Galasi

Fraka ə̂në Palɔ tâ kə Laglizə əgɔ

GALASI

Kumu əpʉ

Âdâ kə ta fraka səke də̂ yea

Ngrowô ə̂në Palɔ tâ kə azü nə̂ Kristə lə ashɔ əgɔ Galasi kɔ kə sə̂. Palɔ nə nâ mâ lə ashɔ əgɔ Galasi nə äwä bishi gâ ye, ndə kə pa tshə yisə̂ Əpʉ Ndjapä kə əndje. Ajuwufu də azü ə̂në əndje sə̂ sə̂ tə Ajuwufu ne kɔ yîndə Əpʉ Ndjapä nə ndə kə do tə̂ əndje tə azü nə̂ Kristə. Əpʉ ə̂në Palɔ nə yîsə̂ nə kə əndje kɔ kə də̂ kə za lɔsu kə Kristə nə tshî kə lï ndə kə pa ə mbrə Ndjapä wu əzü tə ə̂rɔ̂ əzü lə ala ye. Bale, alɔ ngbatshe mandânə, alabə̈ Ajuwufu nə nâ mâ lə ashɔ Galasi nə je ə pâ aâgbɔ̂ azü nə̂ azü nə̂ Kristə mâ Jeruzalamə kə wlâ alane kɔ. Əndje djâdja tshelə əpʉ sə̂ nɔ̂ ə̂në Palɔ nə yîsə̂ nə kɔ ə pâ Palɔ nə sə̂ sə̂ tə djatra əzü-awla ne, â əpʉ ə̂në tshə yîsə̂ nə kɔ sə̂ tə əterə. Əndje pâ kə azü nə ə pâ azü ə̂në əndje sə̂ sə̂ tə Ajuwufu ne kɔ ə̂në əndje zâ lɔsu əndje kə Kristə nə gâ ye kɔ, əndje lî ndə kə pa əndje mbrə ərə ə̂në âgbɔ̂ əpʉ nə̂ Mayizə pâ ndə nə kɔ. Â əpʉ ə̂në əndje kâ gâ pâ nə shingʉ shingʉ kɔ kə də̂ əpʉ kə wa gandja. Əndje pâ əpʉ gandja nə kə lï ndə kə pa ə mbrə Ndjapä wu əzü tə ə̂rɔ̂ əzü lə ala ye.

Azü əgɔ Galasi nə mbrə̂ ndje ərə sə̂ rə, â Palɔ nə djî ndə nə. Tshelə Palɔ kô ətshə ngbatshe, mbrə ə̂në ə də̂ tə̂ äwä kə mbrə ərə Lïndə̂ âgbɔ̂ əpʉ nə̂ Mayizə də̂ Ndjapä wu azü tə̂ aə̂rɔ̂ azü lə ala ye ne. Âdâ nə ə̂në Palɔ nə tâ fraka sə̂ kə azü əgɔ Galasi nə rə kɔ kə sə̂, ndə kə pa tshə yisə̂ nə kə əndje ə pa Ndjapä nə pâ pâ rə ne. Kə wa gandja nə ə̂në əndje pâ ndə nə kɔ kə də̂ ə pa yîrə̂ əzü nə sə mvo. Tshə pâ kə əndje ə pâ Ndjapä zâ Abraamo tə ə̂rɔ̂ əzü angbʉlînə ndə kə pa tshə sə tə abä Ajuwufu ə wa gandja. Kʉtə̂ əpʉ lɔsu tshî kə lï ndə kə pa ə mbrə Ndjapä wu azü tə aə̂rɔ̂ azü lə ala ye, â əpʉ lɔsu nə kə lï ndə kə mbrə ndə kə pa sorô əzü fʉ lə ala Ndjapä nə.

Əpʉ tshelə fraka nə sə rəke

1. (1.1-10) Palɔ sə tə djatra əpʉ tə əzü-awla, â ərə ə̂në tshə yisə̂ nə kɔ sə djatra ərə

2. (1.11-24) Ndjapä kə sə̂ â kê Palɔ ndə kə pa tshə sə tə əzü-awla kɔ

3. (2.1-21) Yekɔ dîrî dîrî də̂ Ə̂rɔ̂ Əpʉ pâ kɔ

4. (3.1–4.31) Kʉtə̂ əpʉ lɔsu tshî kə lï ndə kə pa ə mbrə əzü she lə kuzu

5. (5.1–6.10) A yi tə̂ əzə̂ lə takpa tə̂ əzə̂, ə katə̂ äwä kə Âgbɔ̂ Yîrə̂ tshə gamba əndʉ sorô əzə̂

6. (6.11-20) Bale əpʉ kə bla ətshe