Skip to content
BibleKenya

Paliya Bible

1 कुरन्‌थी 9

चेलाम नो हक अने काम

मे सुटलो नी हय ह़ु? मे नेवताळो नी हय ह़ु? मे आपणा मालीक ईसु मसी ने नी देख्‌यो ह़ु? मे भगवान नी वात देखाड़्‌यो करीन तमु ईसु पोर भरहो नी कर्‌या ह़ु? भले मे बीजा जुगु ईसु नो नेवताळो नी बी हय, पण तमारी जुगु ते से। काहाके तमुत मारी जुगु मालीक ईसु ना नेवताळा नी ओळखाण से।

जे मने पारखवा हींडे तीमने मारु आहयु केणु पड़े। मने अने बरनाबास ने खावा-पीवा नो हक नी हय ह़ु? जीसम मालीक ईसु ना भाय अने पतरस ईसु पोर भरहो करवा वाळी लाडी ने ह़ाते लीन हींडे, तेमेत आमने बी ईसु मसी पोर भरहो करन्‌यान बेनेह ह़ाते वेवा करीन ह़ाते लीन हींडवा नो हक नी हय ह़ु? बरनाबास ने अने मने मेहनत करीन जीव्‌वा नो हक नी हय ह़ु? एवु कोय से जे दाड़की लीया वगर सीपायड़ा नु काम करे? अने ईसम कोय से जे, अंगुर नी वाड़ी लगाड़ीन बी अंगुर ना फोळ नी खाय? अने ईसम कोय से, जे गाडरा ते पाळे पण गाडरा नु दुद नी पीतो हय?

मे माणहु नी रीती ना अनसारे आहयी वात की र्‌यो ह़ु? 1मुसा ना लारे लीखली सास्‌तर मे लीखलु से, “खळा मे बोळद्‌या ने कंडल्‌या ना बांदो।” ह़ु भगवान बोळद्‌या नी फीकर करीन आसम की र्‌यो के आपणी जुगु आसम की र्‌यो? ह़ाचलीनेत! भगवान आपणी जुगु की र्‌यो, आहयु आपणा बारा मे लीखलु से। काहाके कीरसाण आह करीनेत खेतर मे काम करे, अने खळा मे अन महळवा वाळो बी आह करीन खळा मे अन महळे। 2तमारी आत्‌मा जुगु भगवान खुस-खबर ह़मळावीन अमारा डील जुगु कानी बी चीज मांगवा घण मोटी वात से ह़ु? कदीम बीजा तीमना डील जुगु कंय चीज मांगवा नो हक राखे? ता अमारो तमारी पांह जादा मांगवा नो हक नी हय ह़ु?

पण आमु तमारी पांह मांगवा नो हक कामे नी लगाड़्‌या। पण आमु घण-जबर वेठ्‌या, आनीन करीन के मसी नी खुस-खबर आखी दुर पुगवा मे कंय बी वांदो नी आव्‌वा जोवे। जे भगवान ना मंदीर मे काम करे तीहया मंदीर मे चड़ावे तीहयी चीज ने नी वापरे ह़ु? अने जे वेदी नी सेवा करे तीहया वेदी पोर चड़ावली चीज ने नी वापरे ह़ु? 3आहयी रीते मालीक भगवान बी कायदो बणावलो से के खुस-खबर नु परच्‌यार करे तीहयो खुस-खबर ह़मळावीन जीवी खाहे?

पण मे आहया आखा हक मे गेथो एक बी हक वापर्‌यो नी, अने आनीन करते आहयी वात नी लीख्‌यो के मार जुगु तमु कंय ने कंय करो। भले मे मर जही पण मार जुगु कंय ना करो; आनीन करते मे कंय बी लीया वगर जे करु तीहयी वात नी मोटाय मार पांह गेथी कोय बी नी हापकवा जोवे। एतरे मे खुस-खबर नो परच्‌यार करु, ता आनी मे कानी बी मोटाय नी हय, काहाके मारी जुगु खुस-खबर नो परच्‌यार करवा जरुड़ी से। अने कदीम मे खुस-खबर नो परच्‌यार नी करु ता मारी जुगु घणी दुख नी वात से। कदीम मे मारी मरजी सी खुस-खबर नु काम करतो हय ता मने दाड़की जड़ती, पण मे मारी मरजी सी खुस-खबर ह़मळावा नु काम नी करतो, पण जे मने टाळलो से अने आहयु काम ह़ोपलो से, तीनी मरजी सी आहयु काम कर र्‌यो। खुस-खबर नी दाड़की लीया वगर ह़मळावात मारी दाड़की से, खुस-खबर ह़मळावा मे जे बी मारो हक से, तीहया हक ने वापर्‌या वगर परच्‌यार करवा नो मारो हक से।

भले मे कोयनो गुलाम नी हय, पण ते बी आखा ने भगवान ना राज मे लाव्‌वा करीन आखा नो गुलाम बण ज्‌यो। युहदी माणहु नो छुटकारो करवा करीन, मे तीमनी जुगु तीमनीन तेम बण ज्‌यो। भले मे मुसा ना कायदा ना हक मे नी हय, पण जे कायदा ना हक मे से तीमनो छुटकारो करवा करीन मे कायदा ना हक मे वाळान तेम बण ज्‌यो। भगवान ना कायदा नी मानवा वाळा नो छुटकारो करवा करीन मे तीमनीन तेम बण ज्‌यो, भले मे भगवान ना कायदा नी मानवा वाळा मे नो नी हय। पण ईसु मसी ना कायदा ना हक मे से। मे लुल्‌ला नी करते लुल्‌लो बण्‌यो, के तीने बचाड़ लेम। मे आखा माणहु नी करते आखु कंय बण्‌यो, के जीनी सी मे कानीन कानी रीते ढेरेत माणहु ने बचाड़ लेम।

बीजा माणहु ह़ाते खुस-खबर नी संयबरकत नो साजल्‌यो बणवा करीन, आहयु आखु मे खुस-खबर जुगु करु।

दवड़ीन ईलाम जीकवा ना खेल मे ईलाम जीकवा करीन आखा दवड़े; पण ईलाम एकीत जणो हात करे। तमु ईसम दवड़ो के ईलाम हात करो। खेल मे खेलवा वाळा ने आखा कायदा पाळीन चालवा पड़े। खेल मे ईलाम हात करन्‌यो पान्‌टान तेम चीमायवा वाळी पागड़ी हात करवा करीन ईसम करे। पण आमु ते तीहयी पागड़ी जुगु जे कदी नी चीमाये। आहयी रीते मे ईलाम हात करवा करीन खास ठीया नी नींगा राखीनेत दवड़ु। मे वाहळा मे अमथो ढीक नी देम। पण मे मारा डील ने काठी मेहनत करावीन हक मे राखु। कंखर माय्‌न ईसम नी हयवा जोवे, के मे बीजा ने वारु परच्‌यार करीन मेत रीकामो नीकळु।

Source notes (3)
  1. Cross-reference 1 तीमुथीयुस 5:18
  2. Cross-reference रोमीयो 15:27
  3. Cross-reference मत्‌ती 10:10; लुका 10:7

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.