से। ईसु जीवाय आपण्या कामका दगड़ान तेम से, जीने माणहु अमथो ह़मजीन सेटो कर देदा। बाखीन भगवान नी नींगा मे घणो मोगलो अने जीवत्लो दगड़ो से। तमु बी जीवत्ला दगड़ान तेम आत्मीक घोर बणता जावो, जीनी सी पुंजारा ना चोखला समाज बणीन एसवी भेट चड़ावो के ईसु मसी ना लारे भगवान ली लेय। खरला सास्तर मे पेले गेथु आसम लीखलु से,
“मे सीयोन ह़ेर मे मारा टाळला दगड़ा ने मेकु
अने जे कोय तीनी पोर भरहो करहे,
तीने लजवायवा नी पड़े।”
तमारी लेदे जे भरहो करता हय तीहया घणा कीमती से, पण जे भरहो नी करे तीमनी लेदे
“जे दगड़ा ने राजमीस्त्या रीकामो ह़मजीन नीकाळ देदला
तीहयोत दगड़ो एक खुणा नो सीरो बण ज्यो।
अने
ठेह लागवा नो दगड़ो,
अने ठोकर खावा ना चाफर बण जेलो से”
काहाके तीहया ते भगवान ना बोलु ने नी मानीन ठोकर खाय अने आनीत जुगु तीहया ठेरावला बी से। 1
बाखीन तमु एक टाळली कुळी से, अने राजवाड़्या पुंजारा से, अने चोखला माणहु नो टोळो से, आने भगवान ना असामी से, भगवान ते तमने पाप नी अंदारली जीवाय मे गेथा नीकाळीन, वीजाळा नी जीवाय जुगु बोलावलो से। तीना गुण उजन्ता करो। पेले तमु असामी नी हता, पण हाव तमु भगवान ना असामी से। पेले तमारी पोर गीण नी हयली हती, पण हाव तमारी पोर गीण हयली से।
भगवान जुगु जीवो
ए मारा मोंगाळ्ळा भाय-बेन्या, मे तमारी सी वीन्ती करु के तमु आह़फाम ने अंजाण्या अने पारको ह़मजीन आहयी कळी नी लालच सी जे आत्मा सी झुमाया करे बचीन रेवो। आड़जात्या माणहु मे तमारी चाल-चलण भली रेय, के जे-जे वात मे तीहया तमने कुहर्या ह़मजीन नामबद्दी करे, तीहया तमारा भला कामु ने देखीन तीमनीत लेदे दया ना दाड़े भगवान नी बड़ाय करे।
ईसु ना माणहु सरकारी अदीकार्या ना हक मे रेवा जोवे
तमु मालीक नी करते माणहु ना वच मे टाळला आखा अदीकार्या ना हक मे रेवो, भले राजो कळीन आखा देस पोर राज करन्यो हय; भले तीहयो राजवाड़ा मे राज करन्यो हय। कुहर्या ने डंड आपवा अने भलास्या ने वारु कर्यो केवा करीन तीमने ठेरावला से। हाव भगवान नी मरजी आहयीत से के तमु भलास्या रेवो अने तमारा भला काम ना लारे, जे भगवान नी जाणे तीमनी अमथी वात केवा नी बोलती बंद कर देवो। आह़फा ने छुट्लो जाणो, पण आह़फा ना छुटलापण ने बुराय नी लेदे आड ना बणावो पण आह़फा ने भगवान नो चाकर्यो ह़मजीन चाल। आखा माणहु नी ईज्जत करो; ईसु नी मंडळी ना भाय-बेन्या ने मोंग बी करता रेवो; भगवान नी बीक बी मान्ता रेवो; अने देस ना मुखी राजा नी ईज्जत करता रेवो।
मसी अमारी ईज्जत
ए पावर्या, आखी भाती नी बीक भेळ आपणा मालीक ना हक मे रेवो नीस्ता तीमना जे भला अने नीचळा हय, तीमना जे बेमान से। काहाके कदीम कोय भगवान ना वीच्यार करीन गलती सी दुख झेलतो जाय्न वेला वेठतो हय ता आहयु वारु से। कदी कोय गुनो करे, तीने बीजा ठोके, अने तीहयो होगो हय्न तीमनी वेठ्या करे, ता बड़ाय करे एसवी कानी बी वात से पण कानो भलाय ना काम करीन कोयना हात नी मार खाय, अने तीहयो वेठतो रेय, ता आसम करवा सी भगवान ने वारु गमे, अने आहयु आखा अगळ बड़ाय करे ईसम से। आनीन करते भगवान तमने टाळीन बोलावलो से के वण-गुनाळ्ळा हय्न बी दुख झेले जीसम ईसु मसी वण-गुनाळ्ळा हय्न बी दुख झेलवा भगवान नो दाखलो बण ज्यो। ईसु ते कानो बी पाप नी कर्यो, अने नी तीना मोडे ठगारी-दगाळी वात नकळी। तीहयो गाळ ते खादो, पण कदी पासो फीरीन गाळ नी देदो। ईसु बीजा ना हाते दुख ते झेल्यो, पण कदी बी गुनो नी लगाड़्यो। तीहयो आह़फा ने खरला नीयाव करन्या भगवान बाह ना हात मे ह़ोप देदो। अने तीहयो आह़फोत आपणा पाप ने तीना डील पोर लीन कुरुस पोर चड़ ज्यो जीनी सी आपणु पाप नी लेदे मरीन धरम जुगु जीवाय जीवया, तीनात मार खावा सी तमु आरगा हया। पेले तमु खोवायला गाडरान तेम खोवाय्न भटकी जेला,2 बाखीन हाव तमु, तमारा जीव नी रखवाळी करन्या खरला गुवाळ्यान तां पासा आय लागला से।
Source notes (2)
- Cross-reference तीतुस 2:14
- Cross-reference यसाया 53:6
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.