Paliya Bible
1 कुरन्थी 14
चोखली वात ना बारा मे जादा ह़ीकापण
मोंग नी वाट्ये चालीन मोंग सी रेवो। अने तमु चोखला वाटा नी झींग मे रेवो। खास करीन भगवान भणी गेथी वात केवा नी झींग मे रेवो। काहाके जे बी चोखली आत्मा नी लारे भात-भाती नी बोली बोले; तीहयो माणहु ह़ाते नी पण भगवान नी ह़ाते वात करे; काहाके तीनी वात कोयने ह़मज नी आवे काहाके तीहयी ह़तायली वात भगवान नी चोखली आत्मा नी ताखत सी केय। पण जे भगवान भणी गेथी वात केय, तीहयो माणहु नी आत्मा नो फायदो करे, अने माणहु ने ह़ीकापण अने सांती आपवा वाळी वात केय। पण जे चोखला आत्मा नी लारे भात-भाती नी बोली बोले तीहयो आह़फा नी आत्मा नो फायदो करे। पण जे भगवान भणी गेथी वात केय तीहयो ईसु नी मंडळी मे रेण्या नो फायदो करे।
मारी आहयी मरजी से के तमु आखा चोखली आत्मा नी लारे भात-भाती नी बोली बोलो। पण तीनी गेथी बी जादा मरजी आहयी से के तमु भगवान भणी गेथी वात केवो: काहाके कदीम चोखली आत्मा नी लारे भात-भाती नी बोली बोलन्या ईसु नी मंडळी ना माणहु ना फायदा जुगु तीहयी बोली ने बीजी बोली मे नी बदले, ता तीनी गेथो भगवान भणी गेथो केण्यो वारु से। ए ईसु पोर भरहो करन्या भाय-बेन्या कदीम मे तमारीन्तां आवीन आत्मा नी लारे भात-भाती नी बोली बोलु, ता तमने मारी सी ह़ु फायदो हयहे। पण ह़तायली वात, अने अक्कल नी वात, अने भगवान भणी गेथी वात नी केम, अने ह़ीकापण नी आपु।
आहयी रीते कदीम वण-जीव्या चीज बी जीनी मे अवाज नीकळे। तीनी मे अवाज नु फरक नी हय ता कीसम मालम पड़हे के कानु वाजु वाज र्यु। पाहळीन नीता तम्बुरा नी रींग मे कंय बी फरक नी हय ता कंय बी फायदो नी हय। अने फेपार्या नी रींग बी चोखीझण नी हय ता माणहु झुमायवा करीन कोय तीयार हयहे। एतरे तमने बीजा नी बोली चोखीझण नी बोलाये तां लग बीजा ने तमु ह़ु की र्या तीहयु कीसम ह़मज मे आवहे? अने तीमने ह़मज नी आवे ता तीमने ईसम लागहे के तमु वाहळा ह़ाते वात कर र्या। ह़ाचलीन आहयी कळी मे घण ढेरकी बोली से, पण तीहयी बोली माय्न एक बोली बी रीकामी नी हय। जत्यार लग मे बोलवा वाळा नी बोली नी ह़मजु तां लग मे तीनी जुगु अंजाणलो रेही अने तीहयो बी मारी जुगु अंजाणलो रेहे। एतरे तमु आखा जत्यार लग चोखली आत्मा नी झींग मे रेवो। तत्यार लग एवी कोसीत करो, के तमारा वाटा मे फायदो हये तीहयी टेमे ईसु नी मंडळी ना माणहु नो बी फायदो हये तेम।
जे चोखली आत्मा नी लारे भात-भाती नी बोली बोलतु हय तीने आहयी बोली नो मतलब ह़मजाड़वा करीन बोली बदल करते बी अवड़वा जोवे। एवी वीन्ती भगवान सी करवा जोवे। काहाके कदीम मे चोखली आत्मा नी लारे भात-भाती नी बोली मे वीन्ती करु ता मारी आत्मा एतरीत वीन्ती करे। पण तीहयी टेमे मारी अक्कल काम नी करे। एतरे ह़ु करवा जोवे? मे आत्मा सी बी वीन्ती करही; अने अक्कल सी बी वीन्ती करही; मे आत्मा मे गावही अने अक्कल सी बी गावही। कदीम तु आत्मा सी भगवान ने, तु घणो वारु से कीही तां बह रेलो अंजाण्यो माणेह तारी वात ह़मळीन “आमीन” काहा केहे। काहाके तीने ते मालम नी हय के तु ह़ु की र्यो? तु ते ह़ाचलीनेत तु घणो वारु से केय पण बीजा नो फायदो नी हये ता मे ह़ु करु।
मे तमारी आखा गेथो जादा चोखली आत्मा नी लारे भात-भाती नी बोली बोलु। एतरे भगवान ने आहयी वात नी करते तु घणो वारु से केम। पण भगवान नी मंडळी मे चोखली आत्मा नी लारे भात-भाती नी बोली मे दह हजार वात केवा नी बदले मने अक्कल नी वात केवा वारु से। आनीन करते के बीजा ने ह़ीकाड़वा करीन मे अक्कल नी पांच वात केवा वारु से।
ए ईसु पोर भरहो करन्या भाय-बेन्या ह़मज मे सोरान तेम ना बणो: पण कुहराय मे सोरा नी तेम बणो, अने ह़मज मे हुस्यार बणो। जीसम मुसा नी लारे लीखला सास्तर मे लीखलु से:
मे बीजी बोली बोलन्या नी लारे,
अने पारका मोडा नी लारे ईसु ना माणहु ह़ाते वात करही,
ते बी तीहया मारी वात नी ह़मळे।
मालीक भगवान आहयुत केय।
एतरे चोखली आत्मा नी लारे केदली भात-भाती नी बोली ईसु पोर भरहो नी करे, तीमनी जुगु नी हय, पण ईसु पोर भरहो करे तीमनी जुगु से।
अने कदीम ईसु नी मंडळी एक जागे भेळी हये, अने तीहयी टेमे आखान-आखा चोखली आत्मा नी लारे भात-भाती नी बोली बोले अने तां ह़ारीक बीजा माणहु नीता ईसु पोर भरहो नी करे तीहया आय लागे ता तीहया तमने गांडा नी ह़मजे ह़ु? पण तीहयी टेमे आखान-आखा भगवान भणी गेथी वात केवा बाज जाय ता कानो बी अनपड़ नीता ईसु पोर भरहो नी करे तीहयो बी आय लागे, ता आखान-आखा तीने गुनेगार ठेराय देहे अने तीने पारखी लेहे। तीना मन नी वात उजन्ती हय जहे, तत्यार तीहयो पोगु पड़ीन भगवान ने वांदहे। अने आहयु मान लेहे के ह़ाचलीनेत भगवान तमारी वच मे से।
भक्ती जुगु कायदा
ए ईसु पोर भरहो करन्या भाय-बेन्या तमु भेळा हयो ता ह़ु करवा जोवे? तीहयी टेमे आखा ना मन मे गीत नीता ह़ीकापण, नीता चोखली आत्मा नी लारे भात-भाती नी बोली बोलवा, नीता तीनी बोली नो मतलब ह़मजाड़वा जोवे। एतरे आखु कंय तमारा मंडळी ना फायदा जुगु हयवा जोवे। कदीम चोखली आत्मा नी लारे भात-भाती नी बोली मे वात करवा हय ता बे-बे, नीता जादा हय ता तीन-तीन जणा बोलवा जोवे अने एक जणो तीनी बोली ह़मज आवे एवी बोली मे बदलवा जोवे। पण कदीम बोली बदल करन्यो नी हय, ता चोखली आत्मा नी लारे भात-भाती नी बोली बोलन्यो ईसु नी मंडळी मे होगो रेवा जोवे, अने आह़फा ना मन मे भगवान ह़ाते वात करवा जोवे। भगवान वगे गेथा केण्या बे नीता तीन जणा बोलवा जोवे, अने बीजा माणहु तीमना केदला बोलु ने पारखवा जोवे। पण कदीम बठवा वाळा माय्न कानाह पोर भगवान नी वात उजन्ती हयती हय ता पेले बोलन्यो होगो री जवा जोवे। काहाके तमु आखा एकीक जणा भगवान वगे गेथी वात की सके, आनीन करीन के आखा ने ह़ीकवा जोवे, अने आखा ने मोखो जड़वा जोवे। काहाके भगवान वगे गेथी वात केण्या माणहु नी आत्मा तीमनात हक मे से।
काहाके भगवान वेरा-वेर करन्यो नी हय, पण सांती आपण्यो से; जीसम तीहयो चोखला माणहु नी ईसु नी मंडळी ने सांती आपे। बयरा मंडळी मे होगा रेवा जोवे, काहाके तीमनो तां ह़ारीक वात करवा नो हुकम नी हय, पण ह़मळीन हक मे रेवा नो हक से: जीसम मुसा नी लारे लीखला सास्तर मे लीखलु से। कदीम तीहया कंय ह़ीकवा हींडे, ता घोर जाय्न आह़फाम ना अदमी ने पुसवा जोवे, अने बयर ने ईसु नी मंडळी मे वात करवा लाज नी वात से।
ह़ु भगवान नो बोल तमारीन्तां गेथो नीकळीन आवलो से ह़ु? अने तमारीन्तां एतरोत पुगलो से ह़ु? कदीम कानो माणेह आह़फा ने भगवान वगे गेथी वात केण्यो माणेह ह़मजतो हय, नीता आत्मा नी वात देखाड़न्यो ह़मजतो हय, ता तीने आसम बी जाण लेवा जोवे के आहयी वात मे लीख र्यो तीहयी वात मालीक ईसु ना हुकम से। कदीम तीहयो आहयी वात ने नी माने ता मालीक ईसु ने बी नी माने।
एतरे ए भाय-बेन्या भगवान वगे गेथी वात करवान झींग मे रेवो, अने जे चोखला आत्मा नी लारे भात-भाती नी बोली बोले तीमने ना रोको। पण आहयु आखु काम वारु रीते अने एक-एक करीन करवा जोवे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.