2 Kɔratə

Bishi Fraka ə̂në Palɔ tâ kə Laglizə əgɔ

KƆRATƏ

Kumu əpʉ

Âdâ kə ta fraka səke də̂ yea

Ə̈bə̈ ata fraka ə̂në Palɔ tâ ə wlâ kə azü nə̂ Ndjapä lə gala Kɔratə kɔ kə sə̂ ndje ke. Lə ngrowô nə ə̂në tshə wlâ ətshinə kɔ, tshə pâ kə əndje ə pa əne yîndə kə na ə wu əndje. Tshə pâ gâ lə nə ndje ə pa əndje ngbô ngendja gâ tə̂ nə, ndə kə pa əndje wla ngendja səkɔ kə azü nə̂ Ndjapä mâ Jeruzalamə, â ətshə də ə̂tə̂ ye kə na ə ko je. Bale, tshə nâ nâ mâ je ne. Â ə̂në tshə nâ nâ mâ je ne kɔ, âdâ nə sə̂ rəke: Timɔte sə̂ kə na mâ Kɔratə je, ə djî lə äwä əpʉ kə mbrə tə̂ azü nə̂ Ndjapä tshe mâ je nə. Â əpʉ nə tô tô bale ne. Tshə djî ə pa alabə̈ azü nə̂ Kristə ə̂në əndje sə tə Ajuwufu kɔ nâ mâ Kɔratə je, ə yîsə̂ əpʉ ə̂në ə sə̂ kpî tə̂ Ə̂rɔ̂ Əpʉ ə̂në Palɔ yîsə̂ nə lə Kɔratə nə ətshinə gâ ye kɔ. Əndje sə̂ ndje kə pa kə əndje ə pa Palɔ nə sə̂ sə̂ tə djatra əzü-awla nə̂ Kristə ne. Tshə gû ə pâ ndəma nə kə Palɔ nə. Əyo mbrə̂ Palɔ nə ngbatshe. Âdârə ə̂në tshə zâ ama ndə kə ta ngrowô kə əndje ndə kə pa tshə pa əpʉ ə̂në ə sə lə akrɔ ye kɔ kə əndje, də əpʉ ərə ə̂në ə mbrə̂ ə̂në tshə nâ nâ ə wû əndje ne kɔ.

Palɔ pâ gâ lə ngrowô səke ə̂në tshə wlâ kɔ ə pa əne sə̂ tə əzü-awla nə̂ Kristə, bale äwä ə̂në əne mbrə̂ də kosəra nə̂ əne kɔ, ə sə̂ kpî tə̂ ənə̂ ə̂dû azü nə ə̂në əndje sə̂ kə yisə̂ äwä kə azü nə kɔ. Ərə sə̂ ə̂në ə mbrə̂ ə̂në tshelə əndje wə̂ra tə̂ əndje tə̂ əne kɔ kə sə̂. Tshə kɨ̂ ə̂sə̂ əyo tə̂ ye ndje ə pa əne yîndə nə ə pa tshelə takpa tə̂ əne də azü tshe Kɔratə nə tɔ gâ mandânə. Tshə kwatə̂ye ə pâ kə əndje ə pa əndje gbɔ də äwä kə rɔ ngendja nə gâ tə̂ nə kanika ə tɨ azü nə̂ Ndjapä nə mâ Jeruzalamə je gâ lafɔ. Tshə pâ kwatə̂ye ə pa əne yîndə kə na ə wu əndje, kanika əne lï ndə kə pa djatra əpʉ kə azü ə̂në əndje tshî äwä anyaka tshî tʉ ne kɔ.

Kədə Palɔ kə kâ gâ pâ əpʉ səkɔ â pâ əne sə̂ tə əzü-awla, mbrə ə̂në tshə yîndə nə ə pa azü wusə̂ Ə̂rɔ̂ Əpʉ, ə wusə̂ nə ndje ə pa Jezu sə tə Âgbɔ̂ Əyïngerə.

Əpʉ tshelə fraka səke na rəke

1. (1.1-11) Palɔ bla ətshe, ə za mərshe kə Ndjapä

2. (1.12–2.17) Kosəra nə̂ ə̈bə̈ əzü-awla mâ ndə azü nə̂ Ndjapä

3. (3.1–7.16) Kə yində ə̈bə̈ əzü mata ə̂në Kristə yîndə əzə̂ kɔ

4. (8.1–9.15) Kə ko aərə kə alayïəyo

5. (10.1–13.10) Palɔ pa əpʉ ə pa əne sə tə djatra əpʉ tə əzü-awla

6. (13.11-13) Bale əpʉ kə bla ətshe