Efazə

Fraka ə̂në Palɔ tâ kə Laglizə əgɔ

EFAZƏ

Kumu əpʉ

Âdâ kə ta fraka səke də̂ yea

Ngrowô ə̂në Palɔ tâ ə wlâ kə azü nə̂ Ndjapä mâ Efazə kɔ kə səke. Bale, tshə tâ tâ ngâ kʉ mbrə əndje ne, mbrə ə̂në, lə aangbʉlî afraka ngbatshe, əɨrɨ «Efazə» sə sə lə angbʉlî ə̈ndö əpʉ nə ne. Ə lï ndə kə yisə̂ nə ə pa Palɔ nə tâ ngrowô nə kə azü nə̂ Ndjapä lə agala ngbatshe lə ashɔ əgɔ Azi ndə kə pa əndje dɨ ə wla kə angâ əndje lə takpa tə̂ əndje. Fraka səke ə̂në tshə wlâ kɔ, tshə tâ alɔ ə̂në tshə dâka pə lə kânga mâ Rɔmə kɔ.

Efazə kə sə̂ tə gala ə̂në ə fʉ ə rô ə̂dû agala lə takpa tə̂ agala əgɔ Rɔmə ə̂në ə sə lə ashɔ Azi kɔ. Azü ngbatshe lə takpa tə̂ azü tshe mâ je nə sə̂ tə aawoka aərə. Əndje mbrə̂ ə̈bə̈ ə̂rɔ̂ anda mbrə ndjapä nə̂ əndje ə̂në əndje ê ətshə də ama grakə ə pa Arətemisə kɔ, ə̂në azü əgɔ Rɔmə nə ê, ənə̂ əndje, ətshə ə pa Diana kɔ. Arətemisə səkɔ sə̂ tə ə̈bə̈ ərə ə̂në azü kə gâmba, tə yashe kɔ. Lə ə̂rɔ̂ anda səkɔ də̂ azü nə sə̂ kə na mâ je ə vrɔ̂ ətshə. Azü tshe mâ je nə nɔ̂ kə sə̂ â yîndə əpʉ ərə sə̂ ə̂në əndje gâmba gâ ye tə ndjapä nə kɔ də lɔsu əndje, kʉtə̂ Ajuwufu də azü nə̂ Kristə tshî kə sə̂ sə̂ lə nə ne kɔ.

Alɔ ə̂në Palɔ tô tə̂ bishi ana nə̂ ye ə gû mâ Efazə je, tshə yîsə̂ əpʉ kə Ajuwufu tshe mâ je nə tə̂ əlo saaba nə̂ əndje nə. Mandânə, tshə rô ə gû na ye, mbrə ə̂në tshə lî lî ndə kə pa tshə daka pə mâ je ʉrrr əndʉ ye dɨ ə dɨ ne, bale tshə pâ kə əndje ə pa əne do tə̂ əne je. Alɔ ə̂në tshə dô tə̂ ye ə nâ tə̂ vəta ana nə̂ ye nə, tshə mâ ə̂ngû vəta kôto də kə yisə̂ əpʉ alɔnɔ̂ kə azü nə. Wu Azü-awla 19-20.

Palɔ yîsə̂ əpʉ rəke kə əzə̂ lə fraka səke: Ndjapä yîsə̂ ərə ə̂në tshə zâ wû gâ ye kɔ kə əzə̂ gashu gâ ye, ərə ə̂në tshə gâmba gâ ye lə ə̂rɔ̂tə̂ ye kɔ. Əpʉ nə yində kə pa nə ə pa tshə ngbo aərə nɔ̂ mâ ngâ lafɔ-e, də aənə̂ pâ ashɔ gâ tə̂ nə bale je, ndə kə pa Jezu Kristə do tə̂ ye tə makɔndji nə. Tshə pâ kwatə̂ye ə pa ə lï ndə kə pa azü nə̂ Kristə dji tə̂ əndje, ə sə tə alaye; ə sə sə ndə kə pa ayə səke sə tə Juwufu wala ayə sə sə tə Juwufu ne ne. Əyïkowɔ nə̂ əndje sə kʉ bale, ətshə də̂ Sataa. Bale əndje lï ndə kə pa əndje yu Ndjapä kpə ə̂sə̂ nə, ndə kə pa Sataa nə ro pâ əndje ro ne. Tshə pâ kwatə̂ye ndje ndə äwä ə̂në koshe lï ndə kə pa tshə mbrə tə̂ əwɔ nə, äwä ə̂në aneshe lï ndə kə pa əndje lʉ alabä də alayï əndje, äwä ə̂në akanga ndje lï ndə kə pa əndje lʉ alayïnga əndje. Tshə pâ əpʉ ə pa azü nə̂ Kristə lï ndə kə pa əndje sə kʉ bale də a-Kristə nə.

Əpʉ tshelə fraka səke na rəke

1. (1.1-2) Əpʉ kə bla ətshe

2. (1.3–3.21) Kristə tô ngwarə gâ pâ əzə̂ də Âgbɔ̂ Yîrə̂

3. (4.1–6.20) A sə də tafa kə sə bale də a-Kristə

4. (6.21-24) Bale əpʉ kə bla ətshe