Paliya Bible
1 कुरन्थी 12
चोखली आत्मा ना वरदान
ए भाय-बेन्या मारी आहयी मरजी नी हय, के तमु आत्मा ना वरदान ना बारा मे अंजाण्या रेवो। तमने मालम से के जत्यार तमु ईसु ने नी मान्ता हता ता बोबड़ी मुर्ती पसळ जेम चलाड़ता हता तेम चालता हता। एतरे मे केम के कोय बी भगवान नी अगवाय वगर आहयु नी केय के ईसु गरा वाळो से। अने चोखली आत्मा वगर कोय आहयु नी केय के ईसु मालीक से। 1
वरदान ते कंय भातीन से, पण आपवा वाळी चोखली आत्मा ते एकीत से। सेवा ते ढेरेत भातीन से, पण मालीक ते एकीत से। अने कामु ते ढेरेत भात्या से, पण भगवान ते एकीत से, जे आखा मे अलग कामु करे। पण आखा नी भलाय नी करते भगवान नी चोखली आत्मा भात-भातीन वेह मे उजन्ती हये। काहाके एकीत भगवान नी आत्मा नी लारे अक्कल नी वात केवा नो हुनर जड़े; अने बीजा ने तीहयी आत्मा नी लारे अक्कल जड़े। अने काना ने तीहयात भगवान नी आत्मा नी लारे भरहो करवा नो वाटो जड़े; अने तीहयी आत्मा नी लारे काना ने वारु करवा नो वरदान जड़े। अने काना ने सक्ती ना जुदा-काम करवा नो वाटो जड़े; अने काना ने भगवान वगे गेथी वात केवा नो वाटो जड़े। अने काना ने चोखली आत्मा ना वाटा ने पारखवा नो, अने काना ने भात-भातीन बोली नो मतलब देखाड़वा नो वाटो जड़े। पण आहया आखा जुदा-कामु एकीत भगवान नी चोखली आत्मा करे।
डील एकीत: आंग ढेरेत
काहाके जीसम डील ते एकीत से, पण तीनी मे आंग ढेरेत से। अने तीहया एक डील ना आखा आंग मेळीन एकीत डील केवाये। तेमेत ईसु मसी नु डील बी से। पण आपणु आखा, भले युहदी हय अने आड़जात्या हय, गुलाम हय अने सुटला हय, जे बी हय ते, पण एकीत भगवान नी आत्मा नी लारे एकीत डील बणवा करीन बपतीस्मा लेदला से, अने आपणु आखा ने एकीत भगवान नी आत्मा आपली से।
ते बी डील मे एकीत आंग नी हय, पण ढेरेत आंग से। कदीम पोग केय: “मे हात नी हय एतरे मे डील नो नी हय।” ता तीहयो डील नो आंग नी हय ह़ु? आहयीत रीते कदीम कान्टो केय, “मे डोळो नी हय, एतरे मे डील नो नी हय” ता तीहयो डील नो आंग नी हय ह़ु? कदीम आखु डील डोळो रेतु ता केम ह़मळतु? अने कदीम आखु डील कान्टो रेतु ता तीहयु केम ह़ुंगतु? भगवान आह़फा नी मरजी नी अनसारे आखा आंग ने आपणा डील मे जोड़लो से। कदीम डील ना आखा आंग एकीत रेता ता डील केवायतु ह़ु? पण हाव आंग ते ढेरेत से, पण डील एकीत से।
डोळा हात ने ईसम नी की सके, के तमु मने नी जोवता, अने मुंडु पोग ने ईसम नी की सके के “तमु मने नी जोवता!” पण डील ना जे आंग ने आपणु कमजोर ह़मजया, तीहयु आंग आपणु ने जादा जोवे। अने डील ना जे आंग नी वारु देखाय तीने आमु ढाकया, अने जे आंग ह़ोबे नी तीहयुत आंग वारु ह़ोबवा बाज जाय। ते बी आपणु ने ह़ोबे एवा आंग अने नी ह़ोबे एसवा आंग नु काम नी हय, पण भगवान आपणा ह़ोबवा वाळा आंग ने आपणा डील मे ईसम मेल देदलो से, अने तीहया आंग ह़ोबे नी तीहया आंग नी जादा ईज्जत हये। आपणा आहया आंग मे बेरजाव नी पड़वा जोवे, पण एक-बीजा नी फीकर करवा जोवे। कदीम एक आंग ने दुख हये, ता तीनी ह़ाते आखा आंग ने दुख हये, अने कदीम एक आंग नी ईज्जत हये, ता तीनी ह़ाते आखा आंग खुस हये।
ईसमेत तमु आखा ईसु मसी ना डील से। अने आखा मेळीन तीना आंग से। 3भगवान आह़फा नी मंडळी मे अलग-अलग माणहु ने टाळीन काम ह़ोप देदो, पेले ईसु ना नेवताळा, बीजा भगवान नी वगे गेथा केण्या, तीसरा मास्तर, अने अळी बीजा ने आरगाय आपण्यो वरदान जड़्यो, अळतेण बीजा नी मदत करवा वाळा, अळतेण कोयने बी मालम नी हय तीहयी बोली बोलन्या टाळ्यो। आहया आखा नेवताळा से ह़ु? आहया आखा भगवान वगे गेथा केण्या से ह़ु? आहया आखा जुदा-काम करन्या से ह़ु? आखा ने आरगा करवा नो वाटो जड़लो से ह़ु? आखा ने भात-भाती नी बोली बोलवा नो वाटो जड़लो से ह़ु? अने आखा बोली बदल सके ह़ु? तमु मोटा-मोटा वाटा नी हेर करो!
पण मे तमने आनी गेथी बी जादा मोटी वाट देखाड़वा हय र्यो।
Source notes (3)
- Cross-reference रोमीयो 12:6-8
- Cross-reference रोमीयो 12:4,5
- Cross-reference ईफीसीयो 4:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.