Aərə ə̂në Ndjapä yîsə̂ nə

Aərə ə̂në

NDJAPÄ YÎSƏ̂ NƏ GASHU KƆ

Kumu əpʉ

Âdâ kə ta fraka səke də̂ yea

Ngrowô ə̂në Zââ, əzü-awla nə̂ Jezu Kristə tâ ə wlâ kɔ kə səke. Tshə pâ aərə nɔ̂ ə̂në əne tâ əpʉ nə gâ lə nə kɔ, əne wû də ala əne, ə djî ndje də ətu əne. Tshə pâ Yîrə̂ Ndjapä kə têgbɔ əne â əne wû aərə sə̂ nɔ̂ kɔ.

Əndje têgbɔ Zââ nə ə nâ ndə kə za ətshə tʉ mâ lə dala əgɔ ə̂në əndje ê ə pa Patəmɔsə, lə ashɔ Azi kɔ. Âdârə ə̂në tshə tâ ngrowô səke ə wlâ ndə kə pa tshə gbɔgbɔ lɔsu azü nə̂ Kristə nə, mbrə ə̂në leme-e kɔ, azü gî əyo tə̂ əndje tə bandanə. Âdârə ə̂në tshə pâ kə əndje ə pa əndje ka gbʉ gbʉ gbʉ ʉrrr ndjɔ gâ tə̂ bale əlo tshepashɔ, ə za lɔsu əndje gâ pâ əpʉ nə, mbrə ə̂në Jezu pâ əpʉ ə pa: «Əzü ə̂në tshə ro pa əmbrʉ ərə, mə sə kə za äwä kə ətshə ndə kə pa tshə zɨ leyɔ sorô ə̂në ə sə lə paradi nə̂ Ndjapä kɔ» (Aərə ə̂në Ndjapä yîsə̂ nə gashu 2.7). Â Jezu də ə̂tə̂ ye sə kə gu nə katshä katshä səye ndə kə pa tshə ro əmbrʉ ərə də awlra.

Alabə̈ aâgbɔ̂ aərə sə lə fraka səke: əlî ərə nə kə də̂ aafrɔ ayirə̂ sə kə mbrə kosəra pâ ashɔ səke, â azü nə̂ Kristə sə kə wu aəyo ʉrrr azü sə kə wo alabə̈ əndje lə takpa tə̂ əndje nə. Bishi ərə nə kə də̂ Jezu Kristə kə sə tə Âgbɔ̂ Əyïngerə, tshə ro azü nɔ̂ ə̂në əndje wə̂ra tə̂ əndje tə̂ Ndjapä gâ ye kɔ je, ndje də aafrɔ ayirə̂ nə nɔ̂ je. Vəta ərə nə kə də̂ Ndjapä bâta ə̈bə̈ ərə ə̂në tshə za kə azü ə̂në əndje za lɔsu əndje kə ətshə kɔ mandânə aərə sə̂ je, dîrî dîrî kə azü ə̂në əndje wô əndje mbrə ətshə kɔ je.

Əpʉ sə̂ sə də awlra, â əpʉ kə za lɔsu gâ pâ nə sə lə nə mbrə azü ə̂në əndje wû aâgbɔ̂ aəyo səkɔ. Ə yîsə̂ nə ndje kə əndje ə pa ə̂në azü əgɔ Rɔmə gî əyo tə̂ əndje gâ ye kɔ, Aya Ndalimi nə̂ Ndjapä ə djɔ ərə səkɔ tə̂ əndje je, mbrə ə̂në ətshə kə ro əmbrʉ ərə də awlra je. Ərə ə̂në ə gbɔgbɔ lɔsu əndje rô pâ nə kɔ kə sə̂.

Ərə ə̂në Ndjapä yîsə̂ nə gashu kə Zââ nə, mata kə nglɔ aərə ə̂në ə za tshepashɔ je kɔ, tafa tshepashɔ ə̂në Ndjapä ə mbrə je kɔ, də äwä ə̂në tshə she azü ə̂në əndje djî əpʉ ama ye lə kuzu kɔ je, tshə pâ ndə nə. Sataa, də atrawaya nə̂ ye, gâ ndə azü nɔ̂ ə̂në əndje djî əpʉ ama ye gâ ye kɔ, Jezu ə ro əndje də awlra je, ə ko əndje ə wli əndje gâ lə âgbɔ̂ kudû je. Ə̈bə̈ tafa tshelafɔ ə wutu je, ndje də ə̈bə̈ tafa ashɔ, də ə̈bə̈ tafa gala, â Ndjapä də Jezu ə gu ə mbrə əgɔ də azü ə̂në əndje djî əpʉ ama əndje kɔ lə nə je.

Əpʉ tshelə fraka səke na rəke

1. (1.1-8) Əpʉ kə bla ətshe

2. (1.9-20) Jezu yîsə̂ tə̂ ye gashu kə Zââ

3. (2.1–3.22) Angrowô ə̂në əndje wlâ kə azü nə̂ Ndjapä lə agala mindû amanə bishi kɔ

4. (4.1-11) Kə vrɔ Ndjapä mâ ngâ lafɔ-e

5. (5.1–6.17) Fraka ə̂në əndje zâ tapɔ gâ pâ nə mindû amanə bishi kɔ

6. (7.1-17) Kə vrɔ Ndjapä ətshi mbata ngerə nə̂ Ndjapä

7. (8.1–11.19) Aədɨ mindû amanə bishi

8. (12.1–13.18) Əmbrʉ agia ə̂në tshə ko dabaderɔ kɔ gâ ndə agia bishi

9. (14.1–15.8) Ngbanga nə̂ azü, də azü ə̂në əndje djɔ̂ əndje lə əmbrʉ ərə gâ ye kɔ

10. (16.1-21) Akopo əkɔ nə̂ Ndjapä

11. (17.1–20.10) Alayïkowɔ nə̂ Ndjapä, tshə ro əndje də awlra je

12. (20.11-15) Bale ngbanga tshepashɔ

13. (21.1-8) Tafa tshelafɔ, də tafa ashɔ

14. (21.9–22.5) Tafa gala Jeruzalamə

15. (22.6-21) Kristə ə gu katshä katshä səye je